अमेरिकी राष्ट्रपति डोनाल्ड ट्रम्प र बेलायतका प्रधानमन्त्री कियर स्टार्मर बीच मध्यपूर्वमा चलिरहेको युद्धलाई लिएर कडा वाकयुद्ध सुरु भएको छ। ट्रम्पले बेलायतलाई युद्धमा ढिलो गरेर मात्रै सहभागी हुन खोजेको भन्दै आलोचना गरेका छन्। ट्रम्पले आफ्नो सामाजिक सञ्जाल ट्रुथ सोसियल मार्फत टिप्पणी गर्दै बेलायतले अहिले दुईवटा विमानवाहक युद्धपोत मध्यपूर्व पठाउनेबारे सोचिरहेको भए पनि अमेरिकालाई त्यसको आवश्यकता नरहेको बताएका छन्। उनले बेलायतलाई पहिलेको “महान् सहयोगी” भन्दै व्यंग्य गर्दै भने “हामीले युद्ध जितिसकेपछि मात्रै युद्धमा आउने साथीहरू हामीलाई चाहिँदैन।”

बेलायतको शक्तिशाली विमानवाहक जहाज HMS Prince of Wales लाई उच्च तयारी अवस्थामा राखिएको छ। तर सुरुमा अमेरिका र इजरायलले इरानमाथि गरेको आक्रमणमा बेलायत प्रत्यक्ष सहभागी भएको थिएन। यद्यपि पछि बेलायती सरकारले अमेरिकालाई आफ्नो केही सैन्य आधार प्रयोग गर्न अनुमति दिएको छ। त्यसपछि अमेरिकी B-1 बमवर्षक विमानहरू इंग्ल्यान्डको RAF Fairford हवाई अड्डामा अवतरण गरेको देखिएको थियो। यी विमानहरू इरानी मिसाइल हमलाविरुद्ध रक्षात्मक कारबाहीका लागि प्रयोग गरिने बताइएको छ।

यसैबीच युद्धको असर मध्यपूर्वका अन्य देशहरूमा पनि फैलिएको छ। शनिबार कतार र संयुक्त अरब इमिरेट्स माथि मिसाइल तथा ड्रोन आक्रमण भएको जानकारी दिइएको छ भने साउदी अरेबिया तर्फ पनि एक मिसाइल प्रक्षेपण गरिएको बताइएको छ। यूएईका अधिकारीहरूका अनुसार दुबईमा हवाई अवरोधका क्रममा झरेको धातुको टुक्रा लागेर एक व्यक्तिको मृत्यु भएको छ।

इरानका राष्ट्रपति भने छिमेकी मुलुकहरूसँग तनाव बढाउन नचाहेको संकेत दिएका छन्। उनले गल्फ क्षेत्रका देशहरूसँग माफी माग्दै “पहिले हमला नभएसम्म इरानले उनीहरूलाई निशाना नबनाउने” बताएका छन्। तर इरानका विदेशमन्त्री अब्बास अराघ्ची ले भने अमेरिका युद्ध झन् चर्काउन खोजे त्यसको जिम्मेवारी पूर्ण रूपमा वाशिङ्टनकै हुने चेतावनी दिएका छन्।

उता इजरायल ले लेबनानको राजधानी बेइरुत का दक्षिणी क्षेत्रका बासिन्दालाई तुरुन्त स्थान खाली गर्न चेतावनी दिएको छ। इजरायली सेनाले इरान समर्थित हेजबुल्लाह समूहका संरचनामाथि लक्षित आक्रमण गर्ने तयारी गरिरहेको जनाएको छ।

इरानभित्र पनि लगातार आक्रमण भइरहेको खबर आएको छ। तेहरान र अल्बोर्ज प्रान्तका केही तेल भण्डारण केन्द्रहरूमा विस्फोट भएको इरानी राष्ट्रिय तेल कम्पनीले पुष्टि गरेको छ। कराज शहरका बासिन्दाहरूले रातभरि ठूलो आगलागी र विस्फोटका कारण “रात नै दिन जस्तै उज्यालो भएको” बताएका छन्।

यसैबीच कतारका अमिर तामिम बिन हमाद अल थानी ले राष्ट्रपति ट्रम्पसँग टेलिफोन वार्ता गर्दै आफ्नो देशमाथि हुने आक्रमणको कडा प्रतिरोध गर्ने चेतावनी दिएका छन्। उनले क्षेत्रीय तनाव बढ्दै गए यसको गम्भीर परिणाम आउने बताएका छन्।

राष्ट्रपति ट्रम्पले अर्को  टिप्पणी पनि गरेका छन्। उनले भविष्यमा इरानमा “युद्धतर्फ देशलाई नधकेल्ने” नयाँ राष्ट्रपति चाहिएको भन्दै अमेरिकाले त्यस्तो नेतृत्व देख्न चाहेको बताएका छन्। साथै इरानले आत्मसमर्पण नगरे कडा सैन्य कारबाही जारी रहने संकेत दिएका छन्।