शुक्रबार बिहान युक्रेनको राजधानी किभको आकाशमा बाक्लो र तितो धुवाँ फैलिएको थियो। रातभरि चलेको रुसको तीव्र आकाशीय हमलाले सहरका प्रायः सबै क्षेत्रमा क्षति पुर्‍याएको छ। युक्रेनी अधिकारीका अनुसार २३ जना घाइते भएका छन्।

रातभर आकाश प्रतिरक्षा प्रणालीका गोलाबारी, ड्रोनको गुन्ज, र ठूला विस्फोटका आवाजले किभ काँपिरह्यो। युक्रेनी वायुसेनाका अनुसार रुसले यस पटक रेकर्ड तोड्दै ५५० ड्रोन र ११ वटा मिसाइल प्रहार गरेको छ। तीमध्ये ७२ ड्रोन युक्रेनको वायु प्रतिरक्षा प्रणाली छलेर लक्षमा पुगे।

यस आक्रमण केही घण्टा अघिमात्र अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच टेलिफोन वार्तालाप भएको थियो। वार्तापछि ट्रम्पले पुटिनको युद्ध अन्त्य गर्ने इच्छाशक्तिप्रति “गहिरो निराशा” व्यक्त गरेका थिए।

तर मस्कोले भने युद्ध आवश्यक लक्ष्य हासिल नभएसम्म जारी रहने स्पष्ट संकेत दिएको छ। रुसी रक्षा मन्त्रालयले “किभ शासनका आतंकवादी गतिविधिको प्रतिशोधस्वरूप” उक्त ‘विशाल हमला’ गरिएको जनाएको छ।

आक्रमणका मुख्य निशाना किभ नै रहेको युक्रेनी वायुसेनाले बताएको छ। आठ घण्टाभन्दा लामो समय वायु आक्रमणको चेतावनी बजिरह्यो। राष्ट्रपति भोलोदोमिर जेलेन्स्कीले यो हमला युद्धकै “सर्वाधिक देखिने र निष्ठुर हमला” भन्दै कडा शब्दमा आलोचना गरे।

जेलेन्स्कीले सामाजिक सञ्जाल टेलिग्राममा लेखे: “पुटिनसँगको ट्रम्पको कुराकानीपछि यो हमला हुनु आफैंमा प्रमाण हो – रुस युद्ध अन्त्य गर्न चाहँदैन।” उनले अमेरिका लगायतका अन्तर्राष्ट्रिय साझेदारहरूलाई थप प्रतिबन्ध लगाउन र मस्कोमाथि दबाब बढाउन आह्वान गरे।

युक्रेनको आपतकालीन सेवाले सार्वजनिक गरेका भिडियोहरूमा किभका विभिन्न क्षेत्रमा आगो निभाउने दमकलकर्मीहरू देखिन्छन्। विद्यालय, भवन, रेल संरचना र गाडीहरूमा क्षति पुगेको बताइएको छ। पोल्यान्डको विदेश मन्त्रालयले किभस्थित आफ्नो दूतावास पनि क्षतिग्रस्त भएको जनाएको छ।

रुसी आक्रमण सुमी, खार्किभ, दिनिप्रोपेत्रोस्क, चेर्निहिभ लगायतका क्षेत्रमा पनि भएको छ।

रुसको दक्षिणी क्षेत्र रोस्तोभका कार्यवाहक गभर्नरले युक्रेनी ड्रोन आक्रमणमा सीमावर्ती गाउँमा एक महिलाको ज्यान गएको बताएका छन्।

पछिल्ला हप्तामा युक्रेनमा रुसी आक्रमणहरू तीव्र रूपमा बढेका छन्। युद्धविरामका प्रयासहरू ठप्प अवस्थामा छन्।

सन् २०२२ को फेब्रुअरीमा सुरु भएको युद्ध तीन वर्ष नाघिसकेको छ। विगत बिहीबारको टेलिफोन वार्तापछि ट्रम्पले भने, “पुटिनसँगको कुराकानीबाट म निकै निराश छु। उनले युद्ध अन्त्य गर्ने संकेत नै देखाएनन्।”

रुसले भने युद्धका “जरा” उखेल्नुपर्ने अडान दोहोर्‍याएको छ। पुटिनले अघिल्लो साता भनेका थिए, “सम्पूर्ण युक्रेन हाम्रो हो।”

ट्रम्पको टिप्पणीमा प्रतिक्रिया दिँदै पुटिनका प्रवक्ता दिमित्री पेस्कोभले बीबीसीलाई भने, “राजनीतिक–कूटनीतिक माध्यमबाट हाम्रा लक्ष्य प्राप्त नभएसम्म हामी विशेष सैन्य अभियान जारी राख्नेछौं।”

त्यसैबीच, राष्ट्रपति जेलेन्स्कीले वाशिङ्टनबाट अमेरिकी हतियार आपूर्ति रोकिएको विषयमा ट्रम्पसँग कुराकानी गर्ने आशा व्यक्त गरेका छन्। अमेरिकाबाट हवाई सुरक्षा प्रणालीसहितका केही महत्वपूर्ण हतियारहरूको आपूर्ति रोकिँदा युक्रेनको प्रतिरक्षामा गम्भीर असर पर्ने चेतावनी किभले दिएको छ।

ट्रम्पले पत्रकारहरूसँग भने, “हामी अझै केही हतियार दिइरहेका छौं।” उनले पूर्व राष्ट्रपति जो बाइडेनमाथि आरोप लगाउँदै भने, “बाइडेनले देश खाली पारिदिएजस्तो गरी युक्रेनलाई हतियार दिइरहेका छन्, अब हामीले हाम्रो सुरक्षाको लागि पनि केही जोगाउनुपर्छ।”