नेपाली काँग्रेसका सभापति गगनकुमार थापा ले आगामी पाँच वर्षलाई नेपालको इतिहासकै ‘स्वर्णिम काल’ बनाउने संकल्प व्यक्त गरेका छन्। सुर्खेतमा आयोजित चुनावी सभालाई सम्बोधन गर्दै सभापति थापाले काँग्रेसले अबको पाँच वर्षभित्र देशको अवस्था परिवर्तन गर्ने र मुलुकलाई कुनै पनि प्रकारको राजनीतिक वा सामाजिक दुर्घटनामा पर्न नदिने प्रतिबद्धता व्यक्त गरे। मधेसदेखि कर्णालीसम्म चुनावी अभियानमा सक्रिय रहेका उनले आसन्न निर्वाचन संविधानलाई सही बाटोमा राख्ने अनिवार्य शर्त भएको बताए।

उनले वर्तमान निर्वाचन संविधान रक्षाको महत्वपूर्ण कडी भएको उल्लेख गरे। भदौ २३ र २४ का अप्रिय घटनाहरू स्मरण गर्दै थापाले अब सरकारको गोलीबाट कुनै पनि नागरिकको ज्यान जान नहुने र कसैले पनि मुखुण्डो लगाएर सिंहदरबार जलाउन नपाउने वातावरण निर्माण गर्नुपर्नेमा जोड दिए।

‘यो निर्वाचन ती अतिवादी दृष्टिकोणहरूबीचको लडाईं हो। काँग्रेसले संविधानलाई ट्र्याकमा ल्याउने काममा एक इन्च पनि सम्झौता गर्दैन,’ उनले भने।

सभापति थापाले वि.सं. २०८२ देखि २०८७ सम्मको पाँच वर्षलाई नेपालको विकासको सबैभन्दा सफल अवधि बनाउने योजना अघि सारे। काँग्रेस नेतृत्वको सरकारले नागरिकका आधारभूत आवश्यकतालाई प्राथमिकता दिने उनले बताए। कुनै पनि नागरिकले उपचारका लागि आफ्नै खल्तीबाट पैसा तिर्नु नपर्ने र अभिभावकले सन्तानको शिक्षाको बिल तिर्नु नपर्ने व्यवस्था गर्ने उनले दाबी गरे।

उनले पढेका युवाहरूले देशभित्रै रोजगारी पाउने वातावरण निर्माण गरिने बताए। साथै, सरकारले प्रत्येक महिनाको पहिलो दिन जनतामाझ उपस्थित भएर आफ्नो कामको विवरण सार्वजनिक गर्ने र आगामी महिनाको लक्ष्य घोषणा गर्ने प्रतिबद्धता जनाए।

सभापति थापाले २०४६ सालयताका सबै चर्चित भ्रष्टाचार प्रकरणहरूको छानबिन गर्ने घोषणा गरे। ‘काँग्रेसको सरकारले पाँच वर्ष काम गर्दा एउटा पनि काण्ड भयो भनेर नागरिकले सुन्नु पर्दैन। यदि कुनै काण्डमा मेरै परिवारको सदस्य संलग्न भए पनि ऊ बच्दैन,’ उनले भने।

राजनीतिमा देखिएको ‘गठबन्धनको फोहोर’ सफा गरेर काँग्रेसले नयाँ ढंगले देश सम्हाल्ने उनले दाबी गरे।

कर्णाली प्रदेशको विशिष्ट भौगोलिक तथा आर्थिक अवस्थालाई औंल्याउँदै थापाले काठमाडौं र कर्णालीको विकासको ढाँचा एउटै हुन नसक्ने बताए। कर्णालीमा ४० प्रतिशत गरिबी र बेरोजगारी रहेको उल्लेख गर्दै उनले त्यसको समाधानका लागि संविधान र कानूनमै केही परिवर्तन आवश्यक रहेको बताए।

उनले कर्णालीको आन्तरिक आय न्यून रहेको अवस्थामा केन्द्रबाट जनसंख्याका आधारमा मात्र बजेट पठाएर समस्या समाधान नहुने बताए। प्रदेशलाई थप सशक्त बनाउनु पर्ने उनको धारणा थियो। हिमाली क्षेत्रमा हिउँ पर्ने समय र आर्थिक वर्षबीच तालमेल नमिल्दा बजेट फ्रिज हुने समस्या रहेको उल्लेख गर्दै उनले बजेट ल्याउने र खर्च गर्ने कानुनी व्यवस्था सच्याउनुपर्ने बताए।

आगामी १० वर्षमा सूचना प्रविधिको युग आउने उल्लेख गर्दै उनले कर्णालीका युवाले त्यसबाट लाभ लिन अहिले नै आमाको पोषण र बाल्यकालीन शिक्षामा लगानी गर्नुपर्ने बताए।

सभापति थापाले नेकपा एमाले, माओवादी तथा नयाँ आएका दलहरूको प्रवृत्तिको आलोचना गरे। माओवादीले विगतमा हिंसात्मक राजनीति गरेर कर्णालीलाई पीडा दिएको र अहिले नयाँ भनिएका दलहरूले सामाजिक सञ्जालमा भाइरल हुनका लागि उत्तेजना र घृणा फैलाउने काम गरेको आरोप लगाए।

‘देश बनाउन पेटमा आगो र आँखामा सपना मात्र भएर पुग्दैन, सोच्ने क्षमता, धैर्यता र सुझबुझ पनि चाहिन्छ,’ उनले भने।

अन्त्यमा उनले पार्टीका कार्यकर्तालाई सामाजिक सञ्जालको कोलाहल र भ्रमलाई चिर्दै प्रत्येक मतदाताको घरदैलोमा पुग्न निर्देशन दिए। कर्णालीमा काँग्रेसको शानदार विजयले देशभर नयाँ उत्साह ल्याउने विश्वास व्यक्त गर्दै उनले फागुन २१ गते हुने निर्वाचनमा ‘रुख’ चिन्हमा मतदान गरी काँग्रेसलाई विजयी गराउन अपिल गरे।