एलन मस्कको ट्रम्प प्रशासनमा बिताएको समय शुक्रबार ओभल अफिसमा आयोजित पत्रकार सम्मेलनसँगै औपचारिक रूपमा अन्त्य भएको छ। राष्ट्रपति डोनाल्ड ट्रम्प र मस्क दुवैले सरकारी कार्यकुशलता विभाग (DOGE) को कामको प्रशंसा गर्दै मस्क बाहिरिए पनि यसको काम निरन्तर अघि बढ्ने बताएका छन्।

राष्ट्रपति ट्रम्पका अनुसार, “उहाँ साँच्चिकै जाँदै हुनुहुन्न।” उनले थपे, “उहाँ फेरि पनि आउनुहुन्छ।” ट्रम्पले DOGE लाई “मस्ककै बच्चा हो” भन्दै मस्कको यस परियोजनाप्रति समर्पणको प्रशंसा गरे।

DOGE भनेको एउटा औपचारिक सरकारी विभाग नभएर एक सल्लाहकार निकाय हो, जसको उद्देश्य सरकारी खर्च कटौती, करदाताको पैसा बचत गर्ने र अमेरिका राष्ट्रको $३६ ट्रिलियनको ऋण घटाउने हो।

मस्कको DOGE सँगको १३० दिने कार्यकालको अन्त्य उनी विशेष सरकारी कर्मचारी (special government employee) को हैसियतमा अनुमति दिइने अधिकतम अवधिसम्म पुगेपछि भएको हो।

तर मस्कको DOGE सँगको काम निकै विवादास्पद पनि रह्यो। संघीय एजेन्सीहरूमा ठूला संख्यामा कर्मचारी कटौती हुनुका साथै अमेरिकाको प्रमुख वैदेशिक सहायता संस्था USAID का अधिकांश कार्यक्रमहरू खारेज भएपछि आलोचना भएको हो।

त्यसपछि मस्कका आफ्नै कम्पनीहरू समेत आलोचनाको घेरामा परे। टेस्ला विरुद्ध विश्वव्यापी प्रदर्शनहरू भए र बहिष्कारको आह्वान गरियो। जसका कारण कम्पनीको बिक्री पछिल्लो केही वर्षको तुलनामा न्यूनतम तहमा झर्‍यो।

ओभल अफिसमा सञ्चारकर्मीहरूसँग कुरा गर्दै ट्रम्पले भने, “एलनले अत्यन्तै समर्पणका साथ पछिल्लो पुस्ताको सबैभन्दा व्यापक सरकारी सुधार अभियानमा नेतृत्व दिनुभयो।”

DOGE को वेबसाइटअनुसार, मे २९ सम्ममा यस निकायले अमेरिकी सरकारका लागि $१७५ अर्ब जोगाएको दाबी गरिएको छ। यद्यपि BBC को अप्रिल अन्त्यतिरको विश्लेषण अनुसार, तीमध्ये केवल $६१.५ अर्ब मात्र बिवरणसहित देखाइएको छ र प्रमाणसहित बचत देखाइएको रकम करिब $३२.५ अर्ब मात्र हो।

ट्रम्पले दोहोर्‍याउँदै भने, “उहाँ साँच्चिकै जाँदै हुनुहुन्न, फेरि आउने हुनुहुन्छ, धेरै कुरा गर्न लाग्नुहुन्छ।”

मस्कले पनि DOGE ले $१ ट्रिलियन बराबरको खर्च कटौती गर्ने अभियान “अटल रूपमा” जारी राख्ने बताए।

यो भेटघाट केही दिनअघि मात्र CBS सँगको अन्तर्वार्तापछि भएको हो, जहाँ मस्कले ट्रम्पको “बिग, ब्यूटिफुल” विधेयकप्रति निराशा व्यक्त गरेका थिए। उक्त विधेयकमा धेरै ट्रिलियनको कर छुट र रक्षा खर्च बढाउने प्रतिवद्धता समावेश गरिएको छ।

अघिल्लो अन्तर्वार्तामा मस्कले भनेका थिए कि उक्त विधेयकले DOGE को कामलाई “कमजोर बनाउँछ”, तर ओभल अफिसको पत्रकार सम्मेलनमा उनले यसबारे केही प्रतिक्रिया दिएनन्। ट्रम्पले चाहिँ उक्त विधेयकको जोशिलो बचाउ गर्दै भने, “अविश्वसनीय रूपमा काम गर्ने विधेयक हो।”

तर उनले थपे, “दुई कुरा म अझ चाहन्छु — थोरै थप कटौती, र अझ ठूलो कर छुट।”

पत्रकार सम्मेलनमा मस्कलाई अन्य प्रश्न पनि गरियो। जस्तै — “न्युयोर्क टाइम्स” को रिपोर्टअनुसार ट्रम्पको २०२४ को चुनावी अभियानको दौरान मस्क लागूपदार्थ प्रयोग गरिरहेको भन्ने आरोपबारे।

