संयुक्त राष्ट्रसंघका महासचिव एन्टोनियो गुटेरेसले अमेरिका र इजरायलले इरानमाथि गरेको सैन्य कारबाही तथा त्यसपछि इरानले गरेको प्रतिकारलाई कडा शब्दमा निन्दा गरेका छन्। उनले यो घटनाक्रमले अन्तर्राष्ट्रिय शान्ति र सुरक्षालाई गम्भीर रूपमा कमजोर बनाएको चेतावनी दिएका छन्। “अमेरिका र इजरायलद्वारा इरानविरुद्ध बल प्रयोग र त्यसपछि इरानले क्षेत्रभरि गरेको प्रतिकारले विश्व शान्ति र सुरक्षालाई जोखिममा पारेको छ,” उनले विज्ञप्तिमा भने। उनले तत्काल युद्धविराम र तनाव घटाउन आह्वान गर्दै यसो नगरे व्यापक क्षेत्रीय युद्ध र सर्वसाधारणमा गम्भीर असर पर्ने चेतावनी दिएका छन्। यसैबीच, संयुक्त राष्ट्रसंघ सुरक्षा परिषद्को आपतकालीन बैठक शनिबार बोलाइएको छ।

यसैबीच, अमेरिका–इरान आणविक वार्तामा मध्यस्थता गर्दै आएका ओमानका विदेशमन्त्री बद्र अलबुसाइदीले पनि घटनाप्रति गहिरो असन्तुष्टि व्यक्त गरेका छन्। उनले सामाजिक सञ्जालमार्फत सक्रिय कूटनीतिक वार्ता फेरि कमजोर बनाइएको भन्दै अमेरिकालाई यस्तो संघर्षमा थप नफस्न आग्रह गरेका छन्। इरानका विदेशमन्त्री अब्बास अराघचीले अमेरिका–इजरायलको संयुक्त आक्रमणलाई “पूर्ण रूपमा उक्साहटबिना गरिएको, अवैध र अस्वीकार्य” भन्दै कडा आलोचना गरेका छन्। उनले राष्ट्रपति ट्रम्पमाथि टिप्पणी गर्दै “अमेरिका फर्स्टलाई इजरायल फर्स्टमा परिणत गरिएको छ” भन्ने आरोप लगाएका छन्।

फ्रान्सका राष्ट्रपति इमानुएल म्याक्रों, जर्मनीका चान्सलर फ्रेडरिक मर्ज र बेलायतका प्रधानमन्त्री कीयर स्टार्मरले संयुक्त रूपमा इरानलाई वार्तामार्फत समाधान खोज्न आग्रह गरेका छन्। उनीहरूले इरानलाई आफ्नो आणविक र मिसाइल कार्यक्रम रोक्न, अस्थिरता निम्त्याउने गतिविधि अन्त्य गर्न र आफ्नै नागरिकमाथि हुने दमन रोक्न आग्रह गरेका छन्। साथै, उनीहरूले आफूहरू यस आक्रमणमा सहभागी नभएको स्पष्ट पार्दै अन्तर्राष्ट्रिय साझेदारहरूसँग निरन्तर सम्पर्कमा रहेको बताएका छन्।साउदी अरेबियाले पनि बहराइन, यूएई, कतार, जोर्डन र कुवेतमा भएका आक्रमणहरूको कडा निन्दा गर्दै प्रभावित देशहरूलाई पूर्ण समर्थन र सहयोग गर्ने जनाएको छ।

रुसले अमेरिका इजरायलको आक्रमणलाई “लापरवाह कदम” भन्दै आलोचना गरेको छ। मस्कोले वार्ताको आवरणमा आक्रमण गरिएको आरोप लगाउँदै अन्तर्राष्ट्रिय समुदायलाई यस्तो “गैरजिम्मेवार गतिविधि” को मूल्यांकन गर्न आग्रह गरेको छ। यद्यपि बेलायतले आफू प्रत्यक्ष आक्रमणमा संलग्न नभएको बताएको छ, प्रधानमन्त्री स्टार्मरले मध्यपूर्वमा बेलायती विमानहरू प्रतिरक्षात्मक अभियानमा सक्रिय रहेको पुष्टि गरेका छन्।

युरोपेली संघकी प्रमुख कूटनीतिज्ञ काजा कालासले पछिल्लो अवस्थालाई “अत्यन्त जोखिमपूर्ण” भन्दै नागरिकको सुरक्षालाई प्राथमिकता दिनुपर्ने बताएकी छन्। इटाली र ब्राजिलले पनि घटनाप्रति चिन्ता व्यक्त गर्दै तनाव घटाउन पहल गर्ने बताएका छन्।

अस्ट्रेलियाका प्रधानमन्त्री एन्थोनी अल्बानीजले भने इरानलाई आणविक हतियार हासिल गर्न नदिन अमेरिकी कदमलाई समर्थन गरेका छन्।

संयुक्त राष्ट्रसंघका मानव अधिकार प्रमुख भोल्कर टुर्कले सबै पक्षलाई संयमता अपनाउन र वार्तामा फर्किन आग्रह गर्दै “हरेक युद्धमा सबैभन्दा ठूलो मूल्य सर्वसाधारणले चुकाउँछन्” भनेका छन्।

अमेरिकी राष्ट्रपति डोनाल्ड ट्रम्पले आफ्नो सन्देशमा इरानको खतरा हटाउन कारबाही गरिएको भन्दै इरानलाई आणविक हतियार प्राप्त गर्न नदिने उद्देश्य रहेको बताएका छन्। उनले इरानी जनतालाई घरमै सुरक्षित रहन आग्रह गर्दै सरकारविरुद्ध उठ्न समेत आह्वान गरेका छन्।

उता इजरायलका प्रधानमन्त्री बेन्जामिन नेतान्याहुले पनि इरानी जनतालाई “दमनको जुवाबाट मुक्त हुन” आग्रह गर्दै इरानलाई आणविक हतियारबाट रोक्नु मानवताका लागि आवश्यक रहेको बताएका छन्।