रोल्पाको दुर्गम क्षेत्र थवाङ गाउँपालिका–१, जलजला नजिकै भएको भयावह जिप दुर्घटनाले एकै परिवारका सात सदस्यसहित २० जनाको ज्यान लिएको घटनाले स्थानीय बस्ती शोकमा डुबेको छ।
प्रारम्भिक विवरण अनुसार, रुकुमपूर्वको सिस्ने गाउँपालिका–५, टाकुरा निवासी एकै परिवारका सात जनाको घटनास्थलमै मृत्यु भएको पुष्टि भएको छ। वडा अध्यक्ष बीरेन्द्र बस्नेत का अनुसार मृतकमध्ये अधिकांश एउटै घरका सदस्य रहेका छन्।
उनले जानकारी दिएअनुसार, दुई दाजुभाइका परिवारका सदस्यहरू नै दुर्घटनामा परेका हुन्। ठूलो दाजुको परिवारबाट छोरा, बुहारी, श्रीमती र नाति गरी चार जनाले ज्यान गुमाए भने भाइ (साइँला) तर्फबाट उनकी श्रीमती, छोरी र छोरा गरी तीन जनाको मृत्यु भएको हो।
दुर्घटनामा ज्यान गुमाउनेमध्ये ९ जना दाङ जिल्लाका रहेका छन् भने ९ जना सिस्ने–५ टाकुराकै बासिन्दा हुन्। साथै, एक जना भूमे गाउँपालिका–५ का पनि मृतकमा परेका छन्। बाँकीको पहिचान प्रक्रिया जारी रहेको जनाइएको छ।
घटनापछि शवहरू संकलन गरी थवाङतर्फ ल्याइँदैछ। सबै मृतकको औपचारिक सनाखत थवाङ पुगेपछि गरिने तयारी भइरहेको छ।
उक्त जिप करिब ८ सय मिटर तल भीरमा खसेको थियो। बिहीबार परेको वर्षा र अँध्यारोका कारण उद्धार कार्य केही समयका लागि रोकिएको थियो। तर शुक्रबार बिहानदेखि सुरक्षाकर्मी र स्थानीयको संयुक्त प्रयासमा पुनः उद्धार कार्य अघि बढाइएको हो।
रुकुमपूर्वबाट थवाङतर्फ जाँदै गरेको लु १ ज ४१६७ नम्बरको बोलेरो जिप बिहीबार दिउँसो दुर्घटनामा परेको हो। दुर्घटनामा १२ जना महिला, ४ जना पुरुष र ४ जना बालबालिकाको ज्यान गएको पुष्टि भएको छ।
यस घटनामा सिस्ने गाउँपालिका–५ का ३२ वर्षीय समीर कामी गम्भीर घाइते भएका छन्। उनलाई घटनाकै रात अस्पताल पुर्याइएको छ, जहाँ उपचार जारी रहेको बताइएको छ।
यस दुर्घटनाले सिंगो गाउँ नै शोकमग्न बनेको छ भने स्थानीयवासीले दुर्गम सडकको अवस्था र सवारी सुरक्षामाथि गम्भीर प्रश्न उठाएका छन्।



प्रतिक्रिया