प्रधानमन्त्री एवं नेकपा (एमाले)का अध्यक्ष केपी शर्मा ओलीले सुशासन र विकासलाई तीव्रता दिन आफ्नो पार्टीको बहुमतको एकल सरकार आवश्यक रहेको बताएका छन्।

शनिबार (जेठ ३) पार्टी कार्यालय च्यासलमा राष्ट्रिय युवा संघद्वारा आयोजित कार्यक्रममा उनले मुलुक बनाउने एक मात्र पार्टी एमाले भएको जिकिर गरे। देश विकासका साथै सुशासन कायम गर्न एमालेको बहुमतको सरकार आवश्यक रहेकामा उनले जोड दिए। एमालेले यसअघि सरकार छाडेको तीन वर्षमा देश निकै ओरालो लागेको उनको भनाइ थियो।

उनले साना स्वार्थ लिएकाहरूले एमालेविरुद्ध भ्रम फिँजाएको आरोप लगाए। त्यस्तो भ्रममा नपर्न उनले आग्रह गरे। एमालेलाई आउँदो निर्वाचनमा बहुमत दिलाउन युवाले साथ दिनुपर्ने उनले बताए।

प्रधानमन्त्री ओलीले स्वदेशमा व्यवसाय गर्ने युवालाई सरकारका तर्फबाट आवश्यक सहयोग हुने उल्लेख गरे।

कार्यक्रममा चकित्सक, इन्जिनियरलगायत युवा एमालेमा प्रवेश गरेका थिए। स्वदेशमै केही गर्न सकिन्छ भन्ने सोचका साथ व्यवसाय सुरु गरेका युवा व्यवसायीलाई सम्मान समेत गरिएको थियो।

नेपाली कांग्रेसका सभापति शेरबहादुर देउवाले वर्तमान सरकारका केही कमिकमजोरी भए सुधार गर्दै अघि बढ्ने बताएका छन्।

प्रजातान्त्रिक विचार समाजले शनिबार काठमाडौंमा आयोजना गरेको कार्यक्रममा देउवाले कांग्रेस ठूलो पार्टी भए पनि बहुमत नभएकाले मिलेर सरकार बनाउनुपर्ने बाध्यता रहेको दोहोर्‍याए।

अहिलेको कांग्रेस–एमालेको संयुक्त सरकारका केही कमजोरी भए सुधार गर्दै अघि बढ्ने उनको भनाइ छ। उनले अहिलेको प्रणालीमा कुनै पनि दलको बहुमत आउन कठिन हुने भएकाले मिलेर सरकार बनाउनुपर्ने बताए। उनले मिलेरै चुनाव लड्नुपर्ने बाध्यता रहेको प्रष्ट पारे।

सभापति देउवाले देशमा समावेशी संविधान रहेकाले सवैको प्रतिनिधित्व सदनमा रहेको बताए।

२०४८ सालमा कांग्रेसको नेतृत्वको सरकार बनेपछि देशमा धेरै विकासका काम भएको उल्लेख गर्दै अहिले पनि मुलुक विकासको बाटोमा अघि बढिरहेको बताए।

सभापति देउवाले २०५२ सालमा आफू प्रधानमन्त्री हुँदा सांसदहरूलाई सुविधाका लागि सवैको सहमतिले गाडी खरिदमा भन्सार छुट दिने योजना ल्याएको स्मरण गर्दै त्यसलाई विरोध गर्नेले पजेरो काण्ड भन्ने गरेको जिकिर गरे। त्यसबेला भन्सार छुट दिने योजनाको विरोध गर्नेले नै सबैभन्दा पहिले छुटमा गाडी किनेको उनले बताए।

नेकपा (एकीकृत समाजवादी)का अध्यक्ष माधवकुमार नेपालले मदन भण्डारी र जीवराज आश्रितको मृत्यु घटनाको सत्यतथ्य उजागर हुनुपर्ने बताएका छन्।

३२औँ मदन–आश्रित स्मृति दिवसका सन्दर्भमा शनिबार (जेठ ३) काठमाडौंमा आयोजित एक कार्यक्रममा उनले दुई नेताको मृत्युका विषयमा विभिन्न चर्चा हुने गरेको उल्लेख गरे। त्यसलाई उजागर गर्न उनले सरकारको ध्यानाकर्षण गराएका हुन्।

घटनाको छानबिन गर्दै सत्यतथ्य बाहिर ल्याएर अपराधीलाई नांगेझार पार्नुपर्ने उनले बताए।

नेपाली कांग्रेसका नेता डा. शेखर कोइरालाले देशमा रेमिट्यान्सका नाममा अवैध पैसा भित्रिरहेको आशंका व्यक्त गरेका छन्।

शनिबार (जेठ ३) काठमाडौंमा आयोजित एक कार्यक्रममा उनले गएको महिना मात्र करिब दुई खर्ब रेमिट्यान्स (औपचारिक र अनौपचारिक) भित्रिएको तथ्यांक उल्लेख गरे। वैदेशिक रोजगारमा गएका व्यक्तिले पठाउँदा पनि उक्त रेमिट्यान्स सम्भव नदेखिएको उनले बताए। र, रेमिट्यान्सका नाममा अवैध पैसा नेपालमा भित्रिरहेको आशंका व्यक्त गरे।

यता  नेपाल कम्युनिस्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले जनबलमा आफ्नो पार्टी सत्तामा पुगेको जिकिर गरेका छन्।

शुक्रबार (जेठ २)देखि सुरु ‘जनतासँग माओवादी (मध्यपहाडी लोकमार्ग) जनता जागरण अभियान’अन्तर्गत शनिबार डोटीमा आयोजित सभामा उनले आफ्नो दललाई कुनै राजनीतिक पार्टीले नभई जनताको मतबाट सत्तामा पुर्‍याएको बताए।

उनले भने, “हामीलाई तपाईं हामीजस्तै गरिब, मजदुर, किसान, उत्पीडित वर्ग एवं समुदायले विस्तृत शान्तिसम्झौता हुँदै तीनपटक सरकारको नेतृत्व गर्ने ठाउँसम्म पुर्‍याएका हुन्।”

अध्यक्ष प्रचण्डले आत्मालोचना गर्दै आफूहरू जनतामाझ आएको र उनीहरूका पीरमर्का बुुझेर तिनलाई सम्बोधनको प्रयास गरिने बताए।