कांग्रेस महामन्त्री गगन थापाले सहकारी ठगी प्रकरणमा सरकारको भूमिका ‘निकम्मा’ भएको आरोप लगाउँदै एक व्यक्तिमाथि मात्र बहस केन्द्रित गरेर हजारौं पीडितलाई बेवास्ता गरिएको बताएका छन्। संसदमा बोल्दै उनले सरकारले सुरु देखिनै निष्पक्ष र कठोर कदम चालेको भए आज यस्तो राजनीतिक कोकोहोलो सिर्जना नहुने धारणा राखे।

थापाले सूर्य थापाको नेतृत्वमा बनेको समितिका सुझाव र पूर्व अर्थसचिव रामेश्वर खनालको प्रतिवेदन कार्यान्वयन नभएको भन्दै आलोचना गरे। उनका अनुसार हालसम्म ५० हजारभन्दा बढी व्यक्तिलाई रकम फिर्ता सूचीमा राखिएको भए पनि जम्मा ४ हजारले मात्र पैसा पाएका छन्। उनले सहकारी ठगीका अभियुक्तहरूमाथि पार्टी हेरेर होइन, निष्पक्ष कारबाही भएको भए आज पीडितहरूले न्याय पाउने अवस्था हुने बताएका छन्।

यस्तै, उनले लिपुलेकको विषयमा भारत र चीनबीच भएको सम्झौताप्रति असहमति जनाउँदै यो राष्ट्रियताको गम्भीर सवाल भएको बताए। उनले यसलाई आन्तरिक राजनीति वा उग्र राष्ट्रवादको होडबाजीको विषय नबनाउन आग्रह गर्दै, “हाम्रो भूमिमाथि आँखा लगाउने कुरा कसैलाई स्वीकार्य छैन भन्ने एउटै सन्देश दुवै छिमेकीलाई दिनुपर्छ,” भने।

 थापाले प्रतिनिधिसभामा बोल्दै कांग्रेस–एमाले गठबन्धन सरकार आफ्नो न्यूनतम साझा कार्यक्रम र सहमतिबाट विचलित भएको आरोप लगाएका छन्। उनले गठबन्धनको आधार मानिएको ७ बुँदे सहमतिकै मुख्य विषयहरू अलपत्र परेको भन्दै सरकारप्रति असन्तुष्टि प्रकट गरे।

थापाले संविधान संशोधनको मुद्दा पहिलो बुँदामै रहेको स्मरण गराउँदै, “हामीले राजनीतिक स्थायित्वका लागि संविधान संशोधन गर्छौँ भनेका थियौँ, तर अहिलेसम्म सिन्को पनि भाँचेका छैनौँ” भने। उनले राष्ट्रिय सभामा बहुमत पाएपछि मात्र अघि बढ्ने बहानामा काम पन्छाउन नमिल्ने उल्लेख गर्दै प्रमुख प्रतिपक्षीसहितको संयन्त्र बनाएर तत्काल कदम चाल्न माग गरे।

आर्थिक सुधारमा पनि सरकारले गति हराएको उनको आरोप थियो। उनले सुरुवातमै २९ वटा कानुन संशोधन गरेर देखाएको ऊर्जा हराएको भन्दै, “सार्वजनिक खरिद ऐन, पूर्वाधार, कर कानुनमा सुधार गर्ने भनेका थियौँ। पूर्व अर्थसचिव रामेश्वर खनाल नेतृत्वको आयोगले दिएको ४०८ बुँदे प्रतिवेदनको ८० प्रतिशत काम सुरु पनि भएको छैन। हाम्रो ध्यान कहाँ गयो ?” प्रश्न गरे।

उनले सरकार बनेको सुरुवाती तीन–चार महिनामा देखिएको गति र ऊर्जालाई फेरि फर्काउन सके अझै धेरै काम गर्न सकिने भन्दै सरकार मुख्य प्राथमिकताबाट भड्किएको टिप्पणी गरे।

थापाले संसदको विशेष समयमा बोल्दै प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवामाथि लक्षित गर्दै सरकार सञ्चालनको शैलीमाथि कडा प्रश्न उठाएका छन्। उनले सरकारलाई एउटा गाडीको उदाहरण दिँदै, सांसदहरूले बाहिरबाट ढुंगा र हिलोबाट जोगाइरहे पनि ड्राइभिङ सिटमा बसेका नेताहरूले नै गाडीलाई भिरतिर हाँक्न खोजेको भन्दै आक्रोश व्यक्त गरे।

थापाले भने, “हामी एउटै गाडीमा छौँ, तर स्टेरिङ सिटमा हाम्रा नेताहरू हुनुहुन्छ। यो गाडी दुर्घटना नहोस् भन्ने हाम्रो चाहना हो। बाहिरबाट ढुंगा हानिन्छ, हिलो छ्यापिन्छ, हामी रोक्छौँ। तर स्टेरिङ समातेकाले त ठीक ढंगले चलाउनुपर्‍यो।”

उनले सरकारको गति र मति दुवै असन्तुलित भएको टिप्पणी गर्दै, “कहिलेकाहीँ घ्याच्च रोकिएको छ, कहिलेकाहीँ भिरतिर चढाइएको छ। जस्तो कि स्टेरिङ जसको हातमा छ, उसले जहाँ हानिदिए पनि हुन्छ भन्ने जस्तो व्यवहार भएको छ,” भने।

थापाले बन्द कोठाभित्र दिएका सुझावलाई बेवास्ता भएपछि संसदमै बोल्न बाध्य भएको स्पष्ट पारे। उनले आफू केवल आलोचक नभई सरकार सफल होस् भन्ने चाहने जिम्मेवार सांसद भएको दोहोर्‍याउँदै, “यो मेरो छटपटी हो, जिम्मेवारीबाट भाग्ने कुरा होइन,” भने।

उनले अझै समय र अवसर बाँकी रहेको भन्दै नेतृत्वलाई तत्काल काममा केन्द्रित भई स्थिति सुधार गर्न आग्रह गरे।