काठमाडौं । नेपाली गीत–संगीत क्षेत्रमा क्रियाशील स्रष्टा, कलाकार, प्राविधिक तथा संगीतकर्मीहरूको योगदानको सम्मान गर्दै आयोजित ‘१३औँ म्युजिकखबर म्युजिक अवार्ड–२०८२’ भव्य रूपमा सम्पन्न भएको छ। विगत १३ वर्षदेखि निरन्तर आयोजना हुँदै आएको अवार्ड समारोह यस वर्ष काठमाडौंको बालुवाटारमा सम्पन्न भएको हो। ‘अग्रजलाई सम्मान, अनुजलाई प्रोत्साहन’ भन्ने मूल नारासहित आयोजित कार्यक्रममा वर्षभर उत्कृष्ट योगदान दिएका कलाकार तथा स्रष्टालाई विभिन्न ३३ विधामा सम्मान तथा अवार्ड प्रदान गरिएको थियो।

म्युजिकखबरको प्रस्तुति तथा शुभकामना मिडिया सोलुसन्सको आयोजनामा सम्पन्न कार्यक्रममा नेपालका प्रथम उपराष्ट्रपति परमानन्द झा प्रमुख अतिथिका रूपमा सहभागी भएका थिए। अवार्ड सल्लाहकार राधेश्याम लेकालीको सभापतित्वमा सम्पन्न कार्यक्रममा चलचित्र विकास बोर्डका अध्यक्ष दिनेश डीसी, वरिष्ठ कवि तथा पूर्वमन्त्री एसपी कोइराला, वरिष्ठ कलाकार निर्देशक मोहन निरौला, अन्तराष्ट्रिय कलाकार मंच अमेरिका का अध्यक्ष एबम वरिष्ठ लोक दोहोरी गायक, कलाकार तथा अग्रज पत्रकार राम प्रसाद खनाल, वरिष्ठ संगीतकार शक्तिबल्लभ, गीतकार चूडामणि देवकोटा, गीतकार संघ नेपालका अध्यक्ष बसन्त वित्यासी थापा, वरिष्ठ गायिका देविका बन्दना, वरिष्ठ लोक गायक प्रेम राजा महत लगायत चलचित्र, साहित्य तथा संगीत क्षेत्रका विशिष्ट व्यक्तित्वहरूको उपस्थिति रहेको थियो।

यस वर्षको ‘म्युजिकखबर दीर्घ साधना सम्मान–२०८२’ नेपाली संगीतका वरिष्ठ संगीतकार शम्भुजीत बासकोटालाई प्रदान गरिएको छ। नेपाली संगीत क्षेत्रमा दशकौँदेखि पुर्‍याएको अतुलनीय योगदानको कदरस्वरूप उहाँलाई दोसल्ला, सम्मानपत्र तथा नगद रु. ५१ हजार सहित सम्मान गरिएको हो। सम्मान समारोहमा गायिका टीका प्रसाईंले शम्भुजीत बासकोटाका चर्चित सिर्जनाहरू प्रस्तुत गर्दै विशेष सांगीतिक श्रद्धाञ्जली अर्पण गरेकी थिइन्।

त्यसैगरी ३५ वर्षभन्दा लामो समयदेखि गीत–संगीत र साहित्य क्षेत्रमा सक्रिय रहेकी गीतकार उन्नती शीला बोहरालाई ‘म्युजिकखबर शब्दशीला विशिष्ट सम्मान’ प्रदान गरिएको छ। नेपाली गीत–संगीतमा दुई दशकभन्दा बढी समयदेखि निरन्तर योगदान पुर्‍याएका वरिष्ठ गीतकार विजय शिवाकोटीलाई ‘म्युजिकखबर रजत संगीत सम्मान’ अर्पण गरिएको थियो।

हरेक वर्ष प्रदान गरिने ‘म्युजिकखबर दशक संगीत सम्मान’ यस वर्ष लोकप्रिय गायक शिव परियार र गायिका कालिका रोका मगरलाई प्रदान गरिएको छ। युवा पुस्ताका स्रष्टालाई प्रोत्साहन गर्ने उद्देश्यले गीतकार पुरुषोत्तम सानु र सुशिला पौडेललाई युवा संगीत सम्मान प्रदान गरियो।

प्रवासमा बसेर पनि नेपाली गीत–संगीतको सिर्जनामा निरन्तर सक्रिय रहेकी अमेरिकावासी गीतकार पुष्पा खनाललाई डायस्पोरा संगीत सम्मान प्रदान गरिएको छ। त्यसैगरी प्रवासमै रहेर गायन क्षेत्रमा योगदान पुर्‍याउँदै आएकी गायिका नीता आचार्यलाई डायस्पोरा गायन सम्मान प्रदान गरियो।

