काठमाडौँ। अमेरिकाको न्युयोर्कमा केन्द्रीय कार्यालय रहेको अन्तर्राष्ट्रिय सामाजिक संस्था भिजन क्लब्स इन्टरनेसनलको पहिलो अन्तर्राष्ट्रिय सम्मेलन नेपालमा सम्पन्न भएको छ। सम्मेलनका अवसरमा सामाजिक सेवा, मानवीय कल्याण तथा अपाङ्गता भएका व्यक्तिहरूको अधिकार संरक्षणका क्षेत्रमा उल्लेखनीय योगदान पुर्‍याउँदै आउनुभएकी समाजसेवी सविता उप्रेतीलाई ‘भिजन क्लब्स इन्टरनेसनल समाजसेवा पुरस्कार–२०२६’ बाट विशेष सम्मान गरिएको छ।

नेपालमा अटिजम भएका बालबालिकाको शिक्षा, स्वास्थ्य, पुनर्स्थापना, सामाजिक समावेशिता, आत्मनिर्भरता तथा अधिकारका क्षेत्रमा विगत १८ वर्षदेखि निरन्तर क्रियाशील उप्रेतीको योगदानको कदर गर्दै उक्त सम्मान प्रदान गरिएको आयोजक संस्थाले जनाएको छ।

भिजन क्लब्स इन्टरनेसनलका अन्तर्राष्ट्रिय अध्यक्ष मङ्गलदास श्रेष्ठको सभापतित्व तथा गोकर्णेश्वर नगरपालिकाका प्रमुख दीपक रिसालको प्रमुख आतिथ्यतामा आयोजित समारोहमा उप्रेतीलाई विशेष नेवारी बाजागाजासहित सम्मान गरिएको थियो। कार्यक्रममा अन्तर्राष्ट्रिय अध्यक्ष श्रेष्ठ, प्रमुख अतिथि रिसाल तथा संस्थाको काठमाडौँ–नेपाल च्याप्टरका अध्यक्ष राजकृष्ण श्रेष्ठले संयुक्त रूपमा पुरस्कार हस्तान्तरण गर्नुभएको थियो।

सोही अवसरमा सामाजिक अभियन्ता तथा सञ्चारकर्मी भोजराज थापा र समाजसेवी राजकृष्ण श्रेष्ठलगायत तीन जनालाई पनि सामाजिक क्षेत्रमा पुर्‍याएको योगदानको कदर गर्दै विशेष सम्मान गरिएको थियो।

सम्मान ग्रहण गर्दै समाजसेवी उप्रेतीले यस पुरस्कारले आफूलाई सामाजिक सेवाप्रति अझ बढी जिम्मेवार, प्रतिबद्ध र उत्साहित बनाएको बताउनुभयो। अटिजम भएका बालबालिका र उनीहरूका परिवारको जीवनमा सकारात्मक परिवर्तन ल्याउने अभियानलाई अझ प्रभावकारी रूपमा अगाडि बढाउन सम्मानले थप प्रेरणा प्रदान गरेको उल्लेख गर्दै उहाँले आयोजक संस्थाप्रति आभार व्यक्त गर्नुभयो।

उप्रेतीले अटिजम भएका बालबालिकाको हेरचाह, शिक्षा र पुनर्स्थापना केवल परिवारको मात्र जिम्मेवारी नभई राज्य, समाज र सबै सरोकारवालाको साझा दायित्व भएको सन्देश आफ्नो सामाजिक अभियानमार्फत प्रवाह गर्दै आउनुभएको छ।

उहाँले स्थापना गर्नुभएको विशेष स्कुल तथा पुनर्स्थापना केन्द्र (SSDRC) मार्फत हाल काठमाडौँको नरेफाँट, गोठाटार तथा भक्तपुरको ताथलीमा सञ्चालित तीनवटा शाखाबाट करिब ६० जना बालबालिका तथा किशोरकिशोरीलाई विशेष शिक्षा, विभिन्न प्रकारका थेरापी तथा पुनर्स्थापना सेवा प्रदान गरिँदै आएको छ।

सीमित स्रोतसाधन र अनेक चुनौतीका बीच सुरु भएको उप्रेतीको सामाजिक सेवाको यात्रा अहिले अटिजम भएका बालबालिकाको क्षमता विकास, सम्मानजनक जीवन, सामाजिक स्वीकार्यता र आत्मनिर्भरताका लागि समर्पित प्रेरणादायी अभियानका रूपमा अघि बढिरहेको छ।

यसैबीच, सन् २०२१ मा विश्वका विभिन्न मुलुकमा बसोबास गर्ने ३१ जना नेपाली परोपकारी व्यक्तित्वहरूको संयुक्त पहलमा अमेरिकाको न्युयोर्कमा स्थापना भएको भिजन क्लब्स इन्टरनेसनलले नेपालमा शिक्षा, स्वास्थ्य, अपाङ्गता, सामाजिक कल्याण तथा मानवीय सेवाका क्षेत्रमा सहयोग गर्दै आएको छ।

‘We Serve Nepal Differently’ अर्थात् ‘हामी फरक तरिकाले नेपालको सेवा गर्छौँ’ भन्ने मूल नाराका साथ स्थापित संस्थाले विश्वका विभिन्न देशमा राष्ट्रिय तथा स्थानीय च्याप्टर विस्तार गर्दै आफ्नो परोपकारी अभियानलाई अन्तर्राष्ट्रिय स्वरूप दिँदै आएको छ।

संस्थाका सदस्य, आजीवन सदस्य तथा विभिन्न देशमा रहेका सहयोगी र परोपकारी व्यक्तित्वहरूबाट सङ्कलित आर्थिक सहयोग नेपालका विभिन्न सामाजिक सेवामूलक कार्यक्रमहरूमा परिचालन गरिँदै आएको संस्थाले जनाएको छ।

सम्मेलनका अवसरमा संस्थामा आबद्ध नयाँ सदस्य तथा आजीवन सदस्यहरूलाई सदस्यता पिन र प्रमाणपत्रसमेत वितरण गरिएको थियो।

नेपालमा पहिलोपटक आयोजना गरिएको यस अन्तर्राष्ट्रिय सम्मेलनले विदेशमा रहेका नेपाली परोपकारी व्यक्तित्वहरूलाई मातृभूमिको सामाजिक विकास, मानवीय सहायता र सेवामूलक अभियानसँग थप जोड्ने विश्वास आयोजक संस्थाले व्यक्त गरेको छ।