गीतकार टेक तामाङको ‘सांगीतिक साँझ – २०८२’ काठमाडौंको प्रज्ञा प्रतिष्ठानमा भव्यरूपमा सम्पन्न भएको छ। गीतकार संघ नेपालको आयोजनामा भएको कार्यक्रममा २५ जना वाद्यवादकसहित डेढ दर्जन गायक–गायिकाले प्रत्यक्ष प्रस्तुतिमा तामाङका लोकप्रिय गीतहरू गाएका थिए।

कार्यक्रमको सभापतित्व गीतकार संघ नेपालका अध्यक्ष बसन्त वित्यासी थापाले गरेका थिए भने प्रमुख अतिथि नेपाल प्रज्ञा प्रतिष्ठानका पूर्व कुलपति बैरागी काइँला थिए। भीड अत्यधिक भएकाले प्रेक्षालयको बाहिर एलइडी राखेर पनि कार्यक्रम प्रत्यक्ष देखाइएको थियो।

गीतकार तामाङद्वारा रचना गरिएका १७ ओटा नयाँ–पुराना लोकप्रिय गीतहरू गायक–गायिकाहरूले प्रत्यक्ष प्रस्तुत गरे। प्रस्तुत गीतहरूमा ‘नेपाल मेरो घर’ (किरण प्रधान), ‘आमा’ (शिव परियार), ‘स्वर्ग सुख’ (डेबिट शंकर), ‘मीठा मीठा बोली’ (रुपक चौधरी), ‘जित्नेहरुको पनि’ (सत्यराज आचार्य), ‘आफ्नै धड्कन’ (स्वरुपराज आचार्य), ‘मन पर्छ’ (संगीता राना प्रधान), ‘अल्झिरह्यो याद’ (प्रदीपराज पाण्डे), ‘तिमी सागर’ (सञ्जय तुम्रोक र सुमिना लो), ‘तिमीलाई पराईको’ र ‘अँगालोमा बेरिरहुँ’ (अन्जु पन्त) लगायत थिए।

प्रत्येक गीत प्रस्तुतिमा दर्शकदीर्घामा ‘वान्स मोर’ को आवाज गुन्जिरहन्थ्यो। वाद्यवादनमा संगीतकार अशोक कुमार राईको संयोजनमा २५ सदस्यीय टोलीले साथ दिएको थियो। भ्वायलिन, बाँसुरी, तालवाद्य, गिटार, सितार, सारङ्गी, ड्रम्म, ब्रासलगायत सबै वाद्ययन्त्रमा अनुभवी कलाकारहरूको सहभागीता थियो।

गीतकार टेक तामाङले आफ्नो सांगीतिक यात्राको सुरुवात २०५० सालदेखि गरे पनि यस सांगीतिक साँझले त्यो यात्रालाई पूर्णता दिएको बताए। उनले संगीतप्रेमीको व्यापक उपस्थिति र मायाले यो साँझ ऐतिहासिक बनेको अनुभव सुनाए।

पूर्व कुलपति बैरागी काइँलाले तामाङलाई बधाई दिँदै गीतमार्फत मातृभूमिप्रतिको प्रेम सन्देश प्रवाह गर्न सफल भएको बताए। कार्यक्रम संयोजक थापाले एकल र सामूहिक साँझहरू सर्जकको हकअधिकार स्थापना, प्रोत्साहन र सम्मानका लागि निरन्तर भइरहने बताए।

कार्यक्रममा विभिन्न क्षेत्रका प्रतिष्ठित व्यक्तित्वहरू—राजनीति, साहित्य, संगीत, न्याय, प्रशासन, शिक्षा, सुरक्षा—को बाक्लो उपस्थिति थियो। कार्यक्रममा तामाङद्वारा रचित ‘सोल्टिनी’ र ‘माथि माथि लेकमा’ गीतका म्युजिक भिडियो पनि सार्वजनिक गरियो।

कार्यक्रम संचालन दिनेश डिसीले गरेका थिए भने सगरमाथा टेलिभिजनबाट प्रत्यक्ष प्रसारण गरिएको थियो। व्यवस्थापन समितिको संयोजक थापासहित अशोककुमार राई, सुमन पण्डित ‘बैरागी’, टिका राई ‘शिव’, कन्काइष्ट राई, शशी लुमम्बु, सुशील केसी, अर्जुन बहादुर घलान र गोपालचन्द्र राई सदस्य थिए।

कार्यक्रमलाई एनस्लेक्स नेपाल, रेन एजुकेशन, देवर्सी एजुकेशन, सिताराम दूध, सिजी मोटर्स, टाइगो इभी, ग्लोबल आइएमई बैंक, जिपिएन सेक्युरिटी, लुलु इन्टरनेशनल, मोडल मल्टिपल कलेज, केबिएन मिटसप, आश्री ज्वेलर्स, एक्टिभ प्रेस आदि संस्थाहरूले प्रायोजन गरेका थिए।

गीतकार संघ नेपाल र भीमबहादुर फूलमाया स्मृति पुस्तकालयको सहयोगार्थ आयोजना गरिएको यो साँझ सांस्कृतिक चेतना, सामाजिक सशक्तीकरण र सिर्जनात्मक उत्साह जगाउने उदाहरणीय कार्यको रूपमा रहेको छ।