भारत र पाकिस्तानबीच युद्धको अवस्था तीव्र बनेको छ। विहीबार बेलुकीदेखि दुवै देशका सेनाहरूले एकअर्काको भूमिमा मिसाइल प्रहार गरेका छन्। यस आक्रमणसँगै सीमावर्ती क्षेत्रमा तनाब चुलिएको छ।

भारत र पाकिस्तानबीचको पछिल्लो द्वन्द्वका कारण खेलकुद क्षेत्रसमेत प्रभावित भएको छ। आईपीएल क्रिकेट प्रतियोगिताको पञ्जाब किङ्ग्स र दिल्ली क्यापिटल्सबीच हिमाचल प्रदेशको धर्मशालामा भइरहेको खेल स्थगित गरिएको छ।

भारतीय सञ्चार माध्यमहरूका अनुसार पाकिस्तानले लगातार दोस्रो दिन ड्रोन र मिसाइल आक्रमण गरिरहेको छ।गरिएको छ। भारतले भने ती आक्रमणलाई एस–४०० एयर डिफेन्स मिसाइल सिस्टम प्रयोग गरी असफल बनाएको दाबी गरेको छ।

भारतको हिन्दुस्तान टाइम्सले जम्मू नजिकै पाकिस्तानको एफ–१६ विमान खसालिएको दाबी गरेको छ। भारतबाट सञ्चालित अनलाइन ‘द भाष्कर’ का अनुसार पाकिस्तानले जम्मू र पठानकोटमा आत्मघाती ड्रोन आक्रमण गरेको छ। जम्मू विमानस्थल र पठानकोट एयरफोर्स स्टेशनलाई लक्षित गरेर ड्रोन प्रहार भए पनि भारतीय एयर डिफेन्स सिस्टमले ती आक्रमणलाई निस्तेज बनाएको छ।

भारतका विभिन्न स्थानहरूमा आक्रमणको खबरहरू प्राप्त भएका छन्। जम्मु कश्मिरको जम्मु, साम्बा, केरन, तंगधार, करनाह, अखनुर, आरएसपुरा सेक्टर, अरनिया लगायतका क्षेत्रमा हमला भएको छ। यस्तै पञ्जाबको गुरदासपुर, राजस्थानको जैसलमेर र गुजरातको भुज क्षेत्रमा पनि आक्रमण भएको भारतीय सञ्चार माध्यमहरूले जनाएका छन्।

तनाबपछि ब्ल्याकआउट

द्वन्द्व चर्किएसँगै सीमावर्ती क्षेत्रमा बत्ती निभाइएको छ। जम्मू, किश्तवाड, अखनुर, साम्बा र पठानकोटमा पूर्ण ब्ल्याकआउट गरिएको छ। राजस्थानका सबै सीमा क्षेत्रका जिल्लाहरूमा पनि ब्ल्याकआउट गरिएको छ। पञ्जाबको जालन्धर, अमृतसर, बिकानेर र श्रीगंगानगरमा पनि ब्ल्याकआउट गरिएको छ।

आईपीएल खेल स्थगन

आईपीएल खेल भइरहेका बेला स्टेडियममा केही समयका लागि बत्ती निभाइएको थियो। त्यसपछि खेल नै स्थगित गर्दै दर्शकहरूलाई घर फर्काइएको थियो। सुरक्षाकर्मीहरूले घर, पसल र सवारी साधनहरूको बत्ती निभाउन आह्वान गर्दै माइकिङ गरिरहेका छन्। मानिसहरूमा आतंक फैलिएको छ भने धेरै ठाउँमा विस्फोटको आवाज सुनिएको बताइएको छ।

पहलगाम घटनापछि द्वन्द्व चर्कियो

कश्मिरको पहलगाम क्षेत्रमा आतंकवादी आक्रमणमा एक नेपालीसहित २६ जनाको मृत्यु भएको थियो। बदलास्वरूप भारतले मंगलबार रातिदेखि पाकिस्तानको भूमिमा हवाई हमला सुरु गरेको हो। बुटवल रुपन्देहीका सुदीप न्यौपानेको पनि सो आक्रमणमा मृत्यु भएको पुष्टि भएको छ।

भारतले पाकिस्तान नियन्त्रित कश्मिरका पाँच र पाकिस्तानकै भूमिमा चार गरी कुल नौ स्थानमा एयर स्ट्राइक गरेको जनाएको छ। तीमध्ये पाकिस्तानको बहावलपुरमा भएको आक्रमणमा जैश ए मोहम्मदका कमाण्डर मसुद अजहरको परिवारका सदस्यहरू मारिएका छन्। पाकिस्तान सरकारले आक्रमणबाट ३१ जनाको मृत्यु भएको र ५७ जना घाइते भएको पुष्टि गरेको छ।

भारतले यो कारबाहीलाई ‘अपरेसन सिन्दूर’ को नाम दिएको छ। आक्रमणपछि दुवै देशका सीमामा गोलाबारी तीव्र बनेको छ। स्थानीय बासिन्दाहरू भूमिगत बंकरहरूमा आश्रय लिन बाध्य भएका छन्।