लस एन्जलस/ राष्ट्रपति डोनाल्ड ट्रम्पको निर्देशनमा मंगलबार सयौं अमेरिकी मरीन सैनिकहरू लस एन्जलस क्षेत्रमा तैनाथ भएका छन्। राज्यका गभर्नर गेभिन न्यूजम र अन्य स्थानीय नेताहरूको विरोधका बाबजुद ट्रम्पले यो कदम “शान्ति र कानुन व्यवस्था कायम गर्न” आवश्यक भएको भन्दै बचाउ गरेका छन्। साथै, उनले ४,००० नेशनल गार्ड पनि सक्रिय गरिसकेका छन्।

शुक्रबारबाट सुरु भएका आप्रवासी नियन्त्रण अभियानपछि लस एन्जलसमा दैनिकरूपमा प्रदर्शन भइरहेका छन्। यद्यपि क्यालिफोर्नियाका अधिकारीहरूले यी प्रदर्शनहरूलाई प्रायः शान्तिपूर्ण भन्दै ट्रम्पको प्रतिक्रिया “अत्यधिक” भएको बताएका छन्।

मरीनहरू दंगा नियन्त्रणमा होइन, संघीय सम्पत्ति सुरक्षामा खटाइने

एक अमेरिकी अधिकारीका अनुसार करिब ७०० मरीनहरू विशिष्ट स्थानमा तैनाथ हुनुअघि तयारी अवस्थामै थिए। सैनिकहरूसँग पक्राउ गर्ने अधिकार छैन; उनीहरू संघीय भवन र कर्मचारीको सुरक्षा मात्र गर्नेछन्।

हाल लस एन्जलस क्षेत्रमा करिब २,१०० नेशनल गार्ड तैनाथ छन्, र अझै आउने क्रम जारी छ। एक वरिष्ठ पेन्टागन अधिकारीका अनुसार यो तैनाथीमा अनुमानित १३४ मिलियन डलर खर्च हुनेछ। रक्षा मन्त्रालयको बजेट प्रमुख ब्रीन म्याकडोनेलले बताएअनुसार यसमा सैनिकहरूको यात्रा, बसोबास र खानाको खर्च समावेश छ।

न्यूजमको कडा प्रतिक्रिया : “सेनालाई मोहरा बनाइएको छ”

गभर्नर न्यूजमले X (पूर्व ट्विटर) मा लेखे,

“यति धेरै खर्च गरेर पूर्वसैनिकका लागि पोषण र बासको सुविधा दिन सकिन्थ्यो। सेनालाई राजनीतिक मोहरा बनाउनु दु:खद हो।”

लस एन्जलसकी मेयर करेन बासले KABC लाई बताइन् कि सोमबार १०० भन्दा बढी व्यक्तिहरू पक्राउ परेका छन्, तर बहुमत प्रदर्शनकारीहरू शान्तिपूर्ण थिए। उनले थप भनिन्,

“जो Downtown मा तोडफोड र लुटपाटमा संलग्न छन्, तिनीहरू आप्रवासी समुदायप्रति जिम्मेवार छैनन् – तिनीहरूलाई कारवाही गरिनेछ।”

ट्रम्पको चेतावनी र ‘Insurrection Act’ को सम्भावना

ओभल अफिसमा पत्रकारसँग कुरा गर्दै राष्ट्रपति ट्रम्पले भने,  “हामीले सेना नपठाएको भए लस एन्जलस अहिले जलिरहेको हुन्थ्यो। गार्ड तबसम्म रहनेछ जबसम्म पूर्ण सुरक्षा सुनिश्चित हुँदैन।”

उनले Insurrection Act (विद्रोह नियन्त्रण ऐन) प्रयोग गर्ने संकेत पनि दिए, जसले सैन्यलाई नागरिक सुरक्षामा प्रत्यक्ष संलग्न हुन अनुमति दिन्छ।

तर गभर्नर न्यूजमले ट्रम्पमाथि आरोप लगाए कि उनले राजनीतिक लाभका लागि सैनिक पठाएर अवस्था झनै बिगारेका छन्।

“यो खुल्लमखुल्ला शक्ति दुरुपयोग हो,” उनले X मा लेखे।

राष्ट्रियस्तरमा आलोचना, डेमोक्र्याट नेताहरू आक्रोशित

सेनामा सशक्त प्रभाव राख्ने डेमोक्र्याट सांसद जैक रीडले भने,

“अमेरिकी जनताले सधैं स्पष्ट संकेत दिएका छन् — हाम्रो भूमिमा सैनिकबाट कानुन कार्यान्वयन स्वीकार्य छैन।”

