न्युयोर्क / इस्रायली प्रधानमन्त्री बेन्जामिन नेतन्याहूले संयुक्त राष्ट्रसंघको महासभामा शुक्रबार दिएर पाश्चात्य मुलुकहरूलाई कडा आलोचना गरेका छन्। उनले पछिल्लोपटक फ्रान्स, बेलायत, क्यानडा, अष्ट्रेलिया लगायतका मुलुकहरूले फिलिस्तिनी राज्यलाई मान्यता दिनु कमजोरी भएको भन्दै ती देशहरू “पक्षपाती मिडिया, कट्टर इस्लामवादी समूह र यहुदीविरोधी भीडको दबाबमा झुके” भनेर आरोप लगाए।

नेतन्याहूले करिब दुई वर्षदेखि जारी गाजाको युद्धबारे बढ्दो अन्तर्राष्ट्रिय आलोचनालाई “इस्रायलमाथिको राजनीतिक र कानुनी युद्ध” भने। उनले पाश्चात्य देशहरूले “जिहादको डरले इस्रायललाई बलिदान दिँदै आत्मसमर्पण गरेको” टिप्पणी गरे।

उनको भाषणका क्रममा धेरै देशका प्रतिनिधिहरूले असन्तुष्टि जनाउँदै हल छाडे, जसले इस्रायलको बढ्दो कूटनीतिक एकान्तलाई झल्कायो। तर नेतन्याहू अडिग रहँदै हमास र इरानविरुद्ध आक्रामक संदेश दोहोर्‍याए र अमेरिकी राष्ट्रपति डोनाल्ड ट्रम्पको खुलेर प्रशंसा गरे। उनले भने, “ट्रम्पले इस्रायल र अमेरिकाले सामना गरिरहेको साझा खतरा अरू कुनै नेताभन्दा राम्ररी बुझेका छन्।”

नेतन्याहूले भाषणमा इरान र त्यसका क्षेत्रीय सहयोगीहरू देखाउने नक्सा देखाएर इरानमाथि थप प्रतिबन्ध लगाउन आह्वान गरे। उनले इरानले पुनः परमाणु क्षमताहरू पुनर्निर्माण गर्न नपाओस् भनेर सचेत गराए।

तर नेतन्याहूको सबैभन्दा भावनात्मक सन्देश संयुक्त राष्ट्रको मञ्चभन्दा गाजाका अपहृतहरूसम्म पुग्ने उद्देश्यले दिइएको थियो। इस्रायली सेनालाई उनले गाजामा आफ्नो भाषण प्रसारण गर्न आदेश दिएको दाबी गरे र अपहरणमा परेका ४८ जना सबैलाई नछोडे “हामी तिमीलाई सिकार गरौँला” भनेर हमासलाई चेतावनी दिए।

अपहृत परिवारले भने नेतन्याहूको सन्देशलाई खोक्रो भनेका छन्। उनीहरूले मृतक अपहृतहरूको नाम नलिएको र परिवारको पीडालाई बेवास्ता गरेको आरोप लगाए।

नेतन्याहूले गाजामा जारी युद्ध रोक्ने कुनै संकेत नदिई “हामासका अन्तिम किल्लासम्म युद्ध जारी रहने” बताए। उनले भने, “७ अक्टोबरजस्तो हत्याकाण्ड दोहोरिन नदिन हामीले यो युद्ध पूरा गर्नै पर्छ र सक्दो छिटो टुंग्याउनुपर्छ।”

उनको यो अडान अमेरिकी राष्ट्रपति ट्रम्पको नयाँ युद्धविराम प्रस्तावसँग ठ्याक्कै विपरीत देखियो। ट्रम्प प्रशासनले प्रस्तुत गरेको २१ बुँदे गाजा शान्ति योजनामा ४८ घण्टाभित्र सबै अपहृतलाई मुक्त गर्ने र बदलामा इस्रायली सेना क्रमिक रूपमा फिर्ता गर्ने प्रस्ताव गरिएको छ। उक्त प्रस्ताव कतारमार्फत हमाससम्म पुर्याइने चर्चा छ।

यद्यपि नेतन्याहूले बारम्बार हमासलाई गाजाको भविष्य शासनमा स्थान नदिने बताएका छन् र फिलिस्तिनी प्राधिकरणलाई सत्तामा ल्याउने सम्भावनाबारे स्पष्ट असहमति जनाएका छन्।

ट्रम्पले भने पत्रकारहरूसँग कुरा गर्दै “गाजा युद्ध अन्त्य गर्ने सम्झौता निकै नजिक” रहेको दाबी गरेका छन्। सोमबार नेतन्याहू र ट्रम्पबीच भेटवार्ता हुने अपेक्षा गरिएको छ।