काठमाडौं । आसन्न संघीय प्रतिनिधिसभा सदस्यको आम निर्वाचन २०८२ लाई लक्षित गर्दै विश्वभर छरिएका प्रवासी नेपालीहरूले आफ्ना साझा माग र मुद्दाहरू सबै राजनीतिक दलका घोषणापत्रमा समेट्न आग्रह गरेका छन्।

उत्तर अमेरिकास्थित एसोसिएशन अफ नेपालीज ईन द अमेरिकाज (एएनए) का अध्यक्ष खगेन्द्र अधिकारीद्वारा जारी प्रेस विज्ञप्तिमार्फत नेपालका सम्पूर्ण राजनीतिक दल, तिनका आधिकारिक उम्मेदवार तथा स्वतन्त्र उम्मेदवारहरूलाई सम्बोधन गर्दै यस्तो अपिल गरिएको हो।

विज्ञप्तिमा “नेपाल नेपालीको हो र वंशजको नेपाली नागरिकता सधैं कायम रहनुपर्छ” भन्ने धारणा प्रवासी नेपालीहरूको सर्वसम्मत निष्कर्ष भएको उल्लेख गरिएको छ। करिब एक करोडको संख्यामा रहेका प्रवासी नेपाली समुदायले वंशजका आधारमा प्राप्त नेपाली नागरिकताको निरन्तरतासहित अधिकार सुनिश्चित गर्नुपर्ने आवश्यकता औंल्याएका छन्।

प्रेस विज्ञप्तिमा हाल नेपाल सरकारबाट प्रदान गरिँदै आएको गैरआवासीय नेपाली नागरिकताको अधिकारलाई व्यवहारमै कार्यान्वयन गर्नुपर्ने माग पनि अघि सारिएको छ। साथै, प्रवासी नेपालीहरूको नेपालमा रहेको जायजेथा, चल–अचल तथा पैत्रिक सम्पत्तिको सुरक्षित व्यवस्थापन, निर्वाचनमा मताधिकारको व्यवस्था, तथा नेपालमा आर्थिक र सीप लगानीका लागि सुरक्षित र विश्वसनीय वातावरण निर्माण गर्नुपर्ने विषयलाई घोषणापत्रमा प्राथमिकतासाथ समेट्न आग्रह गरिएको छ।

त्यस्तै, वैदेशिक लगानी नेपाल भित्र्याउने क्रममा देखा परिरहेका प्राविधिक, कानूनी र व्यावहारिक अड्चनहरू हटाउन स्पष्ट नीति र कानूनी प्रबन्ध गर्नुपर्ने आवश्यकता औंल्याइएको छ। प्रवासबाट लगानी गर्न इच्छुक नेपालीहरूका लागि झन्झटिलो प्रक्रिया, प्रशासनिक ढिलासुस्ती तथा अस्पष्ट कानूनी संरचना मुख्य अवरोधका रूपमा रहेको उल्लेख गरिएको छ।

विज्ञप्तिमा विदेशस्थित कूटनीतिक नियोग तथा नेपाली राजदूतावासहरूबाट सेवाग्राहीलाई प्रदान गरिने सेवामा देखिएको ढिलासुस्तीप्रति समेत ध्यानाकर्षण गराइएको छ। ती निकायबाट छिटोछरितो, पारदर्शी र प्रभावकारी सेवा प्रवाह सुनिश्चित गर्ने रणनीति राजनीतिक दलहरूले आफ्नो भावी कार्ययोजनामा समेट्नुपर्ने माग गरिएको छ।

आसन्न निर्वाचनलाई महत्वपूर्ण अवसरका रूपमा लिँदै प्रवासी नेपाली समुदायले आफ्ना साझा र अत्यन्त महत्वपूर्ण मुद्दाहरू सबै दलका घोषणापत्रमा स्पष्ट रूपमा उल्लेख गरी सार्वजनिक गर्न आग्रह गरेको छ।

“समस्त प्रवासी नेपाली डायसपोराको तर्फबाट” जारी उक्त अपिलमा अध्यक्ष खगेन्द्र अधिकारीले सबै राजनीतिक शक्तिहरूलाई प्रवासी नेपालीका जायज मागप्रति संवेदनशील भई ठोस योजना सार्वजनिक गर्न अनुरोध गरेका छन्।