फ्लोरिडा, अमेरिका, नोभेम्बर २, २०२६। अमेरिकाको फ्लोरिडा राज्यमा आइतबार भएको निजी जेट विमान दुर्घटनामा नौ जनाको मृत्यु भएको छ। दुर्घटनाको प्रारम्भिक अनुसन्धानमा विमान जमिनमा खस्नुअघि नै आकाशमा टुक्रिन थालेको हुन सक्ने नयाँ तथ्य सार्वजनिक भएको छ। खराब मौसम, विमानमा जमेको बरफ र तीव्र वायुमण्डलीय हलचल दुर्घटनासँग सम्बन्धित थिए कि थिएनन् भन्ने विषयमा अमेरिकी राष्ट्रिय यातायात सुरक्षा बोर्ड (एनटीएसबी) ले विस्तृत अनुसन्धान थालेको छ।

टेक्सासको अस्टिनबाट बहामासतर्फ उडेको लियरजेट–६० विमान फ्लोरिडाको पाम बीच काउन्टीस्थित मिलिटरी ट्रेल सडकमा स्थानीय समयअनुसार आइतबार दिउँसो करिब १२ः५० बजे खसेको थियो। विमान जमिनमा ठोक्किएलगत्तै ठूलो विस्फोट र आगलागी भएको थियो। दुर्घटनास्थलमा गहिरो खाडल बनेको छ भने विमानका अवशेष आसपासका घर, व्यापारिक प्रतिष्ठान र खेलमैदानसम्म फैलिएका छन्।

दुर्घटनाअघि पाइलटले दिएका थिए डरलाग्दा सन्देश

हवाई ट्राफिक नियन्त्रण कक्षसँग भएको अन्तिम संवादअनुसार विमान करिब ३५ हजार फिटको उचाइमा हुँदा पाइलटले विमानमा बरफ जमेको र मध्यम स्तरको वायुमण्डलीय हलचल सामना गरिरहेको जानकारी दिएका थिए।

पाइलटले प्रतिकूल मौसमबाट जोगिन विमानलाई ३७ हजार फिटको उचाइमा लैजान अनुमति मागेका थिए। तर त्यसको ३० सेकेन्ड पनि नबित्दै विमान अचानक तीव्र गतिमा तल झर्न थालेको थियो।

आपत्कालीन सन्देशमा पाइलटले विमान प्रतिमिनेट २० हजार फिटको दरले खसिरहेको र नियन्त्रण गुम्ने अवस्थामा पुगेको बताएका थिए। अन्तिम संवादमा विमान जमिनमा ठोक्किन लागेको भन्दै अब समय बाँकी नरहेको आशयको सन्देश सुनिएको थियो।

मृतकमध्ये प्राविधिक उद्यमीको परिवार पनि

दुर्घटनामा टेक्सासका प्रविधि उद्यमी एडम रोबिन्सन, उनकी पत्नी हेलेन शार्प र उनीहरूका दुई सन्तान एम्मा तथा चार्लीको मृत्यु भएको छ। अन्य यात्रुमा राचेल रिड, चार्मी फेहर र अनिता मारिया सेटिना रहेका छन्।

विमानका पाइलट जेफरी ग्रेगरी र २० वर्षीया सहपाइलट नथालिया फिल्गेइरासको पनि मृत्यु भएको छ। नथालियाले १७ वर्षकै उमेरमा उडान अनुमतिपत्र प्राप्त गरेकी थिइन्। दुर्घटनामा सडकमा रहेका एक व्यक्तिको खुट्टामा चोट लागेको छ।

ट्रम्पको निवासनजिकै दुर्घटना

दुर्घटनास्थल राष्ट्रपति डोनाल्ड ट्रम्पको मार–ए–लागो निवासबाट करिब १४ किलोमिटर टाढा पर्छ। दुर्घटना हुनुभन्दा झन्डै एक घण्टाअघि राष्ट्रपति ट्रम्प एयर फोर्स वन विमानबाट नजिकैको विमानस्थलबाट प्रस्थान गरेका थिए। यो दुर्घटनाको राष्ट्रपति ट्रम्पको यात्रासँग कुनै सम्बन्ध रहेको प्रमाण सार्वजनिक भएको छैन।

विमान आकाशमै किन टुक्रियो ?

एनटीएसबीका सदस्य टम च्यापम्यानले विमान जमिनमा ठोक्किनुअघि नै केही भाग अलग भएको हुन सक्ने संकेत भेटिएको बताएका छन्। अनुसन्धानकर्ताहरूले विमानको संरचनात्मक अवस्था, मर्मतसम्भार अभिलेख, अत्यधिक गति, बरफ जम्ने अवस्था र आँधीबेहरीको प्रभाव अध्ययन गरिरहेका छन्।

विमानमा ककपिट भ्वाइस रेकर्डर रहेको थियो कि थिएन र त्यसलाई फेला पार्न सकिन्छ कि सकिँदैन भन्ने विषयमा पनि खोजी भइरहेको छ। अनुसन्धानमा संघीय उड्डयन प्रशासन (एफएए), विमानसम्बन्धी प्राविधिक विशेषज्ञ र मौसमविद्हरू सहभागी छन्।

विमानका टुक्रा ठूलो क्षेत्रमा छरिएकाले प्रमाण संकलन चुनौतीपूर्ण बनेको छ। अधिकारीहरूले दुर्घटनाको वास्तविक कारण यकिन गर्न समय लाग्ने र अहिले नै कुनै एउटा कारणलाई जिम्मेवार ठहर गर्न नमिल्ने स्पष्ट पारेका छन्।

यस दुर्घटनाले अत्यन्त तीव्र गतिमा उड्ने निजी जेट विमानमा प्रतिकूल मौसम, बरफ जम्ने समस्या र आकस्मिक नियन्त्रण गुम्ने अवस्थाको जोखिमबारे गम्भीर प्रश्न उठाएको छ। अनुसन्धानको अन्तिम प्रतिवेदनले दुर्घटना मौसमका कारण भएको हो, प्राविधिक खराबीले भएको हो वा विभिन्न कारण एकसाथ उत्पन्न भएर भएको हो भन्ने स्पष्ट पार्ने अपेक्षा गरिएको छ।