काठमाडौं/ प्रधानमन्त्री केपी शर्मा ओलीले पदबाट राजीनामा दिएका छन्। राष्ट्रपति रामचन्द्र पौडेललाई सम्बोधन गरेर सोमबार प्रस्तुत गरिएको राजीनामा पत्रमार्फत उनले पद छाडेको घोषणा गरेका हुन्।

संविधानको धारा ७७ (२) बमोजिम प्रधानमन्त्री नियुक्त भएका ओलीले हाल मुलुकमा उत्पन्न असामान्य परिस्थितिलाई ध्यानमा राख्दै राजनीतिक समाधान र समस्या समाधानका लागि थप पहल गर्न आवश्यक ठानेका कारण प्रधानमन्त्री पदबाट राजीनामा दिएको पत्रमा उल्लेख छ।

राजीनामा पत्रमा उनले भनेका छन्, “संविधान र जनताको विश्वासलाई मध्यनजर गर्दै यस कठीन घडीमा समाधान खोज्ने बाटो संवाद र सहकार्य मात्रै हो भन्ने विश्वासमा, म प्रधानमन्त्री पदबाट राजीनामा दिएको छु।”

देशभर चर्किएको जेनजी आन्दोलन, हिंसात्मक झडप र २१ जनाभन्दा बढीको ज्यान गएको घटनापछि प्रधानमन्त्री ओलीमाथि तीव्र दबाब परेको थियो। प्रमुख विपक्षी दल नेपाली कांग्रेस र विभिन्न मानव अधिकार संस्थाले उनको राजीनामाको माग गर्दै निरन्तर दबाब दिइरहेका थिए।

ओलीले २०७४ सालमा पहिलो पटक प्रधानमन्त्री बनेदेखि अहिलेसम्म तीनपटक मुलुकको प्रधानमन्त्रीको जिम्मेवारी सम्हालेका थिए। हालै उनले नेतृत्व गरेको सरकार सामाजिक सञ्जाल प्रतिबन्ध, भ्रष्टाचार र आन्दोलन दमनको कारण कठोर आलोचनामा परेको थियो।

अब संविधान बमोजिम नयाँ सरकार गठन प्रक्रियाबारे राष्ट्रपति पौडेलले दलहरूसँग परामर्श सुरु गर्ने बताइएको छ।

प्रधानमन्त्री केपी शर्मा ओलीले दिएको राजीनामा राष्ट्रपति रामचन्द्र पौडेलले स्वीकृत गरेका छन्। मंगलबार दिउँसो ओलीले पदबाट राजीनामा घोषणा गरेपछि सोही दिन राष्ट्रपतिबाट औपचारिक रूपमा स्वीकृति भएको राष्ट्रपति कार्यालयका प्रेस सल्लाहकार किरण पोखरेलले जानकारी दिए।

ओलीले मंगलबार दिउँसो राष्ट्रपतिलाई सम्बोधन गर्दै पदबाट राजीनामा पत्र बुझाएका थिए। पत्रमा उनले हाल मुलुकमा उत्पन्न असामान्य राजनीतिक परिस्थितिलाई मध्यनजर गर्दै समाधान खोज्ने मार्ग संवाद र सहकार्य मात्रै भएकाले पदबाट हट्ने निर्णय गरेको उल्लेख गरेका थिए।

यससँगै ओलीको प्रधानमन्त्री पदको कार्यकाल औपचारिक रूपमा समाप्त भएको छ। अब संविधान बमोजिम नयाँ सरकार गठनको प्रक्रिया अघि बढ्नेछ।

राजनीतिक वृत्तमा विपक्षी दलहरूको पहलमा नयाँ सत्ता समीकरण बन्ने संकेत देखिएको छ भने राष्ट्रपति पौडेलले दलहरूसँग छलफल सुरु गर्ने तयारी गरेका छन्।