प्रधानमन्त्री तथा एमाले अध्यक्ष केपी शर्मा ओलीले पार्टीभित्र असन्तोष बढाउने गतिविधि भइरहेको भन्दै आक्रोश व्यक्त गरेका छन्। च्यासलमा आयोजित पार्टी प्रवेश कार्यक्रममा सम्बोधन गर्दै ओलीले हालै खुलेको मदन भण्डारी ७५औं जन्मजयन्ती मूल व्यवस्थापन समितिको कार्यालयप्रति असन्तुष्टि प्रकट गरे। उनले अर्को वर्ष जन्मदिन मनाउनकै लागि छुट्टै कार्यालय खोलिएको टिप्पणी गर्दै यसलाई पार्टीविरुद्ध क्रियाशील हुने प्रयासको रूपमा व्याख्या गरे।

ओलीले भने, “अर्को वर्ष आउने असार १४ गतेको जन्मदिन मनाउनलाई अहिलेदेखि कार्यालय खोलेर पार्टीभित्र असन्तुष्टहरूलाई भेला गर्ने, जमात बनाउने भनेको के हो? यस्तो तरिका सहि होइन।”

यसक्रममा ओलीले पूर्वराष्ट्रपति विद्यादेवी भण्डारीलाई पनि कटाक्ष गरे। उनले भण्डारीले पार्टी सदस्यता आफैंले छोडेको दाबी गर्दै, “खोसेको होइन, राष्ट्रपति हुनकै लागि सदस्यता छोडेर जानुभएको हो,” भने। उनले सदस्यता नवीकरणबारे पनि कुनै छलफल पार्टीसँग नभएको बताए।

ओलीका अनुसार, “सदस्यता आवेदन पनि नगरी, नवीकरणका लागि पार्टीमा आएर कुरा पनि नगरी, बाहिरैबाट सदस्यता पाइन्छ भन्ने त होइन। दर्ता चलानी शाखामा पैसा बुझाएर मात्र नवीकरण हुँदैन।”

राष्ट्रपतिको कार्यकाल सकेर फर्किएपछि यस्तो समस्या उत्पन्न हुन्छ भन्ने कुरा आफूले कहिल्यै कल्पना नगरेको पनि ओलीले बताए। उनले भने, “दुई–दुई पटक राष्ट्रपति भइसकेको मान्छे, पार्टीमा फर्केर आएर समस्या खडा गर्नुहुन्छ भन्ने मैले कल्पनै गरेको थिइनँ।”

ओलीले भण्डारीमाथि पार्टीभित्र चुनाव हारेका, असन्तुष्ट र जनसंगठनमा पराजित भएकाहरूलाई भेला गरेर जमात बनाइरहेको आरोप लगाए। उनले भने, “पार्टीप्रति कहिल्यै पक्षमा नबोल्ने, सधैं असन्तुष्ट रहने, विभिन्न संगठनमा हारेका मान्छेहरूलाई संकलन गरेर असन्तुष्टहरूको जमात बनाएर हिँडिरहनु भएको छ।”

यसरी ओलीको टिप्पणीले पार्टीभित्र बढ्दो असन्तुष्टि र नेतृत्वबीचको मनोमालिन्य फेरि सतहमा आएको देखाएको छ।

पूर्वराष्ट्रपति विद्यादेवी भण्डारी र नेकपा (एमाले)का अध्यक्ष केपी शर्मा ओलीबीच हालैको राजनीतिक रस्साकस्सी खुलेर सार्वजनिक भएको छ । भण्डारीले जननेता मदन भण्डारीको ७५औँ जन्मजयन्ती मूल व्यवस्थापन समितिको कार्यालय उद्घाटन गर्दै ओलीप्रति प्रश्न उठाएपछि ओलीले तुरुन्तै च्यासलस्थित पार्टी कार्यालयबाट ती आरोपहरूको जवाफ फर्काएका हुन् ।

भण्डारीले आफूलाई पार्टी सदस्यता नदिएको भन्दै चर्को आपत्ति जनाउँदै पार्टी नेतृत्व र सरकारप्रति प्रश्न उठाएकी थिइन् । उनले आफू चार दशकभन्दा बढी समयदेखि पार्टीमा सक्रिय रहेको र एमाले जन्मनु भन्दा अघि नै राजनीतिमा होमिएको दाबी गर्दै एमालेप्रतिको निष्ठा व्यक्त गरिन् । तर, ओलीले भण्डारीको आरोप अस्वीकार गर्दै सदस्यता पार्टीले खोसेको नभई राष्ट्रपतिको पद सम्हाल्दा उहाँले आफैं परित्याग गरेको जिकिर गरे ।

ओलीले “राष्ट्रपति हुन जाँदा सदस्यता परित्याग गर्नुपर्ने संवैधानिक व्यवस्था भएकाले उहाँको सदस्यता स्वतः अन्त्य भएको हो” भन्दै पुनः सो सदस्यता नवीकरण असम्भव भएको बताए । उनले भण्डारीले राष्ट्रपतिपछि पार्टी कार्यालयका कर्मचारीलाई झुक्याएर रसिद लिएर सदस्यता लिएको आरोप समेत लगाउँदै “त्यस्तो कदमले सदस्यता पुनः जीवित हुँदैन, बरु नयाँ प्रक्रियाबाट मात्रै लिन सकिन्छ” भने ।

यसैबीच, ओलीले भण्डारीको हालको सक्रियतालाई असन्तुष्टहरूको जमात तयार गर्ने रणनीति भनेर व्याख्या गरे । उनले पार्टीभित्र चुनावमा पराजित वा असन्तुष्ट व्यक्तिहरूलाई भेला गरेर छुट्टै गतिविधि सञ्चालन गरेको आरोप लगाउँदै, पार्टी एकतालाई क्षति पुर्‍याउने खालको गतिविधि भएको टिप्पणी गरे ।

मदन भण्डारीको अर्को वर्षको जन्मजयन्ती मनाउनका लागि अहिले नै छुट्टै कार्यालय खोलिएको घटनाप्रति ओली झन् असन्तुष्ट देखिए । उनले यसलाई “पार्टीका विरुद्धमा भित्रभित्र क्रियाशील हुने गलत तरिका” भन्दै आलोचना गरे ।

भण्डारीले भने आफू निरन्तर एमालेकै कार्यकर्ता भएर काम गर्न चाहेको अभिव्यक्ति दिएकी थिइन् । तर ओली भने यसलाई पार्टीविरुद्ध असन्तुष्टहरूको जमात खडा गर्ने राजनीतिक चाल भएको ठहर गर्दै अघि बढेका छन् ।

यसरी, पूर्वराष्ट्रपति भण्डारीको पुनः सक्रियता र अध्यक्ष ओलीको प्रतिवादले एमालेभित्रको आन्तरिक तनाव खुला रूपमा सतहमा आएको छ । अब यो रस्साकस्सीले पार्टीको संगठनात्मक एकता र भविष्यमा कसरी असर पार्ने हो भन्ने प्रश्न खुलेर सतहमा आएको छ ।