दिन दहाडै,
खुल्लम खुल्ला,
वर्षौं वर्ष वर्षदेखि,
करोडौं, अर्बौं र खर्बौंमा,
चोरी डकैती गर्दै आएका,
तीनैले मानसम्मान पाएका,
अनि तिनैले कुर्सी हत्याएका,
त्यस्तो अजिब राज्यमा
उनीहरुकै हुकुम चल्ने राज्यमा
खटन पटन चल्ने राज्यमा
उनीहरुलाई नै करोडौं दान गर्ने,
जग्गा दिने, भवन बनाइदिने राज्यमा
केरा, सुन्तला, स्याउ, पाउरोटी, तरकारी चोर्न,
जान्छौ साना तिना सोकेसहरु फोर्न
नाम फाल्नु फाल्नु गहतका झोलमा !
ए स-साना चोरहरु हो
तिमीहरूलाई अलिकति पनि लाज लागेन ??
शरम लागेन ??
त्यति सानो चोरी पनि गर्नुहुन्छ ??
ठूला चोर डाकाको इज्जत फाल्नुहुन्छ ??
के गरेको त्यस्तो ??
किन गरेको त्यस्तो ??
लगाउनै पर्छ हत्कडी तिमीहरुलाई
कोच्नै पर्छ जेल तिमीहरूलाई
साले स-साना चोरहरू हो
ठूला चोरहरूको इज्जत फाल्ने ??
केरा, सुन्तला, स्याउ, पाउरोटी, तरकारी पनि,
झोला झोलामा हाल्ने ??

– रामप्रसाद खनाल, चैत्र १५, २०८१