दक्षिणी स्पेनमा भएको भीषण रेल दुर्घटनामा कम्तीमा २१ जनाको ज्यान गएको छ । अधिकारीहरूले मृत्यु संख्या अझ बढ्न सक्ने चेतावनी दिएका छन् । दुर्घटनामा परी ३० भन्दा बढी यात्रु गम्भीर घाइते भएका छन् भने कुल ७० भन्दा धेरैलाई उपचारका लागि अस्पताल पुर्‍याइएको छ ।

स्पेनको यातायात मन्त्रालयका अनुसार मालागाबाट म्याड्रिडतर्फ गइरहेको तीव्रगतिको रेल आदामुज नजिकै पटरीबाट चिप्लिएर अर्को ट्र्याकमा पुगेको थियो । त्यसपछि विपरीत दिशाबाट आउँदै गरेको अर्को रेलसँग ठोक्किँदा ठूलो क्षति भएको हो । दुर्घटना भएको स्थान कोर्दोबा नजिक पर्छ ।

रेल सञ्जाल सञ्चालक Adifका अनुसार दुर्घटना साँझ ६:४० बजे (स्थानीय समय) मालागाबाट रेल छुटेको करिब १० मिनेटपछि भएको हो । उक्त रेल सीधा र केही महिनाअघि मात्रै मर्मत गरिएको ट्र्याकमा दुर्घटनाग्रस्त हुनु “अत्यन्तै असामान्य” भएको यातायात मन्त्रीले बताएका छन् ।

हालसम्म दुर्घटनाको आधिकारिक कारण खुल्न सकेको छैन । प्रारम्भिक अनुसन्धान सुरु भइसकेको भए पनि निष्कर्ष आउन कम्तीमा एक महिना लाग्ने अनुमान गरिएको छ ।

प्रधानमन्त्री पेद्रो सान्चेजले यस घटनालाई राष्ट्रका लागि “गहिरो पीडाको रात” भन्दै मृतकका परिवारप्रति समवेदना व्यक्त गरेका छन् ।

दुर्घटनाग्रस्त पहिलो रेलमा करिब ३०० यात्रु सवार थिए भने दोस्रो रेलमा झन्डै १०० यात्रु रहेको निजी रेल कम्पनी तथा सरकारी रेल सेवा Renfeले जनाएको छ ।

आदामुजका मेयर राफाएल मोरेनो दुर्घटनास्थलमा पुग्ने पहिलोमध्ये एक थिए । उनले दृश्यलाई “डरलाग्दो सपना जस्तै” भएको बताए । आपतकालीन उद्धारकर्मीहरूका अनुसार रेलका डब्बा अत्यन्तै च्यापिएका कारण जीवित मानिस निकाल्न शव हटाउनुपर्ने अवस्था समेत आयो ।

कोर्दोबा दमकल प्रमुख फ्रान्सिस्को कार्मोनाले सार्वजनिक प्रसारण संस्था RTVEसँग भने, “यो अत्यन्त कठिन र संवेदनशील काम हो । कहिलेकाहीँ एक जनालाई बचाउन अर्काको शव हटाउनुपर्‍यो ।”

दुर्घटनापछि म्याड्रिड–आन्डालुसिया रेल सेवा पूर्ण रूपमा बन्द गरिएको छ । प्रभावित यात्रुका लागि म्याड्रिड, मालागा, कोर्दोबा र अन्य स्टेशनमा परिवारजनका लागि सहायता केन्द्र स्थापना गरिएको छ ।

इटालीको रेल निर्माता कम्पनीका अनुसार दुर्घटनामा परेको रेल Freccia 1000 मोडलको हो, जसले अधिकतम ४०० किलोमिटर प्रतिघण्टासम्म गति लिन सक्छ ।

स्पेनी रेडक्रसले घटनास्थलमा आपतकालीन सहायता, घाइतेको उपचार र परिवारजनका लागि मानसिक परामर्श सेवा सुरु गरेको छ । रेडक्रसका प्रतिनिधि मिगेल आङ्गेल रोड्रिगेजले भने, “सूचनाको अभावले परिवारहरू अत्यन्तै तनावमा छन् । यो क्षण सबैका लागि पीडादायी छ ।”

दुर्घटनामा परेको रेलमै सवार पत्रकार साल्भादोर जिमेनेजले झट्कालाई “भूकम्प जस्तै” भएको बताए । उनले सामाजिक सञ्जालमार्फत कडा चिसो रातमा यात्रुहरू बसको प्रतीक्षामा रहेको जानकारी दिएका छन् ।

राजा फेलिपे छैठौँ र रानी लेटिजियाले पनि घटनाप्रति गहिरो चिन्ता व्यक्त गर्दै मृतकप्रति श्रद्धाञ्जली र घाइतेको शीघ्र स्वास्थ्यलाभको कामना गरेका छन् ।

फ्रान्सका राष्ट्रपति इमानुएल म्याक्रों तथा युरोपेली आयोग प्रमुख उर्सुला फोन डेर लायनले समेत स्पेनप्रति ऐक्यबद्धता जनाउँदै समवेदना सन्देश दिएका छन् ।

उल्लेखनीय छ, सन् २०१३ मा पनि स्पेनको गालिसिया क्षेत्रमा भएको तीव्रगतिको रेल दुर्घटनामा ८० जनाको मृत्यु भएको थियो, जुन देशकै सबैभन्दा ठूलो रेल दुर्घटनामध्ये एक मानिन्छ ।