जसले जे सुकै भनोस – ऋषि धमलालाई मान्नु पर्छ, उनले नेपाली पत्रकारिता र सामाजिक सञ्जाललाई पनि आफ्नै पथमा हिँडाउन सफल भएका छन । “प्रचण्ड पथ” मा हिँडिरहेको देश र “ऋषि धमला पथ” मा हिँडिरहेको हाम्रो नेपाली पत्रकारिता दुवैको भविष्य उज्ज्वल छैन भन्ने मान्छे अहिले चल्दैनन । “ऋषि धमला पथ” मा हिँडिरहेको नेपाली पत्रकारिता मैले किन भनेको हो भने – अहिले मै हुँ भन्ने हाम्रा ठुला ठुला पत्रकार साथीहरू देखी माइक्रोफोन समात्न नजान्ने “अलपत्रकार”, युट्युबर, फेसबुक युजर, टिकटकर सबैतिर ऋषि धमला शैली पुरै हाबी छ । प्रश्न सोध्ने शैली देखी हाउ भाउ सम्म हेर्दा “ऋषि धमला पथ” देखिन्छ । अझ अर्को कुरा – ऋषि धमलाले आफैलाई उडाउने, हाँस्य पात्र बनाउने कमेडियनहरुलाई आफ्नै टेलिभिजनमा “कमेडी दरबार” नामको कार्यक्रम चलाउन दिएर दुनियाँ हँसाउने, मनोरञ्जन दिलाउने काम गरेका छन । पत्रकारिता क्षेत्र मात्र होइन कलाकारिता क्षेत्र पनि ऋषिकै सिको गर्दै “ऋषि धमला पथ” मा हिँडिरहेको देख्दा ऋषि धमला प्रति गर्व किन नगर्ने ! “ऋषि धमला पथ” को जय होस ।