संगीत पत्रकारितामा उल्लेखनीय योगदान पुर्‍याएका पत्रकार कुवेर गिरी र गोपीकृष्ण चापागाईंलाई जनही रु. ५,५५५ सहित म्युजिकखबर संगीत पत्रकारिता सम्मान प्रदान गरिएको थियो। प्रतिभाशाली बाल कलाकार युनिश घिमिरेलाई बाल प्रतिभा सम्मान, डा. रणजित झालाई संगीतकर्मी सम्मान तथा सञ्चार प्राविधिक क्षेत्रमा योगदान पुर्‍याएका उदयराज शर्मालाई सञ्चारकर्मी सम्मान प्रदान गरिएको आयोजकले जनाएको छ।

लोकप्रिय गीतकार लोकराज अधिकारीको संयोजकत्वमा वरिष्ठ गीतकार तथा संगीतकार कस्तुप पन्त र लोकप्रिय गायिका देवी घर्ती सम्मिलित निर्णायक मण्डलले विभिन्न ३३ विधाका उत्कृष्ट विजेता छनोट गरेको थियो।

सुगम संगीततर्फ ‘हृदयमा’ गीतबाट प्रविन बेडवाल उत्कृष्ट गायक तथा ‘गुन भुल्यौ’ गीतबाट सारिका घिमिरे उत्कृष्ट गायिका घोषित भए। डम्बर याक्सो ‘मुस्कान छैन आज’ गीतबाट उत्कृष्ट गीतकार तथा शंकर थापा ‘स्माइल’ ‘मेरा सुरहरू’ गीतबाट उत्कृष्ट संगीतकार घोषित भए। सरला श्रेष्ठ उत्कृष्ट महिला गीतकार तथा मनोज खड्का उत्कृष्ट डायस्पोरा गीतकार बने।

संगीत संयोजनतर्फ नरेन्द्र वियोगी, महिला भिडियो मोडलतर्फ झरना रिसाल, पुरुष भिडियो मोडलतर्फ सुरेश कोह्ली, छायांकनतर्फ अजय रेग्मी, सम्पादनतर्फ पदम सुवेदी, निर्देशनतर्फ राहुल शाह तथा ध्वनि सम्पादनतर्फ नरेश बीबीसी उत्कृष्ट घोषित भए।

युगल गायनतर्फ कर्णराज गिरी र कमला रेग्मी विजेता बने भने राष्ट्रिय भावको गीततर्फ सुरेन्द्र खड्का सम्मानित भए। पप संगीततर्फ विनय कार्की क्षेत्री, रविन श्रेष्ठ र आश्रा कुँवर क्रमशः उत्कृष्ट संगीतकार, गायक र गायिका घोषित भए।

चलचित्र संगीततर्फ ‘लाज शरणम्’ चलचित्रको गीतबाट सुरज पण्डित उत्कृष्ट पार्श्वगायक तथा ‘ऊनको स्वीटर’ चलचित्रको ‘फकाउँछ काफ्ले’ गीतबाट झुमा लिम्बु उत्कृष्ट पार्श्वगायिका घोषित भइन्। चलचित्र संगीतकारतर्फ थानेश्वर गौतम तथा चलचित्र गीतकारतर्फ युवराज काफ्ले सम्मानित भए।

लोकदोहोरीतर्फ अर्जुन सापकोटा उत्कृष्ट गायक तथा लक्ष्मी आचार्य उत्कृष्ट गायिका घोषित भए। भाकातर्फ नवीन परियार, शब्दतर्फ प्रसाद लामिछाने, भिडियो मोडलतर्फ पल शाह र नारायणी खत्री, निर्देशनतर्फ दीप गुरुङ, नवप्रतिभातर्फ रेखा पोख्रेल र मनोहर शर्मा, तथा कल्चरल गायनतर्फ सुशीला गौतम उत्कृष्ट घोषित भए।

यसैगरी जुरी अवार्ड गीतकारतर्फ कल्याण श्रेष्ठ, राष्ट्रिय भाव गीतकारतर्फ पारसमणि बराल, आधुनिक गीतकारतर्फ केशव भट्टराई, गायकतर्फ छिरिङ भुटिया, संगीतकारतर्फ बीबी अनुरागी तथा क्रिटिक्स अवार्ड पप गायनतर्फ सुनिल उप्रेती सम्मानित भए।

लोकप्रिय उद्घोषक मञ्जु पौडेल र निराजन भण्डारीले सञ्चालन गरेको समारोहमा टीका प्रसाईं, धिरज राई, देवान खनाल, पल शाह, नारायणी खत्री, युनिश घिमिरे लगायतका कलाकारहरूले सांगीतिक प्रस्तुति दिएका थिए।

विगत १३ वर्षदेखि निरन्तर आयोजना हुँदै आएको म्युजिकखबर म्युजिक अवार्डले नेपाली गीत–संगीत क्षेत्रमा योगदान पुर्‍याएका स्रष्टा, कलाकार, प्राविधिक, पत्रकार तथा प्रवासी नेपाली प्रतिभाहरूलाई सम्मान गर्दै नयाँ पुस्तालाई सिर्जनात्मक यात्रामा प्रेरित गर्ने आफ्नो उद्देश्यलाई निरन्तरता दिएको आयोजकले जनाएको छ।