काठमाडौं, असार २५ । नेपाली साहित्यमा नयाँ पुस्ताका सर्जकलाई प्रोत्साहन गर्ने उद्देश्यले आयोजना गरिएको दोस्रो विश्वव्यापी खुला ‘आरुष–टाइगर अन्तर्राष्ट्रिय कविता प्रतियोगिता–२०८२’ को उत्कृष्ट २५ कविताको नतिजा सार्वजनिक गरिएको छ।

प्रतियोगिताको आयोजना साहित्यिक पत्रकार संघ (सापस) ले गरेको हो। संघले जारी गरेको विज्ञप्तिअनुसार वरिष्ठ समालोचक प्रमोद प्रधान संयोजक रहेको निर्णायक समितिले प्राप्त सयौं सिर्जनामध्ये उत्कृष्ट २५ कविता छनोट गरेको हो।

यस वर्ष छनोटमा परेका कविताहरूले राष्ट्रप्रेम, सामाजिक चेतना, युवा पुस्ताको मनोविज्ञान, मानवीय संवेदना, वातावरण संरक्षण, समकालीन राजनीति, परिवर्तन, प्रेम तथा जीवनदर्शनजस्ता विविध विषयलाई सशक्त रूपमा उठाएका छन्। आयोजकका अनुसार प्रतियोगिताले युवा पुस्तामा सिर्जनशील लेखन संस्कृतिलाई प्रवर्द्धन गर्ने उद्देश्य बोकेको छ।

उत्कृष्ट २५ मा परेका कविता

प्रतियोगितामा उत्कृष्ट २५ भित्र स्थान बनाउन सफल भएका कविता तथा स्रष्टाहरू यसप्रकार छन्–

1. जागौँ वीर युवा – विपेन आदिमा
2. जेनजीबहादुर – सुनिता अधिकारी
3. कवितामा देश – तुलसी घिमिरे
4. प्रेमका परम गणितहरू – गुञ्जन राई
5. आवाजहरूको विद्रोह – सङ्गीता खरेल
6. मुखौटाहरूको महोत्सव – रमेश दाहाल
7. बलिदानीहरूको आवाज – सरस्वती विश्वकर्मा (सारा)
8. स्वाभिमान – ‘प्यासी’ (अनुमोदन)
9. गाउँ जाने बाटो – मदन घिमिरे
10. मान्छे हरायो – किरण विश्वकर्मा
11. सहर अब सहर होइन – अञ्चु सुवेदी
12. के गर्व गर्नु छ ? – गोपाल खनाल
13. शून्यहरूको आत्मकथा अनन्तसम्म – राजु उवरकोटी
14. फूलकुमारी – सरिता जोशी
15. भित्तेपात्रोहरू – मोहित जोशी
16. म र झोला – मनिभक्त राई
17. के म नेपाली होइन र ? – कंडेल
18. क्षमायाचना – सुरज पराजुली
19. जेनजेड पुस्तासँग प्रकृति र वातावरण संरक्षणका कुरा – माधवहरि पौडेल
20. मैले कविता लेख्न सकेको छैन – परिवेश मुन्छे
21. मान्छे : एक अनन्त अन्वेषण – इन्द्रप्रसाद गोतामे (जगतजंग)
22. परिवर्तन – शून्य नयन
23. युवालाई आह्वान – सुशील पौडेल
24. एकलव्यको दोस्रो प्रहार – शुभचन्द्र राई
25. लग्दै छ वृद्धाश्रम – निशा काफ्ले

आकर्षक पुरस्कारको व्यवस्था

प्रतियोगिताका विजेतालाई नगदसहित सम्मान गरिने आयोजकले जनाएको छ। प्रथम हुने कविले रु. ३० हजार, द्वितीयले रु. २० हजार तथा तृतीयले रु. १० हजार नगद पुरस्कारसहित प्रमाणपत्र प्राप्त गर्नेछन्। यसबाहेक उत्कृष्ट २५ भित्र स्थान बनाउन सफल सबै स्रष्टालाई पनि विशेष प्रमाणपत्र प्रदान गरिने कार्यक्रम रहेको छ।

कडा मापदण्डमा भएको प्रतिस्पर्धा

प्रतियोगितामा सहभागी हुनका लागि केही विशेष मापदण्ड निर्धारण गरिएको थियो। सहभागीको उमेर ४० वर्ष ननाघेको हुनुपर्ने, कविता अप्रकाशित हुनुपर्ने तथा समसामयिक विषयवस्तुमा आधारित सिर्जना मात्र स्वीकार गरिने व्यवस्था गरिएको थियो। कविता बुझाउने अन्तिम म्याद २०८२ पुस मसान्त तोकिएको थियो।

यस प्रतियोगिताका लागि अमेरिकामा बसोबास गर्दै आएकी समाजसेवी सपना राउत ले आर्थिक प्रायोजन गरेकी हुन्। आयोजकले उहाँको योगदानले नेपाली साहित्यका नयाँ प्रतिभालाई प्रोत्साहन गर्न महत्वपूर्ण सहयोग पुगेको जनाएको छ।

नेपाली साहित्यको पुरानो संस्था

वि.सं. २०२९ मा स्थापना भएको साहित्यिक पत्रकार संघ नेपाली भाषा, साहित्य, कला, संस्कृति तथा साहित्यिक पत्रकारिताको क्षेत्रमा पाँच दशकभन्दा बढी समयदेखि सक्रिय संस्थाका रूपमा परिचित छ। संस्थाले आफ्नो स्वर्ण महोत्सवको विशेष समापन कार्यक्रम वि.सं. २०८० साउन २९ गते सम्पन्न गरेको थियो।

संघले हरेक वर्ष चैत १९ गते कथा दिवस मनाउँदै आएको छ। साथै कवितायात्रा, साहित्यिक बनभोज, आत्मवाचन, सम्मान तथा अभिनन्दन कार्यक्रम, मैनाली कथा पुरस्कार, व्यथित काव्य पुरस्कार, लोकप्रिया पुरस्कार, भवानी साहित्यिक पत्रकारिता पुरस्कार तथा सापस साहित्यिक पत्रकारिता पुरस्कार प्रदान गर्दै आएको छ।

यसैगरी विगतमा गाइजात्रा कार्यक्रम, स्रष्टा सम्मान, रथारोहण, कविता क्यासेट, स्मारिका तथा सिर्जना बुलेटिन प्रकाशनजस्ता विविध साहित्यिक गतिविधि सञ्चालन गर्दै आएको संघले पछिल्लो समय म्युजिक नेपाल सँगको सहकार्यमा कवि भूपी शेरचन का कविताहरू विभिन्न कविहरूको स्वरमा अडियो रेकर्ड गरी डिजिटल माध्यममार्फत सार्वजनिक गर्ने अभियान पनि अघि बढाएको छ।

आयोजकका अनुसार यस्ता प्रतियोगिताले युवा पुस्तामा सिर्जनात्मक लेखनप्रति आकर्षण बढाउनुका साथै नेपाली कविताको अन्तर्राष्ट्रिय पहुँच विस्तार गर्न महत्वपूर्ण भूमिका खेल्ने विश्वास गरिएको छ।