काठमाडौं । “सत्य र न्यायको खोजी अभियान”का अध्यक्ष ध्रुवलाल श्रेष्ठले वर्तमान सरकारलाई “अवैध, भ्रष्ट र विदेशी कठपुतली” भएको आरोप लगाएका छन् र अभियन्ता दुर्गा प्रसाईलाई तुरुन्त रिहा गर्न माग गरेका छन्।

अभियानका तर्फबाट जारी प्रेस विज्ञप्तिमा अध्यक्ष श्रेष्ठले सरकारले संविधान र कानूनी शासनको पालना नगरेको आरोप लगाएका छन्। उनले “मरेको संविधानलाई जिउँदै छ भन्ने, कानून नियम केही नमान्ने, अन्तरिम संविधान नचाहिने र नवनाउने, आफैंले बनाएको नजिर उल्लंघन गर्ने” प्रवृत्ति देखाएको दाबी गरेका छन्।

श्रेष्ठले सरकार भ्रष्टाचारमा डुबेको आरोप लगाउँदै त्यस्ता सरकारका कार्ययोजना र निर्णयहरू वैधानिक हुन नसक्ने बताएका छन्। आगामी निर्वाचनसमेत अवैध हुने दाबी गर्दै उनले त्यस्तो “जंगली सरकार”को अस्तित्व स्वीकार नगर्न सर्वसाधारणलाई आह्वान गरेका छन्।

उनले ३६ वर्षदेखि देश लुट्ने शक्तिहरू पुनः सत्तामा पुगेर व्यक्तिगत स्वार्थ पूरा गर्न चुनावी प्रक्रियामा सहभागी भएका बताएका छन्। स्वतन्त्रको नाममा राजनीति गर्नेहरू समेत सिंहदरबार पुगेर हैसियत बनाउने दौडमा लागेको आरोप उनले लगाएका छन्। त्यस्ता शक्तिहरूलाई उनले “ठग, फटाहा र विदेशी दलाल”को संज्ञा दिएका छन्।

प्रेस विज्ञप्तिमा सडकमा प्रतिपक्षका रूपमा देखिएका दुर्गा प्रसाईलाई रातको समयमा कानूनविपरीत पक्राउ गरिएको आरोप लगाइएको छ। विरोधी शक्तिलाई दबाउन सरकारले “जंगली रूप” देखाएको उनले बताएका छन्। वर्तमान सरकार “विदेशी योजनामा बनेको कठपुतली सरकार” भएको दाबी पनि श्रेष्ठले गरेका छन्।

अभियानले सरकारलाई पद र हैसियतको दुरुपयोग नगर्न चेतावनी दिएको छ र समय सधैं एकनास नहुने स्मरण गराएको छ। अन्त्यमा विज्ञप्तिमार्फत दुर्गा प्रसाईलाई तत्काल रिहा गर्न माग गरिएको छ।

यसै गरी अभियानले राष्ट्रको सुरक्षाका विषयमा गम्भीर चिन्ता व्यक्त गर्दै सम्पूर्ण नेपालीहरू एकजुट हुनुपर्ने बेला आएको जनाएको छ। अभियानका तर्फबाट जारी वक्तव्यमा पछिल्ला गतिविधिहरूले देशको सार्वभौमिकता र स्थायित्वमाथि प्रश्न उठाएको दाबी गरिएको छ।

वक्तव्यमा कतै परदेशी सेना पसेको, कतै जेट अवतरण गरेको भन्ने समाचारहरू सार्वजनिक भइरहेका उल्लेख गर्दै यस्ता घटनाक्रमले देश युक्रेनजस्तै द्वन्द्वतर्फ धकेलिँदै गएको हो कि भन्ने आशंका उत्पन्न भएको बताइएको छ। यस्तो संवेदनशील समयमा नागरिकहरूलाई निर्वाचनको बहानामा भुलाउने प्रयास भइरहेको दाबी पनि अभियानले गरेको छ। आवधिक निर्वाचन नजिकिँदै गर्दा बिगतमा  मध्यरातमा क्वार्टरमा बसेर मन्त्रिपरिषद्ले दिएको नामावलीअनुसार  ८० जना न्यायाधीश नियुक्त गरिएको र त्यसबाट न्यायालय कमजोर बनाइएको आरोप वक्तव्यमा गरिएको छ।

त्यसैगरी, अख्तियारमा भ्रष्टाचारