देशभरिका १४ उत्कृष्ट किसानलाई राष्ट्रपति बाट सम्मान, जनही २ लाख रुपैयाँ पुरस्कार

काठमाडौं/ सरकारद्वारा देशका विभिन्न प्रदेशका १४ जना उत्कृष्ट किसानलाई ‘राष्ट्रिय उत्कृष्ट कृषक पुरस्कार’ प्रदान गरिएको छ। ।

कृषि तथा पशुपन्छी विकास मन्त्रालयको आयोजनामा सम्पन्न उक्त कार्यक्रममा सातवटै प्रदेशबाट प्रतिनिधित्व हुने गरी प्रति प्रदेश दुईजना किसानलाई छनोट गरिएको थियो।

पुरस्कृत किसानहरूको सूची:

• कोशी प्रदेश: सुरेशकुमार मेहता (आर्य कृषि फर्म), रमेश साह (रमेश कृषि फर्म)

• मधेस प्रदेश: भरतकुमार यादव (शम्भुनाथ माछा फर्म), हिराबहादुर थापा मगर (निजगढ केरा एग्रिकल्चर)

• बागमती प्रदेश: चेतप्रसाद ढकाल (कालिका पशु विकास केन्द्र), दयाराम मचामसी (ग्रिनलाइन एग्रो प्रालि)

• गण्डकी प्रदेश: छिरिङढोका गुरुङ (ङवाङ हिसी कृषि तथा पशुपन्छी अर्गानिक फर्म), बाटुली तिवारी (मित्र वाटिका कृषि फर्म)

• लुम्बिनी प्रदेश: जयपाल मौर्य (खाद्यान्न बाली), सुवास कुर्मी (शान्ति उन्नत पशुपालन तथा माछा फर्म)

• कर्णाली प्रदेश: गोविन्द ओली (तरकारी खेती), भरतनाथ योगी (सुन्तला खेती)

• सुदूरपश्चिम प्रदेश: प्रेमप्रसाद जोशी (खप्तड पशुपन्छी तथा कृषि फर्म), लोकबहादुर थापा (कैलाशेधरी कृषि तथा पोल्ट्री फर्म प्रालि)

राष्ट्रपतिको सम्बोधनमा कृषिमा नवप्रवर्तन र युवालाई आकर्षित गर्न जोड

राष्ट्रपति पौडेलले समारोहमा सम्बोधन गर्दै कृषिलाई आधुनिक, वैज्ञानिक र व्यवसायिक बनाउँदै युवामैत्री स्टार्टअप कार्यक्रम सुरु गर्नुपर्नेमा जोड दिए। विदेश फर्किएका युवाहरूले सिकेर ल्याएको सीप प्रयोग गरी कृषि क्षेत्रमा सहभागी हुने वातावरण तयार पार्न नीति निर्मातादेखि व्यवसायिक क्षेत्र सबैको ध्यान जानुपर्ने उनले उल्लेख गरे।

उनले कृषकको उत्पादनलाई बजारसम्म पुर्‍याउने व्यवस्था, समयमा बीउ र मल आपूर्ति, प्रविधिको सहज पहुँच, कृषकको समस्या पहिचान र समाधान, श्रमको सम्मान, सहुलियतपूर्ण कर्जा तथा कृषि बीमाजस्ता विषयहरूलाई राज्यको प्राथमिकतामा राख्नुपर्नेमा पनि विशेष जोड दिए।

कृषिमन्त्रीको भनाइ: यो ऐतिहासिक प्रेरणाको अवसर

कृषिमन्त्री रामनाथ अधिकारीले उक्त समारोहमा बोल्दै, “आजको दिन समग्र कृषि क्षेत्रका लागि प्रेरणा र गर्वको दिन हो,” भने। उनले मन्त्रालयले स्वीकृत गरेको ‘राष्ट्रिय उत्कृष्ट कृषक पुरस्कार कार्यक्रम कार्यान्वयन कार्यविधि २०८१’ अन्तर्गत उत्कृष्ट किसानहरूलाई सम्मान गर्न पाउनु गौरवपूर्ण उपलब्धि भएको बताए।

उनका अनुसार, यो पुरस्कारले कृषिलाई आत्मसम्मान र सम्भावनाको पेसाका रूपमा स्थापित गर्न र समाजमा कृषि पेशाप्रतिको दृष्टिकोण परिवर्तन गर्न टेवा पुर्‍याउने विश्वास व्यक्त गरे।

यस कार्यक्रमले कृषकलाई प्रोत्साहन गर्नुका साथै कृषि पेशाको सामाजिक प्रतिष्ठा र सम्भाव्यताको पहिचान गराउने महत्त्वपूर्ण प्रयासका रूपमा लिइएको छ।