रिपोर्टरले प्रश्न सक्न नपाउँदै मस्कले काटेर जवाफ दिए, “त्यही न्यूयोर्क टाइम्स? अर्काे विषयमा जाऔं।”

त्यसपछि मस्कको आँखाको कालो डल्लोबारे प्रश्न गरियो। जवाफमा उनले हल्का व्यंग्य गर्दै भने, “म फ्रान्स नजिक कतै थिएन,” — फ्रेन्च राष्ट्रपति म्याक्रोन र उनकी पत्नी बीचको पछिल्लो झडपको प्रसंग झिक्दै।

अन्त्यमा मस्कले स्पष्ट पारे, “मैले छोरा X Æ A-12 (X) लाई मजाकमै भनेको थिएँ — मलाई हान् त। अनि उसले हानेको थियो। पाँच वर्षे छोराले हाने पनि यस्तो हुन्छ।”

एलन मस्क शुक्रबार ह्वाइट हाउसको ओभल अफिसमा अमेरिकी राष्ट्रपति डोनाल्ड ट्रम्पसँग अन्तिमपटक भेटघाट गर्न पुगेका थिए। ट्रम्प प्रशासनमा उनको औपचारिक भूमिका समाप्त हुने दिन थियो। तर उनले डोज (DOGE) मा पुर्‍याएको प्रभाव मात्र होइन, उनको दाहिने आँखामुनि देखिएको कालो डल्लोले पनि सबैको ध्यान तान्यो।

प्रत्यक्ष प्रसारण भइरहेका बेला सामाजिक सञ्जालमा तीव्र प्रतिक्रिया आयो। धेरैले मस्कको आँखामुनिको निलो डल्लो देखेपछि जिममा चोट लागेको हो कि त राजनीतिक खटपट भयो भन्ने अनुमान गर्न थाले।

मिडियाले प्रत्यक्ष प्रश्न गर्‍यो – “तपाईंको आँखालाई के भयो?”

DOGE स्टाफिङमा हेरफेर, एलन मस्कको बिदाइ, ह्वाइट हाउसले पुष्टि गर्‍यो

टेस्लाका सीईओ एलन मस्क राष्ट्रपति ट्रम्पसँग ओभल अफिसमा बसेका थिए। मस्कले ट्रम्प प्रशासनमा सरकारी कार्यकुशलता विभाग (DOGE) को नेतृत्व गरिरहेका थिए र अब व्यवसायमा केन्द्रित हुने भन्दै उक्त भूमिका छोड्ने घोषणा गरे।

जवाफमा मस्कले हल्का व्यंग्य गर्दै भने, “म फ्रान्स नजिक कतै थिएन।” उनले हालै फ्रेन्च राष्ट्रपति इम्यानुएल म्याक्रोनलाई उनकी पत्नीले धकेलेको भिडियोतर्फ संकेत गरे।

तर त्यसपछि मस्कले साँचो कथा खुलाए।

“होइन, म मेरो छोरा सानो एक्स (X Æ A-Xii) सँग खेल्दै थिएँ। मैले भनेँ – ‘सिधै मुखमा हान् त।’ अनि उसले हानिदियो। पाँच वर्षे बच्चाले हाने पनि यस्तो असर गर्छ भन्ने थाहा थिएन,” मस्कले भने।

राष्ट्रपति ट्रम्पले तुरुन्तै प्रतिक्रिया दिए, “त्यो चोट एक्सले दिएको हो?”

“हो,” मस्कले जवाफ दिए।

“यदि तपाईं एक्सलाई चिन्नुहुन्थ्यो भने, त्यो उसले गर्न सक्छ भन्ने थाहा पाउनुहुन्थ्यो,” ट्रम्पले हाँस्दै भने।

यो हल्का रमाइलो क्षण मस्कको बिदाइ कार्यक्रममा सबैभन्दा चर्चित बन्यो। सरकारी कार्यकुशलता विभागमा मस्कको १३० दिनको कार्यकाल सकिएको जनाउँदै गरिएको कार्यक्रम त्यो दिनको मुख्य आकर्षण बन्यो।

तर मस्कले आफ्नो सन्देश दिन कहिल्यै चुकेनन्।

“यो DOGE को अन्त्य होइन,” उनले भने, “यो त सुरुवात मात्र हो।”

DOGE को आधिकारिक वेबसाइटमा मे २६ को अद्यावधिकअनुसार मस्कको कार्यकालमा विभागले करिब १७५ अर्ब डलर जति जोगाएको छ। त्यो मुख्यतया सम्पत्ति बिक्री, ठेक्का रद्द गर्ने र ठगी नियन्त्रणमार्फत सम्भव भएको हो। त्यसले करदाताको लागि प्रति व्यक्ति औसत $1,087 को बचत गराएको अनुमान छ।