Updated…..आज गएरातिदेखि अमेरिकाका ५० मध्ये ३६ भन्दा बढी राज्यहरू भीषण हिउँ र अत्यधिक चिसोको चपेटामा परेका छन्। पूर्वी तटदेखि मध्य–पश्चिम र दक्षिणी क्षेत्रसम्म फैलिएको शक्तिशाली शीत आँधीका रण जनजीवन अत्यन्त प्रभावित बनेको छ। विभिन्न स्थानमा ८ इन्चदेखि ३६ इन्चसम्म हिउँ परेको पुष्टि भइसकेको छ भने कतिपय क्षेत्रमा बरफ जमेर सडक र संरचना जोखिमपूर्ण बनेका छन्। यसका कारण अमेरिकाभर हजारौँ उडानहरू रद्द भएका छन् र प्रमुख अन्तर्राष्ट्रिय तथा आन्तरिक विमानस्थलहरूमा यात्रुहरू अलपत्र परेका छन्।

अत्यधिक चिसो र हिमपातका कारण सडक यातायात सबैभन्दा बढी प्रभावित बनेको छ। धेरै राज्यका राजमार्गहरूमा चिप्लो सडकका कारण सयौँ गाडीहरू एकआपसमा ठोक्किएका छन्। ठूला ट्रकदेखि निजी सवारीसाधनसम्म दुर्घटनामा परेका छन् भने कैयौँ मानिस घाइते भई अस्पतालमा उपचाररत छन्। आपतकालीन सेवाहरूलाई पनि घटनास्थलसम्म पुग्न कठिनाइ भएको स्थानीय अधिकारीहरूले बताएका छन्।

मानवीय क्षतिको विवरण पनि आउन थालेको छ। न्यूयोर्कमा चिसोका कारण कम्तीमा तीन जनाको ज्यान गएको पुष्टि भएको छ भने पेनसिलभानियामा एक जनाको मृत्यु भएको छ। अत्यधिक चिसोका कारण घरबारविहीन, वृद्धवृद्धा र दीर्घरोगीहरू सबैभन्दा जोखिममा परेका छन्। कतिपय क्षेत्रमा तापक्रम शून्यभन्दा धेरै तल झरेको र हावासँगै महसुस हुने चिसो अझै घातक भएको मौसमविद्हरूले चेतावनी दिएका छन्।

परिस्थिति गम्भीर बन्दै गएपछि धेरै राज्य सरकारले आपतकालीन अवस्था घोषणा गरिसकेका छन्। संघीय सरकारले पनि १६ भन्दा बढी राज्यहरूमा केन्द्रीय तहबाटै आपतकालीन घोषणा गर्दै FEMA लगायतका निकायहरूलाई उद्धार, राहत र समन्वयका लागि परिचालन गरेको छ। हजारौँ घरधुरीमा विद्युत् आपूर्ति अवरुद्ध भएको छ र कतिपय क्षेत्रमा तातोपानी तथा इन्धनको अभाव देखिन थालेको छ।

मौसम पूर्वानुमान अनुसार यो हिउँपात र अत्यधिक चिसोको प्रभाव कम्तीमा यो साता भरि रहने सम्भावना छ। थप हिउँ, बरफ जम्ने अवस्था र चिसो हावाका कारण जनजीवन अझै चुनौतीपूर्ण बन्न सक्ने चेतावनी दिइएको छ। यस प्राकृतिक प्रकोपबाट कति ठूलो धनजनको क्षति हुन्छ भन्ने यकिन भइसकेको छैन, तर हालसम्मको अनुमानअनुसार करिब १४ करोडभन्दा बढी अमेरिकी नागरिक प्रत्यक्ष वा अप्रत्यक्ष रूपमा यस भीषण शीत आँधीबाट प्रभावित भएका छन्।

