काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले निजी क्षेत्र अझै पनि ढुक्क भएर लगानी गर्नसक्ने अवस्थामा नपुगेको बताएका छन्। बुधबार महासंघद्वारा आयोजित ‘शान्ति, स्थायित्व र समृद्धिका लागि सहकार्य तथा सामूहिक पहल’ कार्यक्रममा बोल्दै उनले लगानीमैत्री वातावरण निर्माण हुन नसकेको उल्लेख गर्दै सरकारलाई त्यसतर्फ गम्भीर पहल गर्न आग्रह गरे। समृद्धिको आधार निजी क्षेत्र भए पनि यसको संरक्षण र सम्मानका विषयहरू अझै ओझेलमा परेको उनको भनाइ थियो। निजी क्षेत्रले निर्वाध रूपमा काम गर्न पाउने वातावरणको सुनिश्चितता नहुँदा लगानी विस्तार हुन नसकेको उनले बताए।

गलत काम गर्नेहरूमाथि कारबाही नहुँदा दण्डहीनता बढ्दै जाने खतरा रहेको भन्दै ढकालले चिन्ता व्यक्त गरे। उनका अनुसार उद्यमी र उद्यमशीलता विकासका लागि सहज नीतिगत व्यवस्था, निजी क्षेत्रप्रतिको सम्मान, पेशा–व्यवसाय निर्वाध सञ्चालनको प्रत्याभूति र सम्पत्तिको सुरक्षाको अनुभूति नभएसम्म देशमा लगानी सम्भव हुँदैन। लगानी बिना रोजगारी सिर्जना हुँदैन, रोजगारी नहुँदा आयस्तर सुधारिँदैन र आयस्तर नबढे मानव विकासमा अपेक्षित प्रगति सम्भव नहुने उनले स्पष्ट पारे।

उनले शिक्षा र स्वास्थ्यलाई सर्वसुलभ बनाउन राजस्व वृद्धि आवश्यक रहेको उल्लेख गर्दै त्यसका लागि निजी क्षेत्रलाई काम गर्न पाउने वातावरण र प्रोत्साहनमुखी नीति अनिवार्य रहेको बताए। पछिल्लो डेढ वर्षदेखि सरकार करिब डेढ खर्ब रुपैयाँ घाटामा रहेको, बैंकहरू करिब ११ खर्ब रुपैयाँ लगानी गर्न तयार भए पनि निजी क्षेत्र उद्यममा अघि बढ्न नसकेको अवस्थाले राजस्व संकलनमा समस्या आएको उनले बताए। परिणामस्वरूप कर्मचारीको तलब–भत्ता धान्नसमेत कठिनाइ उत्पन्न भएको, पूर्वाधारमा पर्याप्त लगानी हुन नसकेको र निजी क्षेत्रले निर्माण गर्ने पूर्वाधारमा पनि विभिन्न बहानामा अवरोध हुने गरेको उनको भनाइ थियो।

उद्योग–कलकारखाना र पूर्वाधार विस्तार नभएसम्म रोजगारी सिर्जना सम्भव नहुने उल्लेख गर्दै उनले सरकारले वर्षमा सीमित संख्यामा मात्रै रोजगारी दिनसकिरहेको अवस्थाले युवाहरू विदेशिन बाध्य भएको बताए। विदेशमा निजी व्यवसायमा काम गर्न सक्ने नेपाली युवाले स्वदेशमै निजी उद्योग तथा प्रतिष्ठानमा काम गर्न नपाउने अवस्था हुनु दुःखद भएको उनको टिप्पणी थियो।

ढकालले राजनीतिक प्रतिबद्धता र स्थायित्व अपरिहार्य रहेको उल्लेख गर्दै निर्वाचनमार्फत लोकतन्त्र संस्थागत गर्नु आवश्यक भएको बताए। निजी क्षेत्र सुरक्षित र सम्मानित वातावरणमा काम गर्न नपाए समग्र अर्थतन्त्र असफल हुने र त्यसको असर भावी पुस्तासम्म पर्ने चेतावनी उनले दिए। निर्धारित समयमै निर्वाचन होस् र राजनीतिक स्थायित्व कायम होस् भन्ने निजी क्षेत्रको चाहना रहेकोसमेत उनले स्पष्ट पारे।