अमेरिकाको न्यू मेक्सिको राज्यमा अचानक आएको भीषण बाढीले एक बाबु र उनका दुई सन्तान बगाएको राष्ट्रिय मौसम सेवा (NWS) ले जनाएको छ।

बचाउ टोलीले ती परिवारको खोजी जारी राखेको छ भने रुइडोसो गाउँमा अन्य उद्धार कार्यहरू पनि भइरहेका छन्।

हालसम्म कुनै घाइते वा मृत्यु पुष्टि नभए पनि रुइडोसोका मेयरले तीन जना सम्पर्कविहीन रहेको जानकारी दिएका छन्।

सार्वजनिक गरिएको भिडियोमा बाढीको पानीले एउटा घर बगाउँदै रुखहरूमा ठोक्किँदा टुक्रिएको देखिन्छ। मौसम सेवाले बाढीका कारण धेरै घरहरू स्थानान्तरण भएको जनाएको छ।

यो आपतकालीन घटना केही दिनअघि छिमेकी राज्य टेक्सासमा भएको विनाशकारी बाढीपछिको हो। टेक्सासमा गत शुक्रबारको बाढीपछि हालसम्म १०९ जनाको मृत्यु पुष्टि भइसकेको छ भने कम्तीमा १६१ जना अझै बेपत्ता छन्।

न्यू मेक्सिको बाढी: हालसम्म के–के थाहा छ?

▶ रेकर्ड तोड्ने बाढी
रुइडोसो गाउँको नदीको सतह २०.२४ फिट (६.१ मिटर) पुगेसँगै अमेरिकाको राष्ट्रिय मौसम सेवा (NWS) ले ‘फ्ल्यास फ्लड इमर्जेन्सी’ घोषणा गरेको छ। यो हालसम्मकै सबैभन्दा उच्च सतह हो।

▶ ३० भन्दा बढी उद्धार, ३ जना बेपत्ता
तीव्र बाढीबाट उद्धारका लागि ३० भन्दा बढी ‘स्विफ्ट वाटर रेस्क्यु’ भएको छ। एक बाबु र उनका दुई सन्तान अझै सम्पर्कविहीन छन्।

▶ ग्यास लिक र विद्युत् अवरोध
गाउँभर ग्यास लिक भएको र केही क्षेत्रमा विद्युत् सेवा बन्द भएको छ। इगल ड्राइभ क्षेत्रमा ग्यास आपूर्ति बन्द गरिएको छ।

▶ सडक बन्द र उद्धार कार्य जारी
बाढीले गाउँका दर्जनौं सडकहरू बन्द गरिएका छन्। कति जनाको उद्धार डुंगाबाट गरिएको हो भन्ने खुलाइएको छैन।

▶ घर बगाएको भिडियो सार्वजनिक
सामाजिक सञ्जालमा सार्वजनिक एक भिडियोमा बाढीले एउटा घर बगाउँदै रुखमा ठोक्किँदा टुक्रिएको देखिन्छ। बाढीले धेरै घरहरूलाई क्षति पुगेको रिपोर्ट छ।

▶ विस्थापितका लागि सामुदायिक केन्द्रमा आश्रय
गाउँका मेयर लिन क्रफोर्डका अनुसार गाउँमा औपचारिकरूपमा स्थानान्तरण नगरिए पनि जसका घरहरू डुबेका छन्, उनीहरूलाई सामुदायिक केन्द्रमा जान आग्रह गरिएको छ।

▶ राष्ट्रपतिको सहयोग माग
रुइडोसो गाउँले अमेरिकी राष्ट्रपति डोनाल्ड ट्रम्पसँग संघीय राहतको माग गरेको छ।

▶ रेस ट्रयाकका घोडा जोखिममा
रुइडोसो डाउन्स रेस ट्रयाकको पश्चिमी भाग बाढीले क्षतिग्रस्त बनाएको छ। सामाजिक सञ्जालमा घोडा थुनिएको फुटेज साझा गरिएको छ र स्थानीयले उद्धारको माग गरेका छन्।

▶ एक घण्टामै नदी १५ फिटभन्दा बढी बढ्यो
रियो रुइडोसो नदीको सतह एक घण्टामै ३ फिटबाट २०.२४ फिट पुगेको छ। यो गत वर्षको जुलाईमा मापन गरिएको १५.८६ फिटको भन्दा धेरै हो।

▶ वर्षा मापन र चेतावनी
रुइडोसो आसपास १.५ देखि ३.५ इन्चसम्म वर्षा भएको छ र अझै ०.१ इन्चसम्मको थप वर्षाको सम्भावना रहेको मौसम सेवाले जनाएको छ। सबै बाँध, पुल र सडक प्रभावित हुने सम्भावना रहेको भन्दै जनजीवन संकटमा परेको चेतावनी दिइएको छ।

▶ मेयरको भनाइ
“पानी छिट्टै आयो, र स्थिती निकै भयावह भयो,” मेयर क्रफोर्डले स्थानीय रेडियोमा भने। “हामी अझै केही मानिसहरू खोजिरहेका छौँ।”