वासिङ्टन/ संयुक्त राज्य अमेरिकाले भेनेजुएलाको तट नजिकबाट एउटा विशाल तेल ट्यांकर नियन्त्रणमा लिएको दाबी गरेको छ। ह्वाइट हाउसमा आयोजित एक कार्यक्रममा बोल्दै अमेरिकी राष्ट्रपति डोनाल्ड ट्रम्पले उक्त ट्यांकर हालसम्म अमेरिका द्वारा जफत गरिएको सबैभन्दा ठूलो जहाज भएको बताएका छन्। उनका अनुसार अमेरिकी सुरक्षाफौजले भेनेजुएलाको तट क्षेत्रमा ठूलो स्तरको सैन्य कारबाही गर्दै उक्त ट्यांकर नियन्त्रणमा लिएको हो। “हामीले भेनेजुएलाको तटमा एउटा विशाल ट्यांकर जफत गरेका छौँ, यो अहिलेसम्मकै सबैभन्दा ठूलो हो,” ट्रम्पले पत्रकारहरूसँग भने।

अमेरिकाकी महान्यायाधिवक्ता पाम बोन्डीले सामाजिक सञ्जालमार्फत सार्वजनिक गरेको भिडियोमा हेलिकप्टरबाट अमेरिकी सैनिकहरू उक्त जहाजमा उत्रँदै गरेको दृश्य देखिएको छ। उनले उक्त जहाज लामो समयदेखि प्रतिबन्धमा रहेको र “विदेशी आतङ्कवादी सङ्गठनलाई सहयोग गर्ने अवैध तेल ढुवानी सञ्जालमा संलग्न” रहेको आरोप लगाएकी छन्। सीबीएस न्युजलाई अमेरिकी सेनाका एक उच्च अधिकारीले दिएको जानकारीअनुसार ‘द स्किपर’ नाम दिइएको उक्त ट्यांकर नियन्त्रणमा लिने अपरेसनमा दुईवटा हेलिकप्टर, कोस्ट गार्डका १० सदस्य, १० जना मरीन र विशेष फौज सहभागी थिए। अपरेसन अमेरिकी युद्धपोतबाट सञ्चालन गरिएको बताइएको छ। स्रोतका अनुसार रक्षा सचिव पिट हेगसेथ यस कारबाहीबारे पूर्ण रूपमा जानकार थिए र ट्रम्प प्रशासनले यस्तै थप कारबाहीबारे पनि विचार गरिरहेको छ।

यो घटना अमेरिका पछिल्ला हप्ताहरूमा क्यारिबियन क्षेत्रमा आफ्नो सैन्य उपस्थिति बढाइरहेको सन्दर्भमा भएको हो। अमेरिकाले यो तैनाथी लागूऔषध तस्करीविरुद्धको अभियानको हिस्सा भएको बताउँदै आएको छ।

यस घटनापछि अन्तर्राष्ट्रिय तेल बजारमा असर देखिएको छ। बुधबार तेल आपूर्ति छोटो अवधिमा प्रभावित हुन सक्ने आशङ्काले ब्रेन्ट क्रुडको मूल्य ०.४ प्रतिशतले बढेर प्रतिब्यारेल ६२.२१ अमेरिकी डलरमा बन्द भएको छ। यद्यपि अमेरिकामा पेट्रोल मूल्य अझै बहुवर्षीय न्यूनतम तहमै रहेको जनाइएको छ।

यता भेनेजुएलाले भने अमेरिकाले आफ्ना राष्ट्रपति निकोलस मादुरोलाई सत्ताच्युत गर्ने प्रयास गरिरहेको आरोप लगाएको छ। ट्यांकर नियन्त्रणमा लिइएको समाचार सार्वजनिक हुनुअघि नै आयोजित एक सम्बोधनमा राष्ट्रपति मादुरोले अमेरिका–भेनेजुएला सम्बन्धमा बढ्दो तनावबारे प्रतिक्रिया दिएका थिए।

उक्त कार्यक्रममा मादुरोले अमेरिकी हस्तक्षेपको आलोचना गर्दै भेनेजुएला फेरि कहिल्यै “तेल उपनिवेश” नबन्ने घोषणा गरे। उनले युद्धको विरोध गर्ने अमेरिकी नागरिकलाई सन्देश दिंदै सन् १९८८ को चर्चित गीत गाएर “युद्ध होइन, शान्ति” को आह्वानसमेत गरे।

मादुरोले अमेरिका भेनेजुएलाको तेल चाहन्छ भने अन्तर्राष्ट्रिय कानुनको सम्मान गर्नुपर्ने स्पष्ट पारे। यद्यपि उनले आफूले भाषण गर्दा ट्यांकर जफतको जानकारी पाएका थिए वा थिएनन् भन्ने अझै स्पष्ट छैन।

अमेरिकी राष्ट्रपति ट्रम्पले आफूले मादुरोसँग गत महिना यता कुनै संवाद नगरेको पनि स्वीकार गरेका छन्। क्यारिबियन क्षेत्रमा अमेरिकी सैन्य गतिविधि बढ्दै जाँदा दुवै देशबीचको सम्बन्ध झनै चिसिँदै गएको देखिन्छ।