काठमाडौं । म्यूजिक खबर म्यूजिक अवार्डको १२ औं संस्करणमा दिइने सम्मान तथा पुरस्कारको घोषणा गरिएको छ। म्यूजिक खबरका सल्लाहकार, आयोजक, संगीतकर्मीबीच छलफल गरी आगामी जेठ २३ गते हुने अवार्डको फाइनल कार्यक्रममा दिइने सम्मान तथा पुरस्कारको नामहरु छनौट गरिएको कार्यक्रमको संयोजक सबिता पोखरेलले जानकारी दिइन्।

तिलगंगा स्थित बेस्ट वेस्र्टन प्लस होटलमा आयोजना हुने म्यूजिक अवार्ड कार्यक्रममा बिशिष्ट गीतकार यादव खरेललाई म्यूजिक खबर दीर्घ साधना सम्मान–२०८१ अर्पण गरिने भएको छ। सयौं गीत लेख्नुभएका गीतकार खरेलका गैरी खेतको शीरै हान्यो, चैतमास खडेरीमा डढेलोले बनै खायो, यस्तो पनि हुँदो रैछ, नौसय खोला तरेर जाने, उडुँ कि गुडुँ म लगायतका गीतहरु कालजयी छन्। उहाँले चलचित्र नासो, प्रेमपिण्ड, श्रीस्वस्थानी, नासो, लोभीपापी, आदिकवि भानुभक्त लगायतको निर्माण तथा निर्देशन गर्नुभएको छ भने चलचित्र विकास बोर्डको पहिलो अध्यक्षसमेत हुनुहुन्छ।

यस वर्षको म्यूजिक खबर रजत सङ्गीत सम्मान–२०८१ गायक तिलकसिंह पेलालाई अर्पण गरिने भएको छ। रेडियो नेपाल हुँदै हालसम्म पनि उहाँको संगीत तथा स्वरमा दर्जनौं गीतहरु रेकर्ड भएका छन्। लामो समयदेखि श्रीकृष्ण गुरुकुलमार्फत संगीतको प्रशिक्षकको माध्यमले अरुलाई शिक्षित गराउँदै आउनुभएका पेलालाई ‘म्यूजिक खबर रजत सम्मान –२०८१’ अर्पण गरिने भएको हो। लुकाउन खोज्दा पनि, के लत बस्यो मलाई, हेर दिन ढल्यो लगायतका गीतमा उहाँको स्वर सुन्न सकिन्छ।

म्यूजिक खबर दशक संगीत सम्मान– २०८१ बाट गायक खुमन अधिकारी र गायिका जुनु रिजाल काफ्लेलाई अर्पण गरिने भएको छ। २०६२ सालदेखि औपचारिक रुपमै संगीत क्षेत्रमा सक्रिय रहँदै आउनुभएका गायक अधिकारीले १० हजार बढी गीतमा स्वर भरिसक्नु भएको छ। त्यस्तै सांंगीतिक दरिलो छाप बनाउनु भएकी गायिका जुनु रिजालका लोकप्रिय गीतहरुमा फूल मन्जरी, न दोष तिम्रो न दोष मेरो, ड्राइभर दाइ, के नै भन्नु छ र अब, डाँफे झैं नाच्ने आदि छन्।

म्यूजिक खबर युवा सङ्गीत सम्मान गायिका मिना लामालाई अर्पण गर्ने निर्णय भएको छ। लामो समयदेखि संगीत क्षेत्रमा सक्रिय लामाका झम्के साँझैमा, आँसु पैंचो लगायतका आधुनिक र लोकगीतहरु लोकप्रिय छन्।

यस वर्षको म्यूजिक खबर संगीत पत्रकारिता पुरस्कार रङ्गपत्रकार एमपी सुब्बा र दिपाञ्जली शाहलाई अर्पण गरिनेछ। दुई दशकभन्दा बढी समयदेखि पत्रकारितामा संलग्न सुब्बा दृष्टि साप्ताहिकमा जिम्मेवारी सम्हाल्दै आउनुभएको छ भने शाह कान्तिपुर ग्रुपसँग आवद्ध छन्।

बाल प्रतिभा प्रोत्साहन सम्मान बाल गायिका पुजा देवकोटालाई अर्पण गरिने भएको छ। बाल्यकालदेखि गायनमा रुची राखी संगीत क्षेत्रमा प्रवेश गर्नुभएकी देवकोटाको स्वरमा म हुँ नेपाली, माया पलाउने लगायतका गीत लोकप्रिय छन्।

म्यूजिक खबर डायस्पोरा संगीत सम्मान गीतकार डा. रमिल अधिकारीलाई अर्पण गरिने भएको छ। लामो समयदेखि गीत लेखनमा सक्रिय अधिकारी न्यूजिल्याण्डमा कार्यरत छन्। नेपाली गीतसंगीतमा उहाँको महत्वपूर्ण योगदान रहेको छ।

फोटो पत्रकारिता पुरस्कार– २०८१ फोटोपत्रकार प्रदिपराज वन्तलाई अर्पण गरिने भएको छ। नेपालमा फोटो पत्रकारिताको क्षेत्रमा अतुलनीय योगदान पुर्याउनु भएका वन्त राष्ट्रिय समाचार एजेन्सीमा पनि आवद्ध छन्।

म्यूजिक खबर संगीत व्यवसायी सम्मान विमल शाहलाई अर्पण गरिने भएको छ। हारमोनियम निर्माण तथा मर्मतमा सक्रिय शाहले नेपालमै हारमोनियम उत्पादन गरी कलाकारहरुलाई उपलब्ध गराउँदै आउनुभएको छ।

म्यूजिक खबर म्यूजिक अवार्ड कार्यक्रमका निर्देशक पत्रकार एवं गीतकार शान्तिप्रिय हुन्। सुमन पण्डित अध्यक्ष रहेको अवार्ड कार्यक्रमकी संयोजक सबिता पोखरेल हुन्।