कवि प्रेम संग्रौलाको कविता संग्रह ‘पासपोर्ट’ अमेरिकामा आयोजित एक भव्य तथा भावनात्मक समारोहमार्फत सार्वजनिक गरिएको छ। कार्यक्रम साहित्य, कला र समुदायका विशिष्ट व्यक्तित्वहरूको उपस्थितिमा उत्साहपूर्ण रूपले सम्पन्न भयो।

कार्यक्रमको सुरुमा मञ्जु संग्रौलाले स्वागत मन्तव्य राख्दै सबै आगन्तुक प्रति आभार प्रकट गरिन्। सभाको सञ्चालन सहदेव पौडेलले गरेका थिए भने डा. हरिराज भट्टराईले सभाध्यक्षता ग्रहण गर्दै कवितासंग्रहबारे आफ्ना धारणा व्यक्त गरे। त्यसपछि वसन्त श्रेष्ठ, गोपाल रेग्मी र सुदीपभद्र खनालले कवितासंग्रहको विस्तृत समीक्षा प्रस्तुत गरे। नेपाली दूतावास वाशिङ्टन डीसीका ब्रिगेडियर जनरल पूर्ण प्रसाद ढकालले कवि संग्रौलालाई बधाई तथा शुभकामना दिए। समीक्षक हरी घिमिरेको समीक्षा नोट सहदेव पौडेलले वाचन गरे।

कार्यक्रमको दोस्रो भागमा विभिन्न व्यक्तिहरूले पुस्तकभित्रका आफूलाई मन परेको कविता वाचन गरे। कविता वाचन गर्नेहरूमा अनुश्री संग्रौला, मनस्वी संग्रौला, एलियट एम्क्राउट, डा. अनिल रेग्मी, सत्यराज आचार्य, श्यामसुन्दर, शारदा कार्की बुढाथोकी, कविता घिमिरे लगायत थिए। खेम संग्रौलाले गीत प्रस्तुत गरेर कार्यक्रमलाई झनै रमाइलो बनाइदिए। समय अभावका कारण वाचन गर्न नसक्ने साथीहरूसँग आयोजकद्वारा क्षमायाचना गरियो।

कवि प्रेम संग्रौलाले कार्यक्रमको अन्त्यमा उपस्थित सबै अतिथिहरू, परिवारजन, मित्र तथा साहित्यप्रेमीहरू प्रति गहिरो आभार प्रकट गरे। उनले कवितासंग्रह सफलतापूर्वक सार्वजनिक गर्न श्रीमती मञ्जु संग्रौलाको विशेष योगदान रहेको बताउँदै, आफू लेख्ने सबै कविताको पहिलो श्रोता तथा समीक्षक उनी नै रहेको उल्लेख गरे। उनले छोरीहरू, परिवारका सदस्यहरू, सरप्राइज भिडियो पठाउने ठूली छोरी र ज्वाइँ, आकस्मिक व्यवस्थापन गर्ने अनु, र सबै स्वयंसेवकप्रति कृतज्ञता व्यक्त गरे।

कार्यक्रममा ईनेपालीज डटकम, सगरमाथा टिभी, इन्जा, डीसी नेपाल लगायतका मिडियाहरूको उपस्थिति र समर्थन उल्लेखनीय रह्यो। त्यस्तै, महामहावाणिज्यदूत प्रेमराजा महत, ब्रिगेडियर जनरल पूर्ण प्रसाद ढकाल, साथै पुस्तकको भूमिका लेख्ने र प्रकाशन व्यवस्थापनमा योगदान दिने साहित्यकार कृष्ण धरावासीप्रति पनि उनले धन्यवाद ज्ञापन गरे। उहाँले प्रत्यक्ष र परोक्ष रूपमा सहयोग गर्ने सबैप्रति धन्यवाद व्यक्त गर्दै, नाम छुटेमा क्षमायाचना गर्दै कार्यक्रम समापन गरिएको घोषणा गरे।