कुवेतमा रहेका करिब १ लाख ६० हजार नेपालीमध्ये ४० हजार जति घरेलु कामदारको रूपमा कार्यरत छन् । तर हाल मेथानोल मिसिएको नक्कली मदिरा सेवनका कारण त्यहाँस्थित नेपाली समुदाय गम्भीर संकटमा परेको छ । पछिल्लो अद्यावधिक अनुसार, यो घटनामा १६ भन्दा बढी नेपालीको मृत्यु भइसकेको छ भने ३५ भन्दा बढी नेपाली अस्पतालमा उपचाररत छन् । यसरी ठूलो संख्यामा नेपालीहरू मृतक र पीडितको सूचीमा पर्नुको कारणले गम्भीर प्रश्न उठेको छ — किन नेपालीहरूले स्थानीय कानुनको पालना गर्न सकेनन् ? यस्तो किन भयो ? कसरी भयो ?

कुवेतको स्वास्थ्य मन्त्रालयका अनुसार गत शनिबारदेखि मदिरा सेवनपछि विषाक्तता देखिएका कम्तीमा १६० जनालाई अस्पताल भर्ना गरिएको छ, जसमा २३ जनाको मृत्यु भइसकेको छ । मृतक सबै एशियाली मुलुकका नागरिक हुन् । ३१ जना बिरामी भेन्टिलेटरमा छन् भने ५१ जनालाई मृगौला उपचार (डायलाइसिस) गर्नुपर्ने अवस्था छ । २१ जनाको स्थायी रूपमा दृष्टि गुमेको वा दृष्टि क्षमतामा गम्भीर क्षति पुगेको छ ।

घटना सार्वजनिक भएपछि अस्पताल, कुवेत विष नियन्त्रण केन्द्र, सुरक्षा निकाय र अन्य सम्बन्धित संस्थाहरू सक्रिय भएका छन् । केहीलाई आईसीयूमा राखेर चौबीसै घण्टा उपचार भइरहेको छ । मन्त्रालयले सम्भावित विषाक्तता देखिए तत्काल अस्पताल वा तोकिएको हेल्पलाइनमार्फत जानकारी दिन आग्रह गरेको छ ।

भारतीय नागरिकहरू पनि ठूलो संख्यामा प्रभावित भएका छन् । भारतीय दूतावासका अनुसार करिब ४० जना भारतीय अस्पतालमा छन्, जसमा केहीको मृत्यु भइसकेको छ र केहीको अवस्था गम्भीर छ । घटनापछि भारतीय राजदूत र वरिष्ठ अधिकारीहरूले अस्पताल पुगेर पीडितको अवस्थाबारे जानकारी लिएका छन् र उपचारमा कुनै कमी नहोस् भनेर स्वास्थ्य मन्त्रालयसँग समन्वय गरिरहेका छन् । हेल्पलाइन नम्बर ६५५०१५८७ समेत सञ्चालनमा ल्याइएको छ ।

नेपाली दूतावासको आधिकारिक विवरण अहिलेसम्म सार्वजनिक भइसकेको छैन । तर त्यहाँ कार्यरत नेपाली समुदायका अनुसार कानुनले पूर्ण रूपमा मदिरा निषेध गरेको देशमा यस्ता अवैध र घातक पेयको कारोबारमा संलग्न हुनु कानुनी जोखिम मात्र होइन, ज्यानको ठूलो खतरा पनि हो । यस घटनाले फेरि एकपटक देखाएको छ — रोजगारीका लागि वैदेशिक भूमिमा पुगेका नेपालीहरूलाई त्यहाँको कानुन, नियम र संस्कृतिको कडाइका साथ पालना गर्नुपर्ने आवश्यकता अत्यन्त महत्वपूर्ण छ ।