हिंसात्मक घटनाहरू र व्यापक गिरफ्तार

प्रदर्शनहरू मुख्य रूपमा शान्तिपूर्ण भए पनि केही प्रदर्शनकारीहरूले ढुंगा प्रहार, गाडी जलाउने, राजमार्ग रोक्ने, र लुटपाट गरेका छन्। एप्पल स्टोर र CVS फार्मेसी लुटिएका छन्।

पुलिसले केही प्रदर्शनकारीहरूलाई मोलोटोभ ककटेलमार्फत हत्या प्रयास र अधिकारीमाथि आक्रमण जस्ता आरोपमा पक्राउ गरेको जनाएको छ।

ट्रम्पको आप्रवासन कारवाही र विरोधको लहर

यी सबै घटनाको मूल जड राष्ट्रपति ट्रम्पको नयाँ आप्रवासन नीति हो। गृह सुरक्षा मन्त्री क्रिस्टि नोएमले सोमबार भनेकी थिइन् कि “अनधिकृत आप्रवासीहरूविरुद्ध थप कारवाहीहरू हुनेछन्।”

सोमबार सयौं प्रदर्शनकारीहरूले संघीय हिरासत केन्द्रअगाडि जम्मा भई “सबैलाई रिहा गर” नारासहित प्रदर्शन गरे। प्रहरीहरूले ग्यास क्यानिस्टर प्रयोग गरेर भीड तितरबितर पारे। साँझपख Little Tokyo क्षेत्रमा प्रदर्शनकारी र सुरक्षाकर्मीबीच ठोक्काम पनि भएको थियो।

प्रदर्शन अमेरिका भर फैलिदै

लस एन्जलस मात्र नभई न्युयोर्क, फिलाडेल्फिया, सान फ्रान्सिस्को, अष्टिनलगायत नौ वटा सहरमा प्रदर्शन देखिएको छ। अष्टिनमा प्रहरीले भीडसँग झडप गर्दा दर्जनौं व्यक्तिहरूलाई नियन्त्रणमा लिएको छ।

हिलारी क्लिन्टनले लस एन्जलसको ‘anti-ICE’ दङ्गालाई ‘शान्तिपूर्ण प्रदर्शन’ भनेपछि सामाजिक सञ्जालमा चर्को आलोचना, ट्रम्पमाथि आरोप लगाएको पोस्टलाई “भ्रमपूर्ण” भन्दै आलोचकहरू आक्रोशित

अमेरिकाकी पूर्व विदेशमन्त्री हिलारी क्लिन्टनले लस एन्जलसमा भएको आइस (ICE) विरोधी दङ्गालाई ‘शान्तिपूर्ण प्रदर्शन’ भन्दै राष्ट्रपति डोनाल्ड ट्रम्पलाई “अराजकता फैलाएको” आरोप लगाएको पोस्टपछि तीव्र आलोचना भोगेकी छन्। आलोचकहरूले उक्त पोस्टलाई “भ्रमपूर्ण” र “यथार्थविरुद्धको बयान” भन्दै व्यापक रूपमा ट्रोल गरेका छन्।

‘Comments Off’ – आलोचना नियन्त्रण गर्न क्लिन्टनको प्रयास?

‘Libs of TikTok’ नामक चर्चित कन्जर्भेटिभ X खाताले हिलारीको पोस्टको स्क्रिनसट राख्दै लेख्यो:
“कमेन्ट अफ गरिएको छ, हाहा! उनलाई ratio सहन सक्दैनन्। हिलारी क्लिन्टनको दृष्टिमा यस्ता हुन्छन् ‘शान्तिपूर्ण प्रदर्शनहरू।’”
उनको पोस्टमा केवल क्लिन्टनले फलो गरेका व्यक्तिहरूले मात्र प्रतिक्रिया दिन सक्ने व्यवस्था गरिएको थियो।

क्लिन्टनको मूल पोस्ट यस्तो थियो:

“क्यालिफोर्नियाका गभर्नर ग्याविन न्यूजमले आफ्नो राज्यमा शान्तिपूर्ण प्रदर्शन भएपछि राष्ट्रिय सुरक्षागार्ड मागेका थिएनन्। तर ट्रम्पले तिनलाई पठाए। यो ६० वर्षमा पहिलो पटक हो जब कुनै राष्ट्रपति यस्तो कदम चाल्छ। ट्रम्पको लक्ष्य क्यालिफोर्नियावासीको सुरक्षाभन्दा अराजकता फैलाउनु हो – किनकि अराजकता ट्रम्पका लागि लाभदायक छ।”

