नेपाली कांग्रेसको केन्द्रीय समिति बैठकमा नेकपा एमाले बाहेक अन्य दलहरूसँग गठबन्धनको विकल्प खोज्नुपर्ने आवाज उठेको छ। सोमबारदेखि सुरु भएको बैठकमा सरकारको कार्यसम्पादन, पार्टीको भूमिका, र आगामी महाधिवेशनलगायत १३ एजेण्डामा छलफल भइरहेको छ। मंगलबारको बैठकमा केन्द्रीय सदस्य डा. डिला संग्रौलाले आगामी निर्वाचनका लागि एमालेबाहेक अन्य दलहरूसँग चुनावी गठबन्धनको सम्भावना खोज्नुपर्ने धारणा राखे। उनका अनुसार एमाले नै कांग्रेसको प्रमुख प्रतिस्पर्धी भएकाले विकल्पका रूपमा अन्य दलहरूसँग सहकार्य आवश्यक पर्न सक्छ।

उनले वर्तमान गठबन्धनमा कांग्रेसको उपस्थिति प्रभावहीन देखिएको, मन्त्रीहरूको भूमिका कमजोर भएको र सबै राम्रा कामको श्रेय प्रधानमन्त्रीलाई मात्रै जाने अवस्थाको अन्त्य हुनुपर्ने तर्क गरे। पार्टीभित्र सधैँ एकै व्यक्तिहरूले मन्त्री बन्ने मानसिकता गलत भएको भन्दै उनले कांग्रेसले स्पष्ट रणनीति बनाएर सरकारमा प्रभावकारी उपस्थिति सुनिश्चित गर्नुपर्ने धारणा राखे।

यस्तै, सोमबारको बैठकमा संस्थापनइतर समूहका नेता डा. शेखर कोइरालाले पनि एमालेसँगको गठबन्धनको औचित्यमाथि प्रश्न उठाए। उनले ०७९ सालको निर्वाचनमा माओवादी केन्द्रसँग चुनावी गठबन्धन गरेको कांग्रेस अहिले एमालेसँग सरकार चलाउन पुगेको भन्दै यसको कारण स्पष्ट गर्न सभापति देउवालाई आग्रह गरे। सात बुँदे सहमतिको आधारमा गरिएको सत्ता सहकार्यको मुख्य मुद्दा रहेको संविधान संशोधनको प्रगति नभएको भन्दै कोइरालाले आलोचना गरे।

बैठकमा कोइराला र सांसदसमेत रहेका व्यवसायी नेता विनोद चौधरीबीच भनाभनसमेत भयो। चौधरीले आफूलाई केन्द्रीय सदस्य बनाउन नियम मिचिएको कोइरालाको आरोपको जवाफ दिँदै नियुक्ति प्रक्रिया पूर्ण रूपमा विधिसम्मत रहेको दाबी गरे। उनले प्रतिनिधिसभा निर्वाचनमा शेखर कोइरालाले आफूलाई हराउन रणनीति बनाएको आरोप लगाउँदै कोइरालाको नेतृत्वमा पार्टी चल्न नसक्ने टिप्पणी गरे। चौधरीले फरक पेसाबाट आएका व्यक्तिहरूमाथि राजनीतिका ढोका बन्द गर्ने मानसिकता राख्नेलाई चुनौती दिँदै यस्तो संकीर्ण सोचको अन्त्य गर्नुपर्ने बताए।

साथै, केन्द्रीय समिति बैठकमा कांग्रेसको १५औँ महाधिवेशनको मिति तोक्न सभापति शेरबहादुर देउवालाई दबाब बढेको छ। डा. संग्रौला र डा. कोइरालाले विधानअनुसार ०८२ मंसिरभित्र महाधिवेशन गर्नैपर्ने बताएका छन्। कोइरालाले पदाधिकारीहरू महाधिवेशनको तयारीमा देखिए पनि स्पष्ट मिति तोकिएको छैन भन्दै असन्तुष्टि जनाए। नैनसिंह महर लगायतका नेताहरूले समेत तल्लो तहसम्म कार्यकर्ताहरूमा अन्योल चिर्न तत्काल मिति र कार्यतालिका तय गर्नुपर्ने माग गरे।

नौ महिनापछि सुरु भएको केन्द्रीय समिति बैठकमा महामन्त्री गगन थापाले प्रस्तुत गरेका १३ वटा एजेण्डामाथि छलफल जारी छ। १०० दिने अभियानको समीक्षा, भ्रातृ संस्था र जनसम्पर्क समितिसम्बन्धी व्यवस्थापन, विधान संशोधनको तयारी र सरकारको समग्र समीक्षा बैठकको मुख्य विषय बनेका छन्।