देशै भरी कर्फ्यु, सेना परिचालन, राजनीतिक निकास के होला अब ?

पोखरा नयाँबजारमा आगजनी : नेपाल अटोमोबाइल एशोसिएसन अध्यक्ष ध्रुव थापाको घरमा महिला मृत अवस्थामा फेला

जेनजी आन्दोलन चर्किँदै गएका बेला पोखरा नयाँबजारस्थित नेपाल अटोमोबाइल एशोसिएसनका केन्द्रीय अध्यक्ष ध्रुव थापाको घरमा भीषण आगजनी भएको छ। आगलागीपछि घरभित्रै एक महिलाको शव जलेको अवस्थामा भेटिएको प्रहरीले पुष्टि गरेको छ।

मन्त्री विन्दुकुमार थापाको घर र व्यवसायमा पनि आक्रमण

मंगलबार प्रदर्शनकारीहरूको आक्रोश गण्डकी प्रदेशका मन्त्री तथा व्यवसायी विन्दुकुमार थापामाथि समेत केन्द्रीत भयो। उनीहरूको निजी घर, व्यापारिक प्रतिष्ठान र विभिन्न सम्पत्ति तोडफोड र आगजनीबाट ध्वस्त बनाइयो।
यस क्रममा उनका भाइ ध्रुव थापाको गाडी सोरुम र आवासमा समेत ठूलो क्षति पुगेको छ।

जलेको अवस्थामा शव फेला

पोखरा नयाँबजारस्थित ध्रुव थापाको गाडी सोरुममा आगजनीपछि उद्धार टोलीले एक महिलाको शव फेला पारेको हो। प्रहरीले प्रारम्भिक अनुसन्धानपछि उक्त महिला सोही घरमा काम गर्ने कर्मचारी भएको पुष्टि गरेको छ।
उनको परिचय आधिकारिक रूपमा सार्वजनिक गरिएको छैन तर नजिकैका बासिन्दाले उनलाई लामो समयदेखि घरमै काम गर्ने सहयोगी महिला रहेको बताएका छन्।

अनुसन्धान अघि बढ्दै

गण्डकी प्रदेश प्रहरी कार्यालयका अनुसार घटनास्थलमा तालिमप्राप्त फोरेन्सिक टोली खटाइएको छ। आगजनी कसरी भयो, मृतक महिलाको मृत्यु कसरी भयो भन्नेबारे प्राविधिक परीक्षणपछि मात्र स्पष्ट हुने जनाइएको छ।
सुरक्षा निकायले आगजनीमा संलग्नहरूलाई चाँडै पक्राउ गर्ने प्रतिबद्धता जनाएको छ।

बाँकेको नौवस्तास्थित बाल सुधारगृहमा झडप

पाँचजनाको मृत्यु, सात घाइते – कैदीबन्दी सामूहिक रूपमा फरार

बाँकेको नौवस्तास्थित बाल सुधारगृहमा मंगलबार दिउँसो ठूलो झडप हुँदा पाँचजनाको मृत्यु भएको छ भने सातजना घाइते भएका छन्। कारागारभित्र कैदीबन्दीले गेट फोरेर बाहिर निस्कन खोज्दा स्थिति नियन्त्रणबाहिर पुगेको प्रहरीले जनाएको छ।

बालबिज्याइँकर्ता र थुनुवा एउटै कोठामा

नौवस्ता कारागारका प्रमुख जालन्धर भुसालका अनुसार, बाल सुधार गृहमा बालबिज्याइँकर्ता र अन्य थुनुवालाई एउटै ठाउँमा राखिएकै कारण तनाव सुरु भएको हो। गेट तोडेर भाग्ने प्रयास गर्दा प्रहरी र सुरक्षाकर्मीसँग झडप भएको थियो।

ठूलो संख्यामा कैदी फरार

कारागारमा रहेका ५८५ मध्ये १४९ जना कैदीबन्दी भागेका छन् भने बाल सुधार गृहका ७६ जना समेत फरार भएको कारागार प्रशासनले जनाएको छ। झडपकै बीचमा कैदीहरूले समूहगत रूपमा भाग्ने प्रयास गरेका थिए।

उपचारका क्रममा मृत्यु

झडपमा घाइते भएकालाई तत्काल नेपालगन्जस्थित भेरी अस्पताल लगिएको थियो। तीमध्ये पाँचजनाको उपचारकै क्रममा मृत्यु भएको अस्पतालले पुष्टि गरेको छ।
अन्य घाइतेलाई जिल्लाका विभिन्न स्वास्थ्य संस्थामा उपचार भइरहेको छ।

सुरक्षामाथि गम्भीर प्रश्न

बाल सुधार गृहमा कैदी र बालबिज्याइँकर्तालाई एउटै कोठामा राख्नु नै घटनाको मूल कारण बनेको कारागार प्रमुख भुसालले बताएका छन्। यो व्यवस्थापन त्रुटिका कारण सुरक्षामाथि गम्भीर प्रश्न उठेको देखिन्छ।
सुरक्षाकर्मीले भागेकामध्ये केहीलाई नियन्त्रणमा लिन खोजेपनि ठूलो संख्यामा कैदी अझै फरार छन्।