वासिङ्टन डी.सी. / अमेरिकामा जारी सरकारी आंशिक बन्दका कारण विमानस्थलहरूमा देखिएको गम्भीर अव्यवस्था नियन्त्रण गर्न राष्ट्रपति डोनाल्ड ट्रम्पले नयाँ कदम चालेका छन्। उनले गृह सुरक्षा विभागअन्तर्गतको Transportation Security Administration (यातायात सुरक्षा प्रशासन) का कर्मचारीहरूलाई तुरुन्त पारिश्रमिक भुक्तानी गर्न निर्देशन दिने कार्यकारी आदेश जारी गर्ने घोषणा गरेका हुन्।

ट्रम्पले सामाजिक सञ्जालमार्फत उक्त निर्णय सार्वजनिक गर्दै विमानस्थलमा देखिएको समस्या “राष्ट्रिय आपतकालीन अवस्था” जस्तै भएको बताएका छन्। उनले डेमोक्रेट पार्टीलाई आप्रवासन कार्यान्वयनका लागि बजेट नदिएको आरोप लगाउँदै विमानस्थलमा देखिएको अव्यवस्थाको जिम्मेवार ठहर गरेका छन्।

४१ दिनदेखि जारी गृह सुरक्षा विभागको बजेट विवादका कारण हजारौँ सुरक्षा कर्मचारीहरूले पारिश्रमिक पाउन सकेका छैनन्। यसले देशभरका विमानस्थलहरूमा लामो लाइन, उडान ढिलाइ तथा सयौँ यात्रुहरूले उडान छुटाउने अवस्था सिर्जना गरेको छ।

यसबीच, सिनेटमा डेमोक्रेट र रिपब्लिकनबीचको वार्ता निष्कर्षमा पुग्न सकेको छैन। रिपब्लिकन नेताहरूले “अन्तिम प्रस्ताव” प्रस्तुत गरे पनि सहमति बन्न नसकेपछि वार्ता थप जटिल बनेको छ।

रिपब्लिकनहरूले डेमोक्रेटहरू वार्तामा गम्भीर नभएको आरोप लगाएका छन् भने डेमोक्रेट नेताहरूले भने निरन्तर वार्ता भइरहेको दाबी गरेका छन्। दुवै पक्षबीचको मतभेद मुख्यतः आप्रवासन कार्यान्वयन बजेट र नीतिमा केन्द्रित रहेको बताइएको छ।

सरकारी बन्द लम्बिँदै जाँदा यात्रुहरू र कर्मचारीहरू दुवै प्रभावित भइरहेका छन्। यद्यपि, ट्रम्प प्रशासनले सुरक्षा कर्मचारीलाई तत्काल भुक्तानी गरेर कम्तीमा विमानस्थलको सेवा सामान्य बनाउने प्रयास गरेको जनाएको छ।

यसै बीच  ट्रम्पले इरानका ऊर्जा संरचनामाथि गरिने सम्भावित आक्रमणलाई थप १० दिनका लागि स्थगित गरिएको बताएका छन्। उनका अनुसार तेहरानसँग “वार्ता जारी” रहेको कारण तत्काल आक्रमण नगर्ने निर्णय गरिएको हो। यसअघि यस्तो आक्रमणको समयसीमा शुक्रबार सकिने तय गरिएको थियो।

वार्ताबारे बोल्दै ट्रम्पले युद्ध रोक्ने जिम्मेवारी इरानी नेतृत्वकै भएको बताएका छन्। उनले आफूलाई कुनै सम्झौता गर्न खास चासो नभएको संकेत दिँदै इरानले नै विश्वास दिलाउनुपर्ने धारणा राखेका छन्।

यता, इरानी सरकारी सञ्चारमाध्यमले भने अमेरिकाको वार्ताप्रतिको प्रतिबद्धतामाथि “पूर्ण शंका” रहेको जनाएको छ। यसले दुवै देशबीचको विश्वासको अभाव अझै गहिरो रहेको संकेत गर्छ।

यसैबीच, Islamic Revolutionary Guard Corps (इस्लामिक रिभोलुसनरी गार्ड कोर्प्स) अन्तर्गतको नौसेनाका प्रमुखको मृत्यु भएको खबर सार्वजनिक भएको छ। इजरायलका रक्षा मन्त्रीका अनुसार होर्मुज जलडमरु मार्गमा लगभग पूर्ण नाकाबन्दी गराउने प्रमुख योजनाकार मानिएका उक्त कमाण्डर मारिएका हुन्।

विश्वकै महत्वपूर्ण तेल आपूर्ति मार्ग मानिने होर्मुज जलडमरु क्षेत्रमा उत्पन्न यो अवस्था विश्व ऊर्जा बजार र क्षेत्रीय सुरक्षामा गम्भीर असर पार्न सक्ने विश्लेषण गरिएको छ।