
काठमाडौं । टेलिभिजन श्रृंखला, म्युजिक भिडियो र स्टेज कार्यक्रममा अत्यधिक माग हुने लोकप्रिय युवा कलाकार मरिचमान श्रेष्ठ ‘बल्छी धुर्बे’ यतिबेला आफ्नो डेब्यू फिल्म ‘गोबर गणेश’को प्रवर्धनमा व्यस्त छन्। फिल्म रिलिज भएसँगै उनी काठमाडौं उपत्यकाका विभिन्न सिनेमा हल–हलमा पुगेर दर्शकसँग प्रत्यक्ष भेटघाट गर्दै प्रचारप्रसारमा जुटिरहेका छन्।
शुक्रबार र शनिबार बल्छी धुर्बेले काठमाडौंका विभिन्न हलमा पुगेर दर्शकसँग साक्षात्कार गरे। उनका साथमा पूजन घिमिरे ‘पुकु’, सीतादेवी तिमल्सिना र पदम तामाङ पनि रहेका छन्। हलमा दर्शकको उत्साहपूर्ण उपस्थिति र प्रतिक्रिया देख्दा उनी निकै उत्साहित देखिएका छन्।
दर्शकीय प्रतिक्रियाबाट मख्ख बनेका बल्छी धुर्बेले भने, “एकदमै गजब प्रतिक्रिया आइरहेको छ। जतिजनाले पनि हेर्नुभएको छ, कसैले पनि नराम्रो भन्नुभएको छैन। सन्तानका लागि आमाले गरेको त्यागको कथालाई दर्शकले निकै मन पराउनुभएको छ।”
फिल्म हेरेपछि भावुक बनेका कतिपय दर्शक बल्छी धुर्बेकै काँधमा भक्कानिएर रोकेको दृश्य सामाजिक सञ्जाल टिकटकमा समेत व्यापक रूपमा सेयर भइरहेको छ। विशेषगरी आमा र छोराबीचको मर्मस्पर्शी कथाले तन्नेरीदेखि वयोवृद्ध उमेर समूहसम्मका दर्शकको मन छोएको देखिन्छ।
“हिजोसम्म के होला, कसो होला भनेर डराइरहेको थिएँ,” उनले भने, “आज दर्शकको यस्तो प्रतिक्रिया देख्दा मन निकै खुसी भएको छ।” ‘गोबर गणेश’का निर्देशकसमेत रहेका बल्छी धुर्बेले फिल्ममा शीर्ष भूमिका निर्वाह गरेका छन्। फिल्ममा वर्षा सिवाकोटीको पनि प्रमुख अभिनय रहेको छ।
टेलिभिजन श्रृंखलाबाट चम्किएका मरिचमान श्रेष्ठले यही फिल्ममार्फत घरेलु फिल्म निर्देशन र अभिनयमा डेब्यू गरेका हुन्। उनको पहिलो प्रयास सन्तोषजनक देखिएको छ भने पहिलो सप्ताहन्तमै बक्सअफिस प्रतिक्रिया पनि उत्साहजनक देखिएको छ।
काठमाडौंमा दर्शक भेटघाट सकेपछि बल्छी धुर्बे र पुकु आगामी साता मोफसलका विभिन्न हलहरूमा पुग्ने तयारीमा छन्। ‘गोबर गणेश’ मार्फत नेपाली सिनेमा क्षेत्रमा नयाँ यात्रा सुरु गरेका बल्छी धुर्बेलाई Nepalmother.com परिवारको तर्फबाट पनि हार्दिक शुभकामना व्यक्त गरिएको छ।








प्रतिक्रिया