अमेरिकाका होमल्याण्ड सेक्युरिटी सेक्रेटरी क्रिस्टी नोएमले केही देशहरूमाथि कडा यात्रा प्रतिबन्ध सिफारिस गर्ने घोषणा गरेकी छिन्। उनका अनुसार ती देशहरूले “अमेरिका अपराधले भरिरहेका छन्।”

सोमबार सामाजिक सञ्जालमार्फत नोएमले राष्ट्रपति डोनाल्ड ट्रम्पसँग भेट गरेकाे जानकारी दिँदै भनिन्— “हत्यारा, चिप्ला अपराधी र अमेरिकाको अवसर दुरूपयोग गर्नेहरूको बाढी ल्याइरहेका सबै देशहरूमाथि पूर्ण यात्रा प्रतिबन्ध सिफारिस गर्नेछु।”

ट्रम्प र डिपार्टमेन्ट अफ होमल्याण्ड सेक्युरिटीले उनको पोस्टलाई आधिकारिक पेजबाट पुनः शेयर गरेका छन्। तर प्रतिबन्ध कुन–कुन देशमा लागू हुने वा कहिलेदेखि लागू हुने भन्ने जानकारी भने सार्वजनिक गरिएको छैन।

ह्वाइट हाउसकी प्रेस सेक्रेटरी क्यारोलिन लेभिटले फक्स न्युजसँग भने कि ट्रम्पले केही महिना अगाडि नै “थर्ड वर्ल्ड र फेल्ड स्टेट” देशहरूमा यात्रा प्रतिबन्धको घोषणा गरिसकेका थिए, र नोएमको प्रस्तावले त्यसलाई अझ्‍ै विस्तारित गर्नेछ।

जुन ४ मा ह्वाइट हाउसले अफ्रिका, मध्यपूर्व र क्यारिबियनका १९ देशलाई आंशिक वा पूर्ण आव्रजन प्रतिबन्धको सूचीमा राखेको थियो।

नोएमको टिप्पणी वाशिङ्टन डीसीमा गत बुधबार दुई नेशनल गार्ड सदस्यमाथि गोली प्रहार भएको केही दिनमै आएको हो। गोली हानेको आरोपमा पक्राउ परेका व्यक्ति २०२१ मा ‘अपरेशन एलाइज वेलकम’ अन्तर्गत अमेरिका भित्रिएका अफगान नागरिक रहेको अधिकारीहरूले पुष्टि गरेका छन्।

यो कार्यक्रम बाइडेन प्रशासनले अफगानिस्तानमा अमेरिकी सेनासँग काम गरेका स्थानीयहरूलाई उद्धार गर्न ल्याएको थियो। तर संदिग्धको मानसिक स्वास्थ्यसम्बन्धी समस्या अमेरिकामा आएपछि बढ्दै गएको इमेलहरूमा पुष्टि भएको बीबीसी साझेदार सिबिएस न्युजले जनाएको छ।

गोलीकाण्डमा २० वर्षीया साराह बेक्स्ट्रोमको मृत्यु भएको छ भने २४ वर्षीया एन्ड्र्यू वुल्फ गम्भीर घाइते अवस्थामा अस्पतालमा छन्।

घटनापछि ट्रम्प प्रशासनले आव्रजन कार्यवाही झनै कडा बनाएको छ। आश्रयका सबै निवेदन रोकिएका छन्। यूएस सिटिजनसिप एन्ड इमिग्रेशन सर्भिसेसका निर्देशक जोसेफ एड्लोका अनुसार प्रक्रिया “सबै बाह्य नागरिकको सम्भव भएसम्म गहिरो जाँच गर्न सकिन्छ” भन्ने सुनिश्चित नभएसम्म नखुल्नेछ।

ट्रम्पले एड्लोलाई १९ देशबाट अघिल्लो वर्ष ग्रीन कार्ड पाएका व्यक्तिहरूको पुनः समीक्षा गर्न निर्देशन दिएका छन्।

