क्यालिफोर्नियामा शक्तिशाली आँधी र सक्रिय ‘एट्मोस्फेरिक रिभर’ का कारण अभूतपूर्व संकट उत्पन्न भएको छ। लगातारको मुसलधारे वर्षा, पहिरो, माटो र ढुंगाको भेल (डेब्रिस फ्लो) र भीषण बाढीको जोखिम बढेपछि विभिन्न स्थानमा आपतकालीन अवस्था घोषणा गर्दै बासिन्दालाई सुरक्षित स्थानतर्फ सारिन आदेश र चेतावनी जारी गरिएको छ। विशेष गरी लस एन्जलस वरपरका क्षेत्रहरूमा ज्यानै जोखिममा पार्ने अवस्था देखिएको मौसम विज्ञहरूले चेतावनी दिएका छन्।

बुधबार बिहानदेखि लस एन्जलसको उत्तर र उत्तरपश्चिमी पहाडी क्षेत्रहरूमा ४ देखि ८ इन्चसम्म वर्षा भइसकेको छ, र यो प्रणाली अझै कमजोर नहुँदै क्षेत्रभर फैलिरहेको छ। पहाडमा फिटौँ बराबरको हिमपात, भीषण हुरी, चट्याङसहितको आँधी र तीव्र हावाले क्यालिफोर्नियालाई बहुआयामिक जोखिममा पारेको छ।

दक्षिणी क्यालिफोर्नियाका कम्तीमा पाँच काउन्टीमा—विशेष गरी हालै डढेलोले जलेका क्षेत्र वरिपरि—खाली गर्न आदेश वा चेतावनी लागू गरिएको छ। यसैबीच क्यालिफोर्नियाका गभर्नर Gavin Newsom ले लस एन्जलस, अरेन्ज, रिभरसाइड, सान बर्नार्डिनो, सान डिएगो र शास्ता काउन्टीमा आपतकाल घोषणा गरेका छन्। उनका अनुसार यो कदमले आपतकालीन अधिकार सक्रिय गर्दै जनताको सुरक्षाका लागि आवश्यक स्रोतहरू अग्रिम रूपमा परिचालन गर्न मद्दत गर्नेछ।

मौसम पूर्वानुमान केन्द्रका अनुसार लस एन्जलस, सान बर्नार्डिनो, भेन्चुरा र सान्ता बारबरा काउन्टीका करिब ७० लाखभन्दा बढी मानिस उच्चतम जोखिमको क्षेत्रमा परेका छन्। बुधबार मात्र दक्षिणी क्यालिफोर्नियामा दर्जनौँ आकस्मिक बाढी चेतावनी जारी गरिएका छन्, जसमा लस एन्जलसका ६० लाखभन्दा बढी बासिन्दा प्रत्यक्ष प्रभावित छन्।

उत्तरपश्चिमी लस एन्जलस र उत्तरपूर्वी भेन्चुरा काउन्टीमा सडक र राजमार्ग बगाएको, ढुंगा र माटो खसेको तथा आवागमन पूर्ण रूपमा अवरुद्ध भएको रिपोर्ट आएको छ। सान बर्नार्डिनो पहाड क्षेत्रमा हाइवे–२ मा बाढी र डेब्रिस फ्लो देखिएको छ। काजोन जक्सन नजिक उत्तरतर्फ जाने इन्टरस्टेट–१५ माटो र ढुंगाको भेलले बन्द भयो भने लस एन्जलस काउन्टीमा इन्टरस्टेट–५ का केही भाग जलमग्न भएर बन्द गरियो। लस एन्जलस प्रहरी विभागले बुधबार बिहानसम्म ५२ वटा सवारी दुर्घटनामा उद्धार तथा व्यवस्थापन गरेको जनाएको छ।

लस एन्जलसको उत्तरपूर्वमा पर्ने राइटवुड क्षेत्रमा आकस्मिक बाढी र पहिरोको जोखिम अत्यधिक बढेपछि घरभित्रै सुरक्षित रहन आदेश दिइएको छ। त्यहाँको फायर डिपार्टमेन्टले सार्वजनिक गरेको भिडियोमा हाइवे–२ पूर्ण रूपमा आवागमन अयोग्य बनेको देखिन्छ। उता, विनेट्का क्षेत्रमा लस एन्जलस नदीको किनारमा नालीभित्र फसेका एक व्यक्तिलाई दमकल विभागले उद्धार गरेको छ। अन्य दुई जनालाई पनि जोखिम क्षेत्रबाट सुरक्षित स्थानमा सारिएको छ।

