नेपाल चलचित्र कलाकार सङ्घले वरिष्ठ लोक तथा दोहोरी गायक, चलचित्रकर्मी एवम् पत्रकार रामप्रसाद खनाललाई मानार्थ सदस्यता सहित सम्मान गरेको छ ।
नेपाल चलचित्र कलाकार सङ्घको कार्यालयमा आयोजित एक विशेष कार्यक्रम मा सङ्घ अध्यक्ष एवम् वरिष्ठ चलचित्रकर्मी मोहन निरौलाले खनाललाई उक्त मानार्थ सदस्यता सहित सम्मान गर्नुभएको हो । कार्यक्रममा नेपाल चलचित्र कलाकार सङ्घका पदाधिकारीहरू, कार्य समितिकाका सदस्य एवम् कलाकारहरू उपस्थित हुनुहुन्थ्यो ।
रवीन्द्र खड्का अध्यक्ष रहनुभएको बेला अर्थात् अघिल्लो कार्य समितिका पालामा नै खनाललाई मानार्थ सदस्यता सहित सम्मान गर्ने निर्णय भएकोमा खनाल देश बाहिर रहनुभएकोले प्रदान गर्न ढिलाइ भएको थियो । सोही निर्णय अनुसार अहिले खनाललाई मानार्थ सदस्यता सहित सम्मान गरिएको अध्यक्ष मोहन निरौलाले बताउनुभयो ।
निरौलाले खनाल गीत सङ्गीत, चलचित्र, साहित्य, लेखन देखी पत्रकारिता हुँदै संस्कृतिका क्षेत्रमा स्वदेश होस वा विदेश जहाँ हुँदा पनि ठुलो योगदान दिनुभएको र वहाँलाई मानार्थ सदस्यता सहित सम्मान गर्न पाउँदा आफू र चलचित्र कलाकार सङ्घ गौरवान्वित भएको बताउनुभयो ।

मानार्थ सदस्यता सहित सम्मान ग्रहण पछि बोल्दै खनालले नेपाल चलचित्र कलाकार सङ्घको पूर्व कार्यकारी समिति, अध्यक्ष रवीन्द्र खड्का सहित हालको कार्य समितिलाई पनि धन्यवाद र आभार प्रकट गर्दै आफू सक्दो योगदान जारी राख्ने बताउनुभयो ।

नेपाल चलचित्र कलाकार सङ्घका पूर्व अध्यक्ष एवम् चलचित्र नायक रवीन्द्र खड्काले विशेष कामले आफू कार्यक्रममा उपस्थित हुन नसके पनि खनाललाई बधाई तथा शुभकामना पठाउनुभएको थियो । खनाल अन्तर्राष्ट्रिय कलाकार मञ्चका अध्यक्ष पनि हुनहुन्छ । हाल वहाँ अमेरिकामा बसोबास गर्दै आउनुभएको छ । -न्युज एजेन्सी नेपाल