बिहीबार ट्रम्पले “थर्ड वर्ल्ड देशहरूबाट हुने आप्रवासन स्थायी रूपमा रोक्न सकिन्छ” भन्दै बयान दिए। थ्याङ्क्सगिभिङ सन्देशमा उनले “अमेरिकी समाजमा बिगार ल्याउने शरणार्थीहरू” भन्दै कडा टिप्पणी गरेका थिए।

ट्रम्पको दोस्रो कार्यकालमा अवैध आप्रवासीको सामूहिक निकाला, शरणार्थी कोटा कटौती, र अमेरिकामा जन्मिने धेरै बालबालिकामा लागू हुने स्वतः नागरिकता अधिकार अन्त्य गर्ने प्रयास भइरहेका छन्।

अमेरिकास्थित अफगान कम्युनिटी कोएलिसनले गोलीकाण्डप्रति दुःख व्यक्त गर्दै विस्तृत छानबिनको माग गरेको छ र “एक व्यक्तिको अपराधका आधारमा अफगान आप्रवासन स्थगित गर्नु अन्याय हुने” बताएको छ।

उनीहरूले “२० वर्ष लामो अफगान–अमेरिका साझेदारी बिर्सनु हुँदैन” भन्दै सरकारले सहयोगी अफगानहरूको दाबी नरोकिने आग्रह गरेका छन्।

संयुक्त राष्ट्रसंघले पनि अमेरिका शरणार्थीसम्बन्धी अन्तर्राष्ट्रिय कानुन र दायित्वहरू पालन गर्नुपर्ने स्मरण गराएको छ।

उता अमेरिकी नौसेनाद्वारा भेनेजुएलाको भनिएको ‘ड्रग बोट’माथि गरिएको दोस्रो ‘डबल ट्याप’ हवाई आक्रमणले वाशिङ्टन डीसीमा ठूलो राजनीतिक विवाद जन्माएको छ।

ह्वाइट हाउसले एड्मिरल फ्र्यांक ब्राडलीले २ सेप्टेम्बरकाे आक्रमण आफ्नो कानुनी अधिकारभित्रै रही गरेको दाबी गरेको छ। तर पहिलो विस्फोटबाट बाँचेकै दुई व्यक्तिलाई दोस्रो प्रहारले मारिएको रिपोर्ट सार्वजनिक भएपछि अमेरिकी कांग्रेसका दुवै दलले छानबिन सुरु गर्ने घोषणा गरेका छन्।

रक्षा मन्त्री पिट हेगसेथले ‘सबैलाई मार’ भन्ने आदेश दिएको दाबी अस्वीकार गर्दै आरोपहरूलाई बनावटी भनेका छन्।

सेप्टेम्बरयताका यस्ता आक्रमणमा क्यारिबियन क्षेत्रमा ८० भन्दा बढी मानिस मारिएका छन्। अमेरिकी अधिकारीहरूले यी कार्यहरू लागूऔषध तस्करी रोक्ने स्व–रक्षात्मक कदम भएको बताउँदै आएका छन्।

अन्तर्राष्ट्रिय कानुनी विज्ञहरूले दोहोरो प्रहार घाइते र उद्धारयोग्य व्यक्तिमाथिको अवैध लक्ष्यबद्धता हुन सक्ने चेतावनी दिएका छन्।

भेनेजुएलाली संसदले अमेरिकी कार्यवाहीलाई कडा रूपमा निन्दा गर्दै छानबिन गर्ने बताएको छ। यसैबीच भेनेजुएलाका राष्ट्रपति निकोलास मादुरोलाई पदत्यागका लागि ट्रम्पले फोनमार्फत दबाब दिएको खुलासा पनि सार्वजनिक भएको छ।

अमेरिकी अधिकारीहरूले मादुरोलाई ‘कार्टेल अफ द सन्स’ नामक उच्चस्तरीय तस्करी नेटवर्कका सदस्य भएको आरोप लगाएका छन्, जसलाई मादुरोले खारेज गरेका छन्।