नेपाली हास्यकलाका लोकप्रिय अनुहार केदार घिमिरे ‘माग्ने बुढा’ को मुख्य अभिनय रहेको नयाँ चलचित्र ‘माग्ने राजा’ को आधिकारिक ट्रेलर सार्वजनिक भएको छ। ‘आरम्भ प्रोडक्सन’ को ब्यानरमा निर्माण गरिएको यस चलचित्रले हास्य, जीवनका संघर्ष, सामाजिक यथार्थ र भावनात्मक कथालाई समेट्ने प्रयास गरेको छ।

चलचित्रको विषयवस्तु र कलाकारहरू
ट्रेलरमा माग्दै हिँड्ने पात्रबाट राजा बन्ने एउटा असामान्य तर प्रेरणादायी कथा प्रस्तुत गरिएको छ। केदार घिमिरेले माग्ने राजा को रुपमा मुख्य भूमिका निर्वाह गरेका छन् भने वरुण बर्सा शिवाकोटी, विल्सन विक्रम राई, शिशिर बाङ्देल, शारदा गिरी, राधिक कँडेल, मिस पबी लगायतका कलाकारहरूले अभिनयमा साथ दिएका छन्।

निर्माण पक्ष
मुनाल घिमिरेको प्रस्तुति रहेको यो चलचित्रका निर्देशक ऋषि लामिछाने हुन्, जसले ट्रेलर सार्वजनिक गर्दै भनेका छन्, “यो ट्रेलर सिर्फ एउटा भिडियो हैन, यो मेरा सपना, संघर्ष र शान्त चिच्याहटहरूको स्वर हो। अब म एक्लो छैन, तपाईंहरू सबैको साथ चाहिएको छ! ‘माग्ने राजा’ तपाई हाम्रो आफ्नै कथा हो।”

चलचित्रको निर्माता  मधुसूदन शर्मा, लेखक समीप्य राज तिमल्सिना र छायांकन निर्देशक नरेन्द्र मैनाली रहेका छन्। चलचित्रको संगीतमा दीपक शर्मा र बाबुल गिरीले योगदान दिएका छन् भने कोरियोग्राफीमा कबिराज गहतराज र गम्भीर विष्ट छन्।

प्रदर्शन मिति र वितरण
‘माग्ने राजा’ चलचित्र आगामी भाद्र ६ गते (२२ अगस्ट, २०२५) देखि देशभरका हलहरूमा प्रदर्शनमा आउनेछ। चलचित्रको वितरण अधिकार आरआर फिल्म प्रोडक्सनले लिएको छ।

टेक्निकल पक्ष र उत्पादन टोली
सम्पादन मित्र डी. गुरुङ, कलर ग्रेडिङ मनोरञ्जन श्रेष्ठ, साउन्ड डिजाइन मिक्सिङ (५.१) मुकेश शाह, ट्रेलर सम्पादन शाहिल खानले गरेका छन्। पोस्ट प्रोडक्सन चितवनको ‘चलचित्र चौतारी’ले गरेको हो।

सार्वजनिक सन्देश
निर्देशक ऋषि लामिछानेले ट्रेलरमार्फत जनतालाई अपील गर्दै भनेका छन्, “म एक्लो छैन, तपाईंहरूको माया, साथ र आशीर्वादको अपेक्षा गरेको छु। ‘माग्ने राजा’ हाम्रो कथा हो, कृपया हेर्नुहोस्, साथ दिनुहोस्।”

‘माग्ने राजा’ नेपाली सिनेमा प्रेमीहरूको लागि मनोरञ्जन, सन्देश र भावनाको सम्मिश्रण लिएर आउँदैछ। अब हेर्न बाँकी छ, माग्ने राजा साँचो अर्थमा कति जनताको मन जित्न सफल हुन्छ।

“माग्ने राजा” सम्पूर्ण परिवारलाई चलचित्रको सफलताका लागि हाम्रो पनि शुभकामना ।