तर प्रतिक्रियाहरूमा आगो झरी झरेको थियो।

फ्लोरिडाकी रिपब्लिकन सांसद अन्ना पाउलिना लुनाले लेखिन्,
“यी शान्तिपूर्ण होइनन्, हिलारी।”

एक प्रयोगकर्ताले एलन मस्कलाई ट्याग गर्दै लेखे,
“हिलारी जस्तो सार्वजनिक व्यक्तित्वले आफ्नो कमेन्ट बन्द गर्न नपाउनु पर्ने होइन र?”

दङ्गा र हिंसाको दृश्यसँगै क्लिन्टनमाथि झन् बढी चर्को आलोचना

जुन ७ तारिख शनिबार, ICE का अधिकारीहरूले अवैध आप्रवासीहरूको छानबिनका लागि कारवाही चलाएपछि लस एन्जलसमा विरोध प्रदर्शन सुरु भयो, जुन शनिबार साँझदेखि हिंसात्मक बन्यो। प्रदर्शनकारीहरूले संघीय भवनमाथि आक्रमण गरे, गाडीहरू जलाए, सडक कब्जा गरे, ढुंगा र पटाका प्रहार गरे र स्टोरहरू लुटपाट गरे।

यसैबीच, राष्ट्रपति ट्रम्पले गभर्नर न्यूजमलाई बाइपास गर्दै राष्ट्रिय सुरक्षागार्ड तैनाथ गरे। उनले शनिवार २,००० नेशनल गार्ड पठाउने घोषणा गरे। त्यसपछि क्यालिफोर्नियाले ट्रम्प प्रशासनमाथि “नेशनल गार्डको फेडरलाइजेशन” प्रयास गरेको आरोप लगाउँदै मुद्दा दायर गर्‍यो।

700 युएस मरीन थप तैनाथ

अमेरिकी उत्तरी कमाण्डले सोमबार जानकारी दियो कि,

“दोस्रो बटालियन, ७ औं मरीन डिभिजनका ७०० मरीनहरू लस एन्जलस क्षेत्रका संघीय सम्पत्तिको सुरक्षा गर्न खटिएका छन्।”

ट्रम्पको जवाफ Truth Social मा:

“यदि मैले लस एन्जलसमा सैनिक नपठाएको भए, त्यो सहर अहिले जलिरहेको हुन्थ्यो।”

ट्रम्पले अझ लेखे,

“२५,००० घरहरू जनवरीको डढेलोमा जले, गभर्नर र मेयरको असक्षम नेतृत्वले पुनर्निर्माण प्रक्रियामा ढिलाइ भयो। संघीय अनुमति प्रक्रिया लगभग पूरा भइसकेको छ, तर सहर र राज्यको प्रक्रिया अस्तव्यस्त छ।”

हिलारी क्लिन्टनको ‘शान्तिपूर्ण प्रदर्शन’ भन्ने भनाइले जनताको आक्रोशको सामना गर्नु पर्‍यो। हिंसा, तोडफोड र आगजनीका दृश्यबीच उनको बयानले न त यथार्थ समेटेको देखियो, न त जनभावनालाई। आलोचकहरूले यसलाई राजनीतिप्रेरित भ्रम फैलाउने प्रयासका रूपमा लिएका छन्। ट्रम्प प्रशासनको कडा प्रतिक्रिया र सेनाको तैनाथीसँगै अब यो विषय अझ गम्भीर राजनीतिक विवादमा परिणत हुने देखिन्छ।

क्यालिफोर्नियाका रिपब्लिकन सांसद डारेल इस्साद्वारा एलएमा आइस अफिसरमाथि आक्रमण हुँदा ढिलो सहायता गरेको भन्दै LAPD विरुद्ध अनुसन्धानको माग

क्यालिफोर्नियाको ४८ औं निर्वाचन क्षेत्रका प्रतिनिधि तथा अमेरिकी प्रतिनिधिसभाको न्यायिक समितिका वरिष्ठ सदस्य डारेल इस्साले लस एन्जलसमा भएको हिंसात्मक घटनाबारे गम्भीर चासो व्यक्त गर्दै LAPD (लस एन्जलस प्रहरी विभाग) ले आइस (ICE) का अधिकारीहरूलाई ढिलो सहायता गरेको आरोपमा संसदीय तहको पूर्ण अनुसन्धानको माग गरेका छन्।

मंगलबार सार्वजनिक विज्ञप्तिमा इस्साले भने, “हामीलाई जान्न जरुरी छ—के लस एन्जलस शहर वा क्यालिफोर्निया राज्यको राजनीतिक नेतृत्व, वा अरू कसैले LAPD लाई आइस अधिकारीहरूका आपतकालीन अनुरोधहरूलाई बेवास्ता गर्न निर्देशन दिएको हो?”

