अमेरिकाको उत्तरपश्चिमी राज्य वासिङ्टनमा एक ट्रक दुर्घटनामा परेपछि सडकमा झण्डै २५ करोड माहुरीहरु उडेर भागे पछि प्रशाशन र प्रहरी लाइ निकै टाउको दुखाइ भएको छ। माहुरी हरु रूपमा निस्किएपछि स्थानीय अधिकारीहरूले आपतकालीन चेतावनी जारी गरेका छन्।

शुक्रबार वासिङ्टन राज्यको ह्वाटकम काउन्टीमा क्यानाडाको सिमानाबाट करिब ४८ किलोमिटर दक्षिणमा पर्ने ग्रामीण क्षेत्रमा महमाखी बोकेको ठूलो ट्रक पल्टिएको थियो। उक्त ट्रकमा करिब ३१,७५१ किलोग्राम (७० हजार पाउन्ड) सक्रिय माहुरीका घारहरू थिए।

ह्वाटकम काउन्टी शेरेफ कार्यालयले सामाजिक सञ्जालमार्फत जनाउँदै भनेको छ, “२५ करोड माहुरी अहिले खुला छन्। सम्भावित आक्रमण र झुण्डको जोखिमका कारण उक्त क्षेत्रबाट टाढा रहन अनुरोध गरिन्छ।” यस घटनापछि सम्बन्धित क्षेत्रको केही भाग सिल गरिएको छ र सर्वसाधारणलाई कम्तीमा २०० यार्ड (१८२ मिटर) टाढा रहन आग्रह गरिएको छ।

घटनास्थलमा अधिकारीहरू र माहुरी विशेषज्ञहरूको टोली खटिएको छ, जसले घारहरू पुनःस्थापना गर्ने, रानी माहुरी पत्ता लगाउने तथा माहुरीहरूलाई फेरि सुरक्षित रूपमा राख्ने प्रयास गरिरहेका छन्। यो प्रक्रिया पूरा गर्न करिब ४८ घण्टा लाग्न सक्छ।

माहुरीहरू केवल मह उत्पादनका लागि मात्र होइन, कृषिमा परागणको कामका लागि पनि अत्यन्त आवश्यक छन्। धेरै किसानहरू आफ्नो फलफूल तथा तरकारी उत्पादनमा परागणका लागि माहुरी भाडामा लिन्छन्। यस्तोमा लाखौँ माहुरीहहरू अस्थायी रूपमा हराउँदा नजिकैका बालीहरूमा प्रत्यक्ष असर पर्न सक्छ।

शेरेफ कार्यालयका अनुसार, “सार्वजनिक स्वास्थ्यमा ठूलो जोखिम छैन, तर जसलाई माहुरीको टोकाइबाट एलर्जी हुन्छ वा चिन्ता छ भने, राज्य स्वास्थ्य विभागको वेबसाइटमा गई जानकारी लिनु उपयुक्त हुन्छ।”

माहुरी कृषि प्रणालीका लागि अनिवार्य जीव हुन्, जसले काजु, तरकारी, सिट्रस फल, बेरी, खरबुजा लगायत सयभन्दा बढी फसलमा परागण गर्छन्। तर पछिल्ला वर्षहरूमा कीटनाशक, रोग, परजीवी, जलवायु परिवर्तन र विविध आहारा नपाउँदा उनीहरूको संख्या घट्दो छ।

सन् २०१८ मा संयुक्त राष्ट्रसंघले २० मेलाई “विश्व महमाखी दिवस” घोषणा गरेर यो संकटतर्फ विश्वको ध्यानाकर्षण गराएको थियो। महमाखी पालकहरू प्रायः वर्षभर विभिन्न स्थानमा महमाखी सार्दै हिँड्छन्, किनभने एउटै ठाउँमा धेरै समय राख्दा अन्य परागणकर्ताका लागि आहाराको अभाव हुने खतरा हुन्छ।

सन् २०१५ मा पनि सिएटलको उत्तरतर्फ इन्टरस्टेट ५ मा ट्रक पल्टिँदा १ करोड ४० लाख महमाखी सडकमा निस्किएर सर्वसाधारणलाई टोक्न थालेका थिए।

यसपटकको दुर्घटनाले पुनः एकपटक देखाएको छ कि महमाखीहरू केवल किट मात्र होइनन्, उनीहरू मानव खाद्य सुरक्षासँग गहिरो रूपमा जोडिएका संवेदनशील जीव हुन्। यस घटनाले कृषिमा उनीहरूको भूमिकालाई अझ गम्भीरताका साथ लिने आवश्यकता झल्काएको छ।