तीव्र हावा र वर्षाका कारण उत्तरी क्यालिफोर्निया, विशेष गरी बे एरियामा १०८ माइल प्रतिघण्टासम्मको हावाको झट्का मापन गरिएको छ। दक्षिणी क्यालिफोर्नियाका सान गेब्रियल पहाडहरूमा पनि ९० माइलभन्दा बढीको हावा चलेको छ। यसका कारण राज्यभर करिब १ लाख १० हजार घर तथा व्यवसायमा विद्युत् आपूर्ति अवरुद्ध भएको छ।

सिएरा नेभाडामा हिमपात बढ्दै गएपछि इन्टरस्टेट–८० मा चेन कन्ट्रोल लागू गरिएको छ, जसअनुसार चारपांग्रे सवारी र उपयुक्त टायर बाहेक सबै सवारीमा चेन अनिवार्य गरिएको छ। डोनर पास हुँदै यात्रा गर्नु अत्यन्त कठिन वा असम्भव बन्न सक्ने चेतावनी दिइएको छ। दक्षिण साक्रामेन्टोमा भिजेको सडकमा गाडी अनियन्त्रित भई पोलमा ठोक्किँदा एक चालकको ज्यान गएको छ। प्रहरीका अनुसार तीव्र वर्षापछि असुरक्षित गतिका कारण दुर्घटना भएको प्रारम्भिक अनुमान छ।

विशेषज्ञहरूका अनुसार क्रिसमस इभमै यति उच्च जोखिममा पर्ने बाढी दुर्लभ मानिन्छ। वर्षको चार प्रतिशतभन्दा कम दिन मात्र यस्तो उच्च जोखिम घोषणा गरिन्छ, तर यही जोखिमले अधिकांश बाढीजन्य क्षति र मृत्युसमेत निम्त्याउने तथ्यांकले देखाउँछ। बुधबार केही स्थानमा प्रतिघण्टा एक इन्चभन्दा बढी वर्षा हुने सम्भावना छ, जसले हालै डढेलोले जलेका जमिनमा पानी नसोसिँदा माटो र ढुंगाको तीव्र भेल उत्पन्न गराउन सक्छ।

खतरा यतिमै सीमित छैन। क्रिसमसपछि पनि अर्को एट्मोस्फेरिक रिभर प्रणाली सक्रिय हुने पूर्वानुमान छ, जसले शुक्रबारसम्म १ करोड २० लाखभन्दा बढी मानिसलाई प्रभावित पार्न सक्ने मध्यमदेखि उच्च जोखिम निम्त्याउनेछ। साता सकिँदासम्म दक्षिणी क्यालिफोर्नियामा तटीय र उपत्यकामा ४–७ इन्च र पहाडी क्षेत्रमा ६–१४ इन्चसम्म वर्षा हुन सक्ने अनुमान छ। यो परिमाण लस एन्जलसजस्तो शहरका लागि दुई महिनादेखि आधा वर्ष बराबरको वर्षासरह हो।

यद्यपि जोखिम उच्च हुँदाहुँदै पनि केही बासिन्दा घर नछाड्ने अडानमा छन्। भेन्चुरा, सान्ता बारबरा, अरेन्ज र सान बर्नार्डिनो काउन्टीले निकासी आदेश जारी गरे पनि लस एन्जलस वरपरका डढेलो प्रभावित क्षेत्रमा धेरैले बसाइँ सर्न मानेका छैनन्। प्रहरी प्रमुख जिम म्याकडोनेलले नागरिकलाई निर्णय पुनर्विचार गर्न आग्रह गरेका छन्।

सिएरा नेभाडामा भारी हिमपात र तटीय क्षेत्रमा आँधी–हुरी तथा सम्भावित टोर्नाडोसम्मको चेतावनीसँगै क्यालिफोर्नियाले यस सिजनको सबैभन्दा गम्भीर मौसम चुनौती सामना गरिरहेको छ। मौसमविद्हरूका अनुसार आगामी सप्ताहन्ततिर मात्र केही राहतको संकेत देखिएको छ।