DHS अनुसार दुई घण्टासम्म पर्खनुपर्‍यो

शुक्रबार राति लस एन्जलसमा आइस छापा विरुद्ध प्रदर्शन हिंसात्मक बन्दा करिब १,००० जना दङ्गाकारीहरूले संघीय कानून प्रवर्तन भवन घेरिरहेका बेला, आइस अधिकारीहरूलाई मद्दतका लागि दुई घण्टा कुर्नुपरेको थियो। गृह सुरक्षा विभाग (DHS) को अनुसार, उक्त समयमा प्रदर्शनकारीहरूले टायर काट्ने, भवनहरूमा क्षति पुर्‍याउने, र सार्वजनिक सम्पत्तिहरू तोडफोड गरेका थिए।

DHS को शनिबारको विज्ञप्तिमा भनिएको छ, “लस एन्जलस प्रहरीले सहायता गर्न २ घण्टा लगायो। यसबीचमा आइस अधिकारीहरू आक्रमणमा परे।”

LAPD प्रमुखको खण्डन, DHS को अडान कायम

LAPD प्रमुख जिम म्याकडोनेलले आइतबार पत्रकार सम्मेलनमा DHS को दावी खारेज गर्दै भने, “हामी प्रहरीहरूका लागि यस्तो कुरामा विश्वास गर्नु असम्भव छ। LAPD मा यो कहिल्यै भएको थिएन।”

उनका अनुसार वास्तविक प्रतिक्रिया समय ४० मिनेट मात्र थियो र ढिलो हुनुमा ट्राफिक मुख्य कारण थियो।

तर DHS सहायक सचिव ट्रिसिया म्याकलाफलिनले सोमबार फक्स न्यूजलाई भने, “सत्य के हो भने LAPD ले सहायता गर्न २ घण्टा लगायो। यसबीचमा आइस अधिकारीहरू घेरामा परेका थिए, टायर काटिए, भवनहरू बिगारिए र संघीय सम्पत्तिमा तोडफोड भयो। अहिले LAPD ले शान्ति कायम गर्न सक्रियताका साथ काम गरिरहेकोमा हामी आभारी छौं।”

राजनीतिक निर्देशनमा प्रहरी नचल्नु पर्छ: इस्सा

डारेल इस्साले थप भने, “हामीले यो पनि जान्नुपर्छ—के कसैले LAPD लाई ‘stand down’ गर्न भनेका थिए? जबकि हाम्रा आइस अधिकारीहरू आफ्नो कर्तव्य पूरा गर्दै हिंस्रक भीडको आक्रमणमा परेका थिए।”

हिंसात्मक प्रदर्शन, सुरक्षाकर्मीहरू घाइते

शुक्रबार साँझबाट सुरु भएको प्रदर्शन शान्तिपूर्ण देखिए पनि अन्त्यमा हिंसात्मक भयो। दङ्गाकारीहरूले LAPD मुख्यालयमा झ्याल तोडे, प्रहरीहरूमाथि पटका र ढुंगाले आक्रमण गरे। फक्स न्यूज संवाददाता बिल मेलुगिनले जनाए अनुसार सोमबारसम्म ५० जना प्रदर्शनकारी पक्राउ परेका छन्। अभियोगमा ‘हत्या प्रयास’ र ‘घातक हतियार प्रयोग गरेर आक्रमण’ समेत परेका छन्। पाँच LAPD अधिकारी र पाँच घोडा सामान्य रूपमा घाइते भएका छन्।

डेमोक्र्याट नेतृत्वप्रति आलोचना

क्यालिफोर्नियाको डेमोक्र्याटिक नेतृत्वमाथि कयौँ रिपब्लिकन नेताहरूले राष्ट्रपति डोनाल्ड ट्रम्पलाई दोष दिँदै हिंसात्मक प्रदर्शनलाई “शान्तिपूर्ण” भनेर व्याख्या गरेकोमा आलोचना गरेका छन्।