भर्जिनिया, अमेरिका / सन् 2002 मा स्थापना भएको University of Fairfax ले कम्प्युटर विज्ञान, साइबरसुरक्षा तथा सूचना प्रविधि संकायका लागि डा. राजन थपलियालाई सहायक डिन (Assistant Dean) पदमा नियुक्त गरेको घोषणा गरेको छ। प्रविधि शिक्षामा गुणस्तरीयता, नवप्रवर्तन र करियर केन्द्रित अध्ययनलाई थप सुदृढ बनाउने लक्ष्यसहित उनलाई फेब्रुअरी १५, २०२६ देखि औपचारिक रूपमा जिम्मेवारी दिइएको विश्वविद्यालयले जनाएको छ।

न्युयोर्क निवासी डा. थपलिया अमेरिकामा कृत्रिम बुद्धिमत्ता (AI), डाटा साइन्स, मेसिन लर्निङ, कम्प्युटर विज्ञान तथा उदीयमान प्रविधिका क्षेत्रमा परिचित शैक्षिक नेतृत्वकर्ता तथा अनुसन्धानकर्ता हुन्। उनले स्नातकोत्तर र विद्यावारिधि तहका कार्यक्रमहरूमा शैक्षिक प्रशासन, पाठ्यक्रम नवप्रवर्तन, संकाय विकास, कार्यक्रम मूल्याङ्कन तथा विद्यार्थी सफलताका पहलहरूमा व्यापक अनुभव हासिल गरेका छन्।

यसअघि डा. थपलियाले Golden Gate University (GGU Worldwide) मा डिजिटल तथा कम्प्युटर विज्ञानअन्तर्गत डक्टोरल (DBA) कार्यक्रमका प्रोग्राम चेयरको भूमिका निर्वाह गरेका थिए। त्यहाँ उनले शैक्षिक गुणस्तर सुनिश्चितता, प्रत्यायनअनुरूप कार्यक्रम सञ्चालन, विद्यावारिधि शोध निर्देशन, मूल्याङ्कन रणनीति तथा दीर्घकालीन कार्यक्रम विकासमा नेतृत्व दिएका थिए।

प्रविधि क्षेत्रका विचार नेतृत्वकर्ताका रूपमा पनि पहिचान बनाएका डा. थपलियालाई Influencer Hero ले अमेरिकाका “Top 20 Machine Learning Influencers” मध्ये एकका रूपमा मान्यता दिएको छ। उनी विश्वभरका विद्यार्थी, अनुसन्धानकर्ता र पेशाकर्मीका लागि मार्गदर्शक र मेन्टरका रूपमा सक्रिय छन्।

सहायक डिनको भूमिकामा डा. थपलियाले कम्प्युटर विज्ञान, साइबरसुरक्षा र सूचना प्रविधि कार्यक्रमहरूमा संकाय सहभागिता, पाठ्यक्रम उत्कृष्टता, शैक्षिक नवप्रवर्तन, कार्यक्रम मूल्याङ्कन तथा विद्यार्थी सफलता रणनीतिलाई अघि बढाउने विश्वविद्यालयले अपेक्षा गरेको छ। उनी अमेरिकाभर विभिन्न विश्वविद्यालयमा एमएस र पीएचडी तहमा AI, डाटा साइन्स, सफ्टवेयर इन्जिनियरिङ तथा सूचना प्रविधि विषय अध्यापन गर्दै आएका छन्। साथै, उनी पीएचडी शोध प्रबन्ध अध्यक्ष (Dissertation Chair) तथा विषय विज्ञ (SME) का रूपमा बहु-विषयगत उन्नत अनुसन्धानमा मार्गदर्शन प्रदान गर्छन्। उनी विभिन्न शैक्षिक जर्नल र प्रकाशन मञ्चका सम्पादक तथा सहकर्मी समीक्षक (peer reviewer) समेत हुन्।

नेतृत्वलाई “दृष्टि, सत्यनिष्ठा र निरन्तर सुधारमार्फत अरूको सेवा” का रूपमा परिभाषित गर्ने डा. थपलियाले सहकार्य, नवप्रवर्तन र आजीवन सिकाइमार्फत विद्यार्थी तथा संकायलाई उत्कृष्टताका लागि सशक्त बनाउने लक्ष्य राखेका छन्।

करियर–केन्द्रित, लचिलो तथा मागअनुसारका दूरशिक्षा कार्यक्रममार्फत विश्वव्यापी रोजगार बजारको बदलिँदो आवश्यकतालाई सम्बोधन गर्ने ध्येय बोकेको University of Fairfax ले डा. थपलियाको अनुभव र दूरदर्शी नेतृत्वले संस्थाको दीर्घकालीन सफलतामा महत्वपूर्ण योगदान पुर्‍याउने विश्वास व्यक्त गरेको छ। डिजिटल युगमा भावी प्रविधि नेताहरूलाई प्रेरित गर्न उनीबाट उल्लेखनीय भूमिका निर्वाह हुने अपेक्षा गरिएको छ।

For more information, visit:

https://ufairfax.edu/team_member/dr-rajan-thapaliya-dean-of-computer-science-cybersecurity-it/