हुरिकेन एरिन हाल अमेरिकाको पूर्वी तट नजिकै उत्तरतर्फ अगाडि बढिरहेको छ र यसलाई श्रेणी–२ (Category–2) आँधीका रूपमा वर्गीकृत गरिएको छ। असामान्य रूपमा ठूलो आकारको यो आँधी समुद्रकिनारदेखि टाढै रहे पनि पूर्वी तटको अधिकांश समुद्र किनारमा खतरनाक अवस्था ल्याउन सक्ने चेतावनी दिइएको छ। उत्तर क्यारोलिनामा आपतकालीन अवस्था घोषणा गरिएको छ र आउटर बैंकसका केही क्षेत्रमा २० फिटभन्दा अग्ला विनाशकारी लहर र समुद्री छालाको जोखिमका कारण अनिवार्य उद्धार (evacuation) आदेश जारी गरिएको छ। यसैबीच, उत्तर क्यारोलिनामा मात्र यो साताभर जीवनघाती रिप करेन्टका कारण डजनौँ मानिसलाई उद्धार गरिएको छ। पूर्वी तटका अन्य राज्यहरूमा समेत अधिकारीहरूले समुद्रमा नजान चेतावनी दिएका छन्।

अमेरिकाको पूर्वी तटलाई असर पुर्‍याइरहेको हुरिकेन एरिनका कारण जीवनघाती रिप करेन्ट र अन्य जोखिम कम्तिमा दुई दिनसम्म रहने प्राधिकरणहरूले चेतावनी दिएका छन्। आँधी उत्तरतिर सर्दै गएको भए पनि यसको प्रभाव व्यापक रूपमा महसुस भइरहेको छ। उत्तर क्यारोलिनाको आउटर बैंकस क्षेत्रलगायत एटलान्टिक किनारका धेरै भागहरूमा भिषण वर्षा भइसकेको छ। राष्ट्रिय हुरिकेन केन्द्र (NHC) का अनुसार बिहीबार त्यहाँ अझै उष्णकटिबन्धीय आँधीको अवस्था कायम रहनेछ भने भर्जिनिया हुँदै उत्तरतिर न्यू इङ्गल्याण्डसम्म उच्च गतिका हावाहुरीको चेतावनी दिइएको छ।

एरिन प्रत्यक्ष रूपमा जमिनमा नपुग्ने अनुमान भए पनि यसको असर स्वरूप समुद्र किनार बन्द, बाढीको जोखिम र सडक अवरुद्ध जस्ता अवस्था देखा परेका छन्। हाल यसलाई श्रेणी–२ (Category–2) हुरिकेनका रूपमा वर्गीकृत गरिएको छ। यसअघि यो श्रेणी–५ सम्म पुगेको थियो। अधिकतम हावाको वेग करिब १६५ किमी प्रतिघण्टा (१०५ माइल प्रतिघण्टा) रहेको NHC ले जनाएको छ। राष्ट्रिय मौसम सेवा (NWS) ले चेतावनी दिँदै जीवनघाती लहर र रिप करेन्टले आगामी केही दिन पूर्वी तटमा ठूलो संकट उत्पन्न गर्ने जनाएको छ। रिप करेन्ट भनेको समुद्रतर्फ तान्ने शक्तिशाली पानीको प्रवाह हो, जसले पौडी खेल्नेहरूलाई समुद्रभित्र तान्न सक्छ।

गत वर्षको हुरिकेन हेलिनबाट अझै उकासिन नसकेको उत्तर क्यारोलिनामा यसै हप्ता गभर्नर जोश स्टाइनले आपतकालीन अवस्था घोषणा गरेका छन्। सोमबार मात्रै व्राइट्सभिल बीचमा डजनौँ पौडी खेल्नेहरूलाई उद्धार गर्नुपरेपछि उनले समुद्रमा नजान आग्रह गरेका थिए। आउटर बैंकसका ह्याटेरस र ओक्राकोक क्षेत्रमा टापु अलग हुने खतरा बढेकाले अनिवार्य उद्धार आदेश दिइएको छ। ह्याटेरसमा मोटेल सञ्चालिका ९६ वर्षीया क्यारोल डिलनले “मेरो उमेरमा जे आउँछ, सहनुपर्छ तर यो आँधीले हाम्रो जग्गा खाइदिन्छ कि भन्ने चिन्ता छ” भन्दै आफ्नो पीडा सुनाइन्।

यसबाहेक टर्क्स एण्ड कैकोस (ब्रिटिश क्षेत्र) मा आँधी आउँदा सार्वजनिक सेवा अस्थायी रूपमा रोकिएको छ भने प्युएर्टो रिकोमा उच्च गतिका हावाले बिजुली लाइन भत्काउँदा करिब १.५ लाख उपभोक्ता केही समय अन्धकारमा परेका थिए। सन् २०२५ को हुरिकेन सिजन जुन १ देखि नोभेम्बर ३० सम्म औसतभन्दा बढी आँधी आउने अनुमान गरिएको छ। समुद्रको बढ्दो तापक्रम र अनुकूल वायुमण्डलीय अवस्था यसको प्रमुख कारण मानिएको छ। तर, राष्ट्रपति ट्रम्प प्रशासनले मौसम अनुसन्धानको बजेट कटौती गरेको कारण भविष्यमुखी तयारी कमजोर हुने चिन्ता विज्ञहरूले व्यक्त गरेका छन्।