****

अहिले अमेरिकाभर फैलिएको शक्तिशाली शीत आँधीले टेक्सासदेखि उत्तर–पूर्वी क्षेत्रसम्म करिब १,५०० माइलभन्दा बढी क्षेत्र ढाकेको छ। हिउँ, बरफ र जम्ने वर्षाका कारण देशको पूर्वी आधा भाग गम्भीर रूपमा प्रभावित बनेको छ। मौसमविद्हरूका अनुसार यो आँधी करिब २,३०० माइलभन्दा लामो दूरी पार गर्दै अघि बढिरहेको छ र हाल यसको प्रभाव चरम विन्दुमा पुगेको छ।

दक्षिणी राज्यहरूमा अत्यधिक चिसो र बरफ जम्ने वर्षाका कारण विद्युत् आपूर्ति गम्भीर रूपमा अवरुद्ध भएको छ। पछिल्लो विवरणअनुसार ७ लाख ३४ हजारभन्दा बढी घरधुरी अन्धकारमा परेका छन्। मौसम थप बिग्रिने भएकाले यो संख्या दिनभरि अझै बढ्न सक्ने चेतावनी दिइएको छ। अत्यधिक चिसोमा विद्युत् अवरुद्ध हुँदा हजारौँ परिवारहरू कठोर चिसो सहन बाध्य हुने अवस्था सिर्जना भएको छ।

उत्तर–पूर्वी अमेरिकामा पर्ने इन्टरस्टेट–९५ करिडोर, जहाँ देशका सबैभन्दा घना जनसंख्या भएका सहरहरू पर्छन्, त्यहाँ भीषण हिउँपात भइरहेको छ। कतिपय सहरहरूले पछिल्ला धेरै वर्षयताकै सबैभन्दा धेरै हिउँ पर्ने अनुमान गरिएको छ। न्यूयोर्क, बोस्टन, फिलाडेल्फिया लगायतका सहरहरूमा जनजीवन ठप्पजस्तै बनेको छ।

यातायात क्षेत्रमा पनि ठूलो असर परेको छ। हालसम्म २६ हजार ८ सयभन्दा बढी उडानहरू रद्द वा ढिलो भएका छन्। सडकहरू चिप्लो हुँदा सयौँ सवारी दुर्घटना भएका छन् भने आपतकालीन सेवाहरूलाई घटनास्थलसम्म पुग्न कठिनाइ भएको छ। रेल र बस सेवा पनि धेरै स्थानमा अवरुद्ध भएका छन्।

मौसमको चरम अवस्थाका कारण आपतकालीन अवस्था घोषणा गरिएको छ। संघीय तहबाट राष्ट्रपति डोनाल्ड ट्रम्पले आपतकालीन विपद् घोषणा स्वीकृत गर्दै प्रभावित राज्यहरूमा संघीय सहायता र उद्धार कार्य तीव्र बनाउने निर्णय गरेका छन्। FEMA लगायतका निकायहरूलाई राहत, उद्धार र पुनःस्थापनाका लागि परिचालन गरिएको छ।

मौसम पूर्वानुमानले थप चिन्ताजनक अवस्था देखाएको छ। आगामी एक साताभित्र अमेरिकाका आधाभन्दा बढी नागरिकहरूले शून्यभन्दा तल झर्ने हावाको तापक्रम (सब–जिरो विन्ड चिल) अनुभव गर्नेछन्। यो अत्यधिक चिसोले परेको हिउँ र बरफ लामो समयसम्म जमिरहने भएकाले विद्युत् नभएका घरधुरीहरूका लागि अवस्था अझै कष्टकर बन्ने अनुमान गरिएको छ।

हाल करिब १९ करोड ४० लाख अमेरिकी नागरिक कुनै न कुनै प्रकारको शीत आँधीसम्बन्धी चेतावनीको दायरामा छन्। एकै समयमा यति धेरै काउन्टीहरू शीत आँधी चेतावनीमा परेको यो कीर्तिमानी अवस्था भएको बताइएको छ। मौसमविद्हरूले नागरिकहरूलाई अनावश्यक यात्रा नगर्न, न्यानो कपडा प्रयोग गर्न र स्थानीय प्रशासनका निर्देशन पालना गर्न आग्रह गरेका छन्।