अमेरिकी राष्ट्रपति डोनाल्ड ट्रम्पले टेक उद्यमी एलन मस्कप्रति कडा टिप्पणी गरेका छन्। ट्रम्पले मस्क पछिल्ला पाँच हप्तामा पूर्ण रूपमा “अफ द रेल्स” (नियन्त्रणबाहिर) पुगेको आरोप लगाएका छन् र उनको अवस्था “एक ट्रेन दुर्घटनासरह” भएको बताएका छन्।

 राष्ट्रपति ट्रम्पले भने, “एलन अब एक तेस्रो राजनीतिक दल स्थापना गर्न चाहन्छन्, जुन कुरा अमेरिका जस्तो देशमा कहिल्यै सफल भएको छैन। हाम्रो प्रणाली यस्ता दलका लागि बनेको छैन।” उनले तेस्रो दलहरूले “पूर्ण विघटन र अराजकता” मात्र ल्याउने उल्लेख गरे, जुन अहिले पनि “रेडिकल वामपन्थी डेमोक्र्याटहरूले गरिरहेकै छन्” भन्दै आरोप लगाए।

ट्रम्पले रिपब्लिकन पार्टीलाई “सुरचित र सशक्त मेसिन”को संज्ञा दिँदै भने, “हामीले अमेरिकी इतिहासको सबैभन्दा ठूलो विधेयक पारित गरेका छौं।” उनले उक्त विधेयकले विद्युतीय सवारी अनिवार्यता (EV Mandate) अन्त्य गरेको र अब अमेरिकी जनतालाई आफूले चाहेको सवारी किन्न स्वतन्त्रता मिलेको बताए।

“अब मानिसहरूले पेट्रोलियम, हाईब्रिड वा भविष्यका नयाँ प्रविधि अपनाउने स्वतन्त्रता पाएका छन्,” ट्रम्पले भने, “विद्युतीय सवारी जबर्जस्ती किन्ने बाध्यता हटेको छ, जसको म सधैँ विरोधी थिएँ।”

ट्रम्पले खुलासा गरे कि एलन मस्कले उनलाई पूर्ण समर्थन दिने बेला पनि उनले EV अनिवार्यता अन्त्य गर्ने विषय खुलेर बोलेका थिए। “मैले उनलाई सोधेँ — तिमीलाई थाहा छ त म यो अनिवार्यता अन्त्य गर्न चाहन्छु? उनले भने, कुनै आपत्ति छैन,” ट्रम्पले बताए, “म त्यसबेला निकै अचम्ममा परेँ।”

यसै सन्दर्भमा ट्रम्पले अर्को प्रसंग उल्लेख गर्दै भने, “एलनले आफ्नो निकट मित्रलाई नासाको नेतृत्वमा राख्न अनुरोध गरेका थिए। ती मित्र सक्षम थिए तर उनी आजसम्म कुनै पनि रिपब्लिकनलाई समर्थन नगरेका कट्टर डेमोक्र्याट रहेछन्। र त्यो व्यक्ति अन्तरिक्ष व्यापारमा संलग्न छन् — जुन नासा जस्तै सरकारी संस्थाको नेतृत्व गर्न असहज हुन्छ।”

ट्रम्पले अन्त्यमा भने, “मेरो पहिलो जिम्मेवारी भनेको अमेरिकी जनताको हित र सुरक्षाको रक्षा गर्नु हो।”

यस टिप्पणीसँगै ट्रम्प र मस्कबीचको राजनीतिक दूरी झनै प्रष्ट भएको छ, विशेषतः मस्कले हालै “अमेरिका पार्टी” गठनको घोषणा गरेपछि।

“म एलन मस्कलाई पछिल्लो पाँच हप्तादेखि पूर्ण रूपमा ‘अफ द रेल्स’ हुँदै गएको हेर्दा दुःखी छु, जसरी उनी अब एक ट्रेन दुर्घटनाको जस्तो बनेका छन्। उनले अब त अमेरिकामा कहिल्यै सफल नभएका तेस्रो राजनीतिक दलको सुरुवात गर्ने चाहना समेत व्यक्त गरेका छन् — अमेरिकी प्रणाली नै यस्ता दलहरूको लागि डिजाइन गरिएको देखिँदैन। तेस्रो दलहरूले गर्ने मुख्य काम भनेको पूर्ण अस्थिरता र अराजकता ल्याउनु हो, जुन अहिलेको रेडिकल वामपन्थी डेमोक्र्याटहरूबाट हामी पहिले नै झेल्दै आएका छौं, जसले आफ्नो आत्मविश्वास र मानसिक सन्तुलन गुमाइसकेका छन्।

तर अर्कोतर्फ रिपब्लिकन पार्टी भने एक सहज रूपमा चलिरहेको “मेसिन” हो, जसले हाम्रो देशको इतिहासमै सबैभन्दा ठूलो प्रकारको विधेयक पारित गरेको छ। त्यो एक उत्कृष्ट विधेयक हो, तर एलन मस्कका लागि दुर्भाग्यपूर्ण कुरा के भने, सो विधेयकले विद्युतीय सवारी अनिवार्यता (EV Mandate) लाई समाप्त गरिदिएको छ — जसले छोटो अवधिमा सबैलाई जबर्जस्ती विद्युतीय सवारी किन्न बाध्य पार्थ्यो। म त यसको सुरु देखिनै कडा विरोधी थिएँ। अब मानिसहरूले आफ्नो इच्छा अनुसार जस्तोसुकै गाडी किन्न पाउनेछन् — पेट्रोलियम गाडी, राम्रो प्रदर्शन गरिरहेका हाईब्रिडहरू, वा भविष्यका नयाँ प्रविधिहरू — तर अबदेखि विद्युतीय सवारी अनिवार्य छैन।

मैले दुई वर्षदेखि यस विषयमा प्रचार गर्दै आएको छु, र वास्तवमा एलन मस्कले मलाई पूर्ण समर्थन दिएका बेला मैले उनीसँग सोधेँ — के तिमीलाई थाहा छ कि म EV अनिवार्यताका पूर्ण अन्त्यको पक्षमा छु? किनभने त्यो कुरा त म हरेक भाषणमा र प्रत्येक संवादमा भनिरहेकै थिएँ। उनले भने, “मलाई त्यसमा कुनै समस्या छैन।” त्यो सुनेर म एकदमै अचम्ममा परेँ।

त्यसका साथै, एलनले उनका एकजना निकट मित्रलाई नासाको प्रमुख बनाइदिन अनुरोध गरेका थिए। ती मित्र एकदम सक्षम व्यक्ति थिए भनेर म मान्दछु, तर म त्यसबेला अचम्मित भएँ जब थाहा पाएँ कि उनी त गहिरो डेमोक्र्याट हुन्, र उनले पहिले कहिल्यै रिपब्लिकनलाई समर्थन वा सहयोग गरेका थिएनन् — शायद एलन पनि त्यस्तै होलान्। साथै, मलाई यो पनि अनुपयुक्त लाग्यो कि एलनको नजिकको साथी, जो स्वयं अन्तरिक्ष उद्योगमा संलग्न छन्, उनलाई नासाको नेतृत्व दिइयो — जबकि नासा त एलनको व्यावसायिक जीवनको ठूलो हिस्सा हो।

मेरो पहिलो जिम्मेवारी भनेको अमेरिकी जनताको सुरक्षा गर्नु हो!” – अमेरिकी राष्ट्रपति डोनाल्ड ट्रम्प