राष्ट्रपति डोनाल्ड ट्रम्पले कन्भरभेटिभ कार्यकर्ता चार्ली किर्कको मृत्युपछि अमेरिकालाई सम्बोधन गर्दै गहिरो संवेदना व्यक्त गरेका छन्। बुधबार युटाह भ्याली विश्वविद्यालयमा भएको कार्यक्रमका क्रममा गोली हानीएपछि किर्कको ज्यान गएको हो। ट्रम्पले हत्यारालाई ‘राक्षस’ भन्दै यो क्षणलाई अमेरिकाको लागि ‘अँध्यारो घडी’ बताएका छन्।

ट्रम्पले करिब चार मिनेटको वक्तव्यमा किर्कलाई धर्म, स्वतन्त्रता र साहसका मूल्य बोकेका असल अमेरिकीको रूपमा चित्रित गरे। उनले राजनीतिक वैमनस्य र घृणाले हिंसा निम्त्याउने संस्कृतिलाई कडा शब्दमा निन्दा गरे। उनले किर्कको योगदानको प्रशंसा गर्दै दोषीलाई कारबाही गरिने प्रतिबद्धता जनाए।

३१ वर्षीय किर्क टर्निङ पोइन्ट यूएसएका सह-संस्थापक थिए। उनी आफ्नो ‘अमेरिकन कमब्याक टुर’ को पहिलो कार्यक्रममा विद्यार्थीहरूसँग प्रश्नोत्तर गर्दै गर्दा छतबाट गोली प्रहार गरिँदा घाँटीमा लागेर मारिएका थिए। यो घटनाले कार्यक्रमस्थलमा रहेका हजारौँ मानिसलाई आतंकित बनायो र देशभर स्तब्ध बनायो। ट्रम्पले पहिले ट्रुथ सोशलमा किर्कको मृत्यु पुष्टि गरेका थिए र पछि राष्ट्रिय सम्बोधनमार्फत उनको जीवन र कार्यको सम्मान गरेका थिए।

ट्रम्पले किर्कको असामान्य प्रभाव विशेषगरी युवा पुस्तासँग रहेको भन्दै भने, “चार्लीले लाखौँलाई प्रेरित गरेका थिए। उहाँ एक सच्चा देशभक्त हुनुहुन्थ्यो जसले खुला बहस र आफ्नो मातृभूमिको लागि जीवन समर्पण गर्नुभयो। स्वतन्त्रता, लोकतन्त्र, न्याय र अमेरिकी जनताको लागि उहाँको लडाइँले उहाँलाई सत्य र स्वतन्त्रताको शहीद बनाएको छ। युवामाझ उहाँजस्तो सम्मान पाएको कोही थिएन।”

उनले थपे, “उहाँको लक्ष्य युवा पुस्तालाई राजनीतिक प्रक्रियामा सहभागी गराउनु थियो, जुन उहाँले अरू कसैले नगरेझैँ कुशलतापूर्वक गर्नुभयो। उनले क्याम्पसहरूमा देशप्रतिको प्रेम र साधारण बुद्घिका कुरा फैलाउनुभयो।”

ट्रम्पले अमेरिकामा राजनीतिक हिंसाको बढ्दो खतरा र द्वेषपूर्ण भाषाले निम्त्याएको वातावरणलाई जिम्मेवार ठहराउँदै भने, “द्वेषपूर्ण रूपमा दिनप्रतिदिन, वर्षौंसम्म असहमत व्यक्तिहरूलाई दानवीकरण गर्दा हिंसा र हत्या जस्ता त्रासदीपूर्ण परिणाम आउँछन्। धेरै वर्षदेखि उग्र वामपन्थीहरूले चार्लीजस्ता असल अमेरिकीहरूलाई नाजी वा संसारका सबैभन्दा ठूला अपराधीहरूसँग तुलना गर्दै आएका छन्।”

सम्बोधनको अन्त्यमा ट्रम्पले किर्कको अभियान र सन्देश निरन्तर रहिरहने बताउँदै भने, “हत्याराले उनको आवाजलाई गोलीले मौन बनाउन खोज्यो तर असफल भयो। हामी सबै मिलेर उनको सन्देश, आवाज र विरासतलाई अनन्त पुस्तासम्म जोगाइराख्नेछौं। यो जघन्य कृत्यले चार्लीको आवाज अझ ठूलो र शक्तिशाली बनेको छ।”