अमेरिकी सेनाको इन्धन भर्ने (refuelling) सैन्य विमान KC-135 इराकमा दुर्घटनाग्रस्त हुँदा त्यसमा सवार छ जनामध्ये चार जना सैनिकको मृत्यु भएको अमेरिकी सेनाको सेंट्रल कमाण्ड (CENTCOM) ले पुष्टि गरेको छ। सैनिक अधिकारीका अनुसार दुर्घटनापछि खोज तथा उद्धार कार्य अझै जारी रहेको छ। प्रारम्भिक अनुसन्धानले यो दुर्घटना शत्रु आक्रमण वा आफ्नै सेनाको गोलीबारी (friendly fire) का कारण भएको संकेत नदेखिएको जनाएको छ।

CENTCOM का अनुसार उक्त विमान इरानविरुद्ध चलिरहेको अमेरिकी सैन्य अभियानसँग सम्बन्धित उडानमा सहभागी थियो। घटनाको समयमा दुईवटा विमान अभियानमा संलग्न थिए, जसमा एक विमान दुर्घटनाग्रस्त भए पनि अर्को विमान सुरक्षित रूपमा अवतरण गर्न सफल भएको जानकारी दिइएको छ।

KC-135 प्रकारका विमानहरू आकाशमै अन्य लडाकु विमानलाई इन्धन भर्ने क्षमतायुक्त हुन्छन्। अमेरिकी सेनाको दीर्घ दूरीका हवाई अभियान सञ्चालन गर्न यस्ता विमान अत्यन्त महत्वपूर्ण मानिन्छन्। विशेषगरी पहिलो खाडी युद्ध (Gulf War) को समयमा लडाकु जेट र बमवर्षक विमानको उडान दूरी बढाउन यी विमानहरूको व्यापक प्रयोग गरिएको थियो।

सामान्यतया KC-135 मा कम्तीमा तीन जना मुख्य चालक दल हुन्छन्—पाइलट, सह–पाइलट र “बुम अपरेटर” (boom operator), जसले विमानबाट अर्को विमानमा इन्धन भर्ने यन्त्र सञ्चालन गर्ने जिम्मेवारी लिन्छ।

अमेरिकी सेनाले यो दुर्घटना मित्रवत् हवाई क्षेत्र (friendly airspace) माथि भएको बताएको छ। तर उक्त क्षेत्र इराकको त्यस्तो भागमा पर्छ जहाँ इरान समर्थित मिलिसिया समूहहरू सक्रिय रहेको मानिन्छ। उता इरानको सरकारी टेलिभिजनले भने एक सहयोगी समूहले मिसाइल प्रहार गरेर विमानलाई निशाना बनाएको दाबी गरेको छ।

अमेरिका–इजरायल र इरानबीचको युद्ध सुरु भएयता सात जना अमेरिकी सैनिकको मृत्यु भएको पुष्टि भइसकेको छ। यसैबीच हालसम्मको युद्ध अवधिमा अमेरिकी सेनाले कम्तीमा चार वटा विमान गुमाइसकेको बताइएको छ।

यसअघि यसै महिनाको सुरुवातमा कुवेतमाथि उडिरहेका तीन वटा F-15 लडाकु विमान “संभावित फ्रेन्ड्ली फायर” घटनामा खसालिएका थिए। यद्यपि त्यस घटनामा सवार छै जनै चालकदल सुरक्षित रूपमा इजेक्ट भएर जोगिएका थिए।

KC-135 Boeing कम्पनीले सन् 1950 र 1960 को दशकमा अमेरिकी सेनाका लागि निर्माण गरेको हो। दशकौँदेखि यो विमान अमेरिकी सेनाको हवाई इन्धन आपूर्ति प्रणालीको मुख्य आधार बनेको छ, जसले लडाकु विमानहरूलाई लामो दूरीका अभियान सञ्चालन गर्न सम्भव बनाउँदै आएको छ।