उर्मिला हायूको १६ जनाको परिवार बेपत्ता भएको रहस्यमय घटनामा थप विवरण बाहिरिएको छ। घर नजिकै बस्ने ‘एक्ले हायू’ नामक छिमेकीको परिवारले हराएका उर्मिलाहरूको भैँसीको हेरचाह गर्दै आएको खुलेको छ।

स्थानीय बासिन्दा सुमन कोइरालाका अनुसार उर्मिला हायूको परिवारले सामान्यतः छिमेकी ‘एक्ले हायू’को घर नजिकै भैँसी बाँध्ने गर्थे। तर, शनिबारदेखि परिवारले घाँसपात खुवाउन छाडेपछि, छिमेकी एक्ले हायूको परिवारले “शायद व्यस्त भए होलान्” भनेर ती भैँसीहरूलाई घाँसपात खुवाइरहेका थिए।

कोइरालाले भने: “तीन दिनसम्म भैँसी हेर्न कोही नआएपछि शंका लागेर हेर्न गइयो। तर घरमा कोही पनि थिएनन्, भित्र सामानहरू अस्तव्यस्त अवस्थामा थिए।”

उनका अनुसार, उर्मिला हायूको घर छिमेकीको घरबाट झण्डै १५–२० मिनेटको पैदल दुरीमा पर्छ, जसले गर्दा तत्कालै पत्तो पाउन ढिला भएको हो।

यही शंकास्पद अवस्था देखेपछि छिमेकीहरूले सोमबार बिहान करिब ९ बजे वडाध्यक्ष रबिन श्रेष्ठलाई खबर गरे, र त्यसपछि मात्र यो रहस्यमय बेपत्ता भएको घटनाबारे स्थानीय प्रशासन र प्रहरीलाई जानकारी दिइएको हो।

घटनास्थलको अवस्थाले थप रहस्य र जिज्ञासा उत्पन्न गराइरहेको छ। प्रहरी र स्थानीय प्रशासनले अनुसन्धानलाई तीव्रता दिँदै, परिवार सम्पर्कविहीन हुनुको कारण खोजी गर्न जनशक्ति र स्रोतहरू परिचालन गरिरहेको जनाइएको छ।

हालै एकैपटक बेपत्ता भएका १६ सदस्यीय हायू परिवारसँग सम्बन्धित एक अघिल्लो रहस्यमय घटना पनि बाहिरिएको छ।

स्थानीय बासिन्दा तथा शिक्षक सुमन कोइरालाका अनुसार, बेपत्ता उर्मिला हायूका श्रीमान् सने हायू करिब तीन वर्षअघि घरबाटै बेपत्ता भएका थिए।

उनको खोजी गर्दा कुनै जानकारी नभएपछि केही महिनापछि नजिकैको जंगलमा मानव हाडखोर फेला परेको थियो। स्थानीयहरूले ती हाडखोर सने हायूकै भएको अनुमान गरेका थिए। तर त्यसबारे विस्तृत अनुसन्धान भएको पुष्टि भने छैन।

अहिले बेपत्ता भएकाहरूमा उर्मिला हायू, उनका ६ छोरा, ६ छोरी, एक बुहारी र एक नातिनी छन्।
घटनाले गाउँमा झनै त्रास र शंका उत्पन्न गराएको छ, किनभने यसअघि नै एउटै परिवारका एक सदस्यको शंकास्पद रूपमा मृत्यु भएको इतिहास रहेको पाइएको हो।

भत्तासम्बन्धी रहस्यमय गतिविधि

उक्त परिवारले हालै वडा कार्यालयबाट तीन महिनाको सीमान्तीकृत भत्ता एकैपटक उठाएको समेत खुलेको छ।
कोइरालाका अनुसार:

• साउन लागेपछि भत्ता कार्ड नवीकरण गर्नुपर्ने भएकाले उर्मिलासहितका सदस्यहरू वडा कार्यालय गएका थिए।

• त्यहाँबाट १६ जनासहित बाहिर रहेका थप दुईजनाको समेत भत्ता लिई करिब २ लाख १६ हजार रुपैयाँ एकैपटक बुझेका थिए।

के यो सुनियोजित योजनाको हिस्सा हो?

• तीन वर्षअघि श्रीमान् सने हायू बेपत्ता, जंगलमा हाडखोर भेटियो

• अहिले उर्मिला हायू र उनका १५ जना पारिवारिक सदस्य एकैपटक गायब

• भर्खरै मात्र ठूलो रकमको भत्ता उठाइएको

• सम्पर्कविहीन हुने दिन सुँगुर काटेर भोज गरिएको

• भान्सामा आगलागीको संकेत, तर अन्य भागमा क्षति छैन

यी सबै घटनाक्रमहरूले यो प्रकरणलाई रहस्यमय र सम्भावित आपराधिक नियोजित गतिविधिको संकेत दिन थालेको छ। प्रहरीले यस विषयमा गहिरो अनुसन्धान सुरु गरिसकेको छ भने घटनाबारे थप तथ्यहरू पत्ता लगाउन प्राविधिक सहायता समेत लिइने तयारी गरिएको छ।

हायू परिवारको बेपत्ता हुनु केवल आकस्मिक घटनाक्रम नभई, यसको पछाडि पुराना शंकास्पद घटनाहरू, आर्थिक भत्ता संकलन, जंगलमा भेटिएको हाडखोर, र सम्पर्कविहीन हुनुको समय मिलानजस्ता धेरै संयोगहरू देखिन थालेका छन्। यसले प्रहरी अनुसन्धानलाई अझै गम्भीर बनाइरहेको छ।