दक्षिण अमेरिकी राष्ट्र भेनेजुएलामा बुधबार आएको शक्तिशाली दुईवटा भूकम्पले ठूलो मानवीय तथा भौतिक क्षति पुर्‍याएको छ। अमेरिकी राष्ट्रपति डोनाल्ड ट्रम्पले भूकम्पबाट “अत्यन्तै विनाशकारी मानवीय क्षति” भएको उल्लेख गर्दै संयुक्त राज्य अमेरिका उद्धार तथा राहत सहयोगका लागि पूर्ण रूपमा तयार रहेको बताएका छन्।

भेनेजुएलाका विभिन्न क्षेत्रमा लगातार दुई शक्तिशाली भूकम्प आएपछि राजधानी काराकाससहित धेरै सहरमा भवनहरू भत्किएका छन्, सडक तथा पूर्वाधारमा क्षति पुगेको छ भने उद्धार टोलीहरू भग्नावशेषमा फसेकाहरूको खोजी तथा उद्धारमा जुटेका छन्।

भेनेजुएलाकी अन्तरिम राष्ट्रपति डेल्सी रोड्रिगेजका अनुसार हालसम्म कम्तीमा ३२ जनाको मृत्यु भएको पुष्टि भएको छ भने ७०० भन्दा बढी घाइते भएका छन्। यो घटनापछि सरकारले देशभर आपत्कालीन अवस्था घोषणा गरेको छ।

अमेरिकी राष्ट्रपति ट्रम्पले आफ्नो सामाजिक सञ्जालमार्फत जारी सन्देशमा भूकम्प अत्यन्त शक्तिशाली रहेको र यसबाट ठूलो जनधनको क्षति भएको प्रारम्भिक विवरण प्राप्त भएको बताएका छन्।

उनले अमेरिकाले आवश्यक मानवीय सहायता तत्काल उपलब्ध गराउन सम्बन्धित सबै सरकारी निकायलाई तयारी अवस्थामा रहन निर्देशन दिएको जानकारी दिँदै भेनेजुएली जनताको साथमा अमेरिका रहेको बताएका छन्।

ट्रम्पले “अमेरिका सहयोग गर्न पूर्ण रूपमा तयार छ। हाम्रा सबै निकायलाई तत्काल परिचालन हुन निर्देशन दिइसकेको छु। हामी कठिन घडीमा भेनेजुएलाका जनताको साथमा रहनेछौँ,” भन्ने आशय व्यक्त गरेका छन्।

अमेरिकी भूगर्भ सर्वेक्षण (USGS) का अनुसार पहिलो भूकम्प नेपाली समयअनुसार बुधबार राति करिब ७.२ म्याग्निच्युडको थियो, जसको केन्द्रबिन्दु सान फेलिपे क्षेत्रको पूर्व–उत्तरपूर्वमा रहेको थियो। त्यसको केवल ३९ सेकेन्डपछि ७.५ म्याग्निच्युडको अर्को शक्तिशाली भूकम्प युमारे क्षेत्रनजिक आएको थियो।

USGS ले जारी गरेको उच्च जोखिम (रेड अलर्ट) सूचनामा ठूलो जनधनको क्षति तथा व्यापक विनाश हुने सम्भावना औँल्याएको छ। प्रारम्भिक मूल्याङ्कनअनुसार यो भूकम्प भेनेजुएलामा पछिल्लो एक शताब्दीभन्दा बढी अवधिमा आएका सबैभन्दा शक्तिशाली भूकम्पमध्ये एक मानिएको छ।

मुख्य दुई भूकम्पपछि करिब दुई दर्जन परकम्प (आफ्टरशक) महसुस गरिएको अधिकारीहरूले बताएका छन्। लगातारका कम्पनका कारण प्रभावित क्षेत्रमा उद्धार कार्य चुनौतीपूर्ण बनेको छ भने हजारौँ नागरिक खुला स्थानमा बस्न बाध्य भएका छन्।

अन्तरिम राष्ट्रपति रोड्रिगेजले राष्ट्रका नाममा सम्बोधन गर्दै नागरिकलाई संयमता अपनाउन, अफवाहमा विश्वास नगर्न र सरकारी निर्देशनको पालना गर्न आग्रह गरेकी छन्। उनले राष्ट्रिय एकता कायम राख्दै उद्धार तथा राहत कार्यमा सबैले सहयोग गर्नुपर्नेमा जोड दिएकी छन्।

उता अमेरिकी विदेश मन्त्रालयका उपविदेशमन्त्री क्रिस्टोफर ल्यान्डाउले अमेरिकी अधिकारीहरू भेनेजुएली प्रशासनसँग निरन्तर सम्पर्कमा रहेको र आवश्यक मानवीय सहायता पठाउने तयारी भइरहेको बताएका छन्।

अमेरिकी विदेश मन्त्रालयअन्तर्गतको पश्चिमी गोलार्द्ध मामिला ब्युरोले पनि भूकम्पपछिको अवस्थालाई नजिकबाट अनुगमन गरिरहेको जनाएको छ। मन्त्रालयले मृतकप्रति गहिरो समवेदना व्यक्त गर्दै कठिन परिस्थितिमा भेनेजुएली जनतालाई आवश्यक सहयोग गर्न अमेरिका प्रतिबद्ध रहेको जनाएको छ।

यसैबीच, भेनेजुएलामा रहेका अमेरिकी नागरिकलाई सुरक्षा अवस्थाबारे सतर्क रहन, स्थानीय प्रशासनको निर्देशन पालना गर्न तथा अमेरिकी दूतावासबाट जारी हुने सूचनालाई नियमित रूपमा पछ्याउन आग्रह गरिएको छ।

भूकम्पबाट प्रभावित क्षेत्रमा विद्युत्, सञ्चार, खानेपानी तथा यातायात सेवा आंशिक रूपमा अवरुद्ध भएको प्रारम्भिक विवरण सार्वजनिक भएको छ। अधिकारीहरूले मृतक तथा घाइतेको संख्या अझ बढ्न सक्ने अनुमान गर्दै खोज तथा उद्धार कार्यलाई तीव्र बनाइएको बताएका छन्।