डेमोक्र्याट माइकी शेरेल न्युजर्सीको गभर्नर चुनीएकी छन्। यससँगै न्युजर्सीमा डेमोक्र्याट पार्टीले सत्ताको निरन्तरता कायम राखेको छ त्यो पनि ५० वर्षपछि पहिलोपटक दुई कार्यकालभन्दा धेरै समयसम्म एकै पार्टीले गभर्नर पद सम्हाल्ने गरी।  ५३ वर्षीया शेरेल राज्यको इतिहासमा पहिलो महिला डेमोक्र्याट गभर्नर बन्ने भएकी छन्। उनले रिपब्लिकन उम्मेदवार तथा ट्रम्प समर्थक ज्याक सियाटरेलीलाई पराजित गरिन्, जो गभर्नरका लागि तेस्रो पटक प्रतिस्पर्धामा उत्रिएका थिए।

शेरेलले आफ्नो चुनावी अभियानमा राष्ट्रपति डोनाल्ड ट्रम्पको नीतिहरूको कडा विरोधलाई प्रमुख सन्देशका रूपमा प्रस्तुत गरिन्। उनले लगातार सियाटरेलीको अभियानलाई ट्रम्पसँग जोड्दै उनले सहर र राज्यको प्राथमिक मुद्दा — जिवनयापन खर्च, बिद्युत तथा सेवा शुल्कको महंगी  बेवास्ता गरेको आरोप लगाइन्।

अमेरिकामा २०२५ को ‘अफ–इयर’ चुनाव सम्पन्न भएसँगै विभिन्न राज्य र सहरमा भएका निकालाहरूले आगामी राजनीतिक वातावरणको संकेत दिइरहेका छन्। न्यूयोर्क सहरमा जोह्रान ममदानी मेयर निर्वाचित भएपछि राष्ट्रिय तथा अन्तर्राष्ट्रिय स्तरमा प्रतिक्रियाहरू आउन थालेका छन्। ममदानी सहरका पहिला मुस्लिम मेयर तथा एक शताब्दीभन्दा बढी समयपछि सहरको सबैभन्दा युवा नेतृत्वका रूपमा अघि आएका हुन्।

न्यूजर्सीमा, डेमोक्र्याट मिकी शेरेल गभर्नरमा निर्वाचित भइन्। उनले रिपब्लिकन उम्मेदवार ज्याक सियाटरेलीलाई पराजित गर्दै राज्यमा डेमोक्र्याटको पकड पुनः सुदृढ बनाइन्।

क्यालिफोर्नियामा प्रपोजिशन ५० पारित भएको छ, जसलाई “चुनाव धाँधली प्रतिक्रिया ऐन” नाम दिइएको छ। यस प्रस्तावका समर्थकहरूले यसलाई रिपब्लिकनद्वारा अन्य राज्यमा गरिएको निर्वाचन क्षेत्र पुनर्सीमानांकन (gerrymandering) को प्रतिरोधका लागि आवश्यक कदम भनेका छन्।

यसैबीच, पेन्सिलभेनियाको सर्वोच्च अदालतमा पनि डेमोक्र्याटमै निरन्तरता रहने भएको छ। न्यायाधीश क्रिस्टिन डोनोह्यू, केभिन डफर्टी र डेभिड वेच्ट पुनःपुष्टि चुनावमा विजयी भए।

यो निर्वाचनमा अमेरिकी मतदाताहरू सामान्य वर्षभन्दा निकै ठूलो संख्यामा मतदान केन्द्र पुगेका देखिन्थे। मतदाता सहभागिताबाट स्थानीय मुद्दाहरू, जीवनयापन खर्च, सार्वजनिक सेवासम्बन्धी सुधार र संघीय सरकारसँगको सम्बन्ध जस्ता विषयमा नागरिकको उच्च चासो प्रस्ट देखियो।

