अमेरिकाको मिनेसोटा राज्यबाट लामो समयदेखि डेमोक्रेटिक पार्टीकी सिनेटर रहेकी एमी क्लोबुचर ले सन् २०२६ मा हुने मिनेसोटा गभर्नर निर्वाचनमा औपचारिक रूपमा उम्मेदवारी घोषणा गरेकी छन्। यो घोषणा वर्तमान गभर्नर टिम वाल्ज ले ठूलो ठगी काण्डपछि पुनःनिर्वाचन नलड्ने निर्णय गरेको करिब तीन सातापछि आएको हो।

क्लोबुचरले सामाजिक सञ्जालमार्फत सार्वजनिक गरेको भिडियो सन्देशमा मिनेसोटामा भइरहेको संघीय आप्रवासन कारबाहीलाई प्रमुख विषय बनाएकी छन्। उनले भनिन्, “यी समयहरूले यस्तो नेतृत्व मागिरहेका छन्, जो यो प्रशासनको केवल छाप मात्र नबनोस्, तर राज्यका समस्या समाधान गर्न आधार खोज्न पनि तयार होस्।”

उनले आफू सबैका लागि उम्मेदवारी दिएको बताउँदै सस्तो स्वास्थ्य सेवा चाहने, विद्यार्थी, किसान, आप्रवासी सपना बोकेकाहरू र निर्माण क्षेत्रमा काम गर्ने नागरिकहरूको प्रतिनिधित्व गर्ने दाबी गरिन्। क्लोबुचरले डोनाल्ड ट्रम्प नेतृत्वको प्रशासनले विभाजनलाई प्राथमिकता दिएको आरोप लगाउँदै मिनेसोटाबाट आप्रवासन तथा सीमा सुरक्षा निकाय (आईसीई) का “दुरुपयोगपूर्ण गतिविधि” हटाउनुपर्ने माग गरिन्।

क्लोबुचरको उम्मेदवारी घोषणा यस्तो बेला आएको हो, जब मिनेसोटा राज्य हालसम्मकै ठूलो कोभिड–कालीन ठगी काण्डका कारण राष्ट्रिय स्तरमा चर्चामा छ। यस काण्डलाई अमेरिकाकै सबैभन्दा ठूलो महामारीकालीन ठगी योजनाका रूपमा वर्णन गरिएको छ। उनले उक्त काण्डतर्फ संकेत गर्दै भनिन्, “म सरकारी प्रणालीभित्रको ठगी र फजुल खर्च मन पराउँदिन। जे गलत छ, त्यसलाई म सुधार्छु।”

पछिल्ला एक महिनामा मिनेसोटा आप्रवासन मुद्दामा पनि केन्द्रबिन्दु बनेको छ। ट्रम्प प्रशासनको कडा आप्रवासन नीतिका कारण मिनियापोलिसमा संघीय एजेन्टसँगको झडपका क्रममा दुई अमेरिकी नागरिकको मृत्यु भएपछि राज्यभर तनाव बढेको छ।

क्लोबुचरको उम्मेदवारीले डेमोक्रेटिक पार्टीलाई गभर्नर पद जोगाउन बलियो र चर्चित उम्मेदवार दिएको छ। लामो समयदेखि रिपब्लिकनहरूले मिनेसोटामा गभर्नर निर्वाचन जित्न नसकेको अवस्थामा, डेमोक्रेटहरू यसपटक पनि आफ्नो पकड कायम राख्ने प्रयासमा छन्।

यसअघि क्लोबुचरले मिनेसोटा क्याम्पेन फाइनान्स बोर्डमा प्रारम्भिक कागजात दर्ता गरेकी थिइन्, जसलाई उनको उम्मेदवारीको पहिलो संकेतका रूपमा हेरिएको थियो। वाल्जले तेस्रो कार्यकाल नलड्ने घोषणा गरेपछि क्लोबुचरलाई उम्मेदवारी दिन आग्रह गर्ने फोन र दबाब डेमोक्रेटिक वृत्तबाट बढ्दै गएको बताइएको छ।

क्लोबुचरले सिनेटका चारै निर्वाचन सहज अन्तरले जितेकी छन्। सन् २०२४ मा उनले करिब १६ प्रतिशत अंकको फराकिलो जित हात पारेकी थिइन्। हाल उनी सिनेटको डेमोक्रेटिक नेतृत्वमा तेस्रो वरियतामा छन्। यसअघि उनी मिनेसोटाको सबैभन्दा ठूलो काउन्टी हेनेपिनकी काउन्टी अटर्नीका रूपमा पनि दुई कार्यकाल निर्वाचित भएकी थिइन्। उनले सन् २०२० मा डेमोक्रेटिक पार्टीको राष्ट्रपति उम्मेदवारीका लागि पनि प्रयास गरेकी थिइन्।

उता, गभर्नर टिम वाल्जले गत सेप्टेम्बरमा पुनःनिर्वाचन अभियान सुरु गरे पनि डिसेम्बरदेखि ठूलो ठगी काण्डका कारण उनीमाथि तीव्र राजनीतिक दबाब बढ्यो। उक्त काण्डमा सन् २०२२ यता ९० भन्दा बढी व्यक्तिमाथि मुद्दा दर्ता भइसकेको छ, जसमा धेरैजसो मिनेसोटाको सोमाली समुदायसँग सम्बन्धित छन्। अमेरिकी अभियोजन पक्षका अनुसार यो ठगीको रकम १ अर्ब डलरभन्दा बढी हुन सक्ने र ९ अर्ब डलरसम्म पुग्न सक्ने अनुमान गरिएको छ।

यसैबीच रिपब्लिकन पार्टीभित्र पनि गभर्नर उम्मेदवारीका लागि प्रतिस्पर्धा तीव्र छ। तर संघीय एजेन्टद्वारा गरिएका गोलीकाण्ड र त्यसपछिको जनआक्रोशले रिपब्लिकन रणनीतिमा समेत अनिश्चितता थपिएको विश्लेषकहरूको भनाइ छ।