यता, वाशिङ्टनमा भने विवाद सुरु भइसकेको छ। ह्वाइट हाउस प्रेस सेक्रेटरी क्यारोलाइन लेभिटले प्रेस ब्रीफिङमा क्यालिफोर्नियामा मेल–इन मतपत्रहरू अवैध आप्रवासी र अन्य व्यक्तिका नाममा भरिँदै गरेको दाबी गरिन्।
राज्य अधिकारीहरूले भने यो आरोपलाई राजनीतिक उद्देश्यपूर्ण र प्रमाणविहीन भन्दै अस्वीकार गरेका छन्।

अमेरिकामा २०२५ को निर्वाचन परिणामले डेमोक्र्याटहरूले शहरी र प्रगतिशील क्षेत्रहरूमा बलियो समर्थन पाउन थालेको संकेत गरेको छ।
उता, रिपब्लिकनहरू संघीय स्तरमा सत्तामा रहेको कारण आगामी संघीय–राज्य सम्बन्ध, बजेट वितरण र नीति कार्यान्वयनमा तीव्र राजनीतिक रस्साकस्सी हुने आकलन गरिँदैछ।

न्यूयोर्कमा ममदानीको मेयर कार्यकालले विशेषगरी आवास संकट, धनी–गरिब विभाजन, संघीय प्रशासनसँगको टकराव र सहरको आर्थिक पुनर्सन्तुलनमा कसरी प्रगति गर्छ — अब यही कुराले राष्ट्रव्यापी ध्यान तान्नेछ।

हिलारी क्लिन्टनले ममदानीको जित र डेमोक्र्याटहरूको विजयी रातलाई ‘ऐतिहासिक’ भन्दै बधाई दिइन्

अमेरिकाकी पूर्व प्रथम महिला, पूर्व सिनेटर, पूर्व विदेश मन्त्री तथा डेमोक्र्याटिक पार्टीकी प्रभावशाली नेतृ हिलारी क्लिन्टनले मंगलबार भएको निर्वाचनमा डेमोक्र्याट उम्मेदवारहरूले दर्जनौँ महत्वपूर्ण जित दर्ज गरेपछि सामाजिक सञ्जालमार्फत खुशी प्रकट गरेकी छिन्। क्लिन्टनले भनेकी छन्, “आजको रात डेमोक्र्याटिक महिलाहरूले इतिहास रचेका छन्।
अबिगेल स्पानबर्गर भर्जिनियाकी पहिलो महिला गभर्नर हुनेछिन्।
मिकी शेर्ल न्युजर्सीकी पहिलो डेमोक्र्याट महिला गभर्नर निर्वाचित भएकी छिन्।
म यी समर्पित र सक्षम नेतृहरूले आफ्ना राज्यका लागि कसरी नेतृत्व दिन्छन् भन्ने हेर्न उत्साहित छु।” उनको शुभकामना सन्देश उत्सवको इमोजीसहित थियो।

भर्जिनियामा स्पानबर्गरले रिपब्लिकन लफ्टेनन्ट गभर्नर विनसम एर्ल–सीअर्सलाई पराजित गरिन्। न्युजर्सीमा मिकी शेर्लले रिपब्लिकन ज्याक सियाटरेलीलाई हराइन्।

यसैबीच न्यूयोर्क सहरमा जोह्रान ममदानी ऐतिहासिक विजय हासिल गर्दै सहरका पहिला मुस्लिम मेयर र एक शताब्दीपछि सबैभन्दा युवा मेयर बने।
ममदानीले पूर्व गभर्नर एन्ड्र्यू क्यूमो (स्वतन्त्र) र रिपब्लिकन कर्टिस स्लिवालाई पराजित गरे।

क्लिन्टनले ममदानीको अभियानलाई ‘प्रेरणादायी’ भन्दै भनेकी छन्—
“न्यूयोर्क सहरमा यो वर्ष विगत ५० वर्षभन्दा बढी मतदाताहरूले सहभागी भएर मतदान गरे।
यो लोकतन्त्रको जित हो, र @ZohranKMamdani को अभियानले सहरका जनतालाई उर्जावान बनाएको प्रमाण हो। विश्वकै महान् सहरको अर्को मेयर हुनुभएकोमा बधाई।” उनले सन्देशको अन्त्यमा स्ट्याचु अफ लिबर्टी इमोजी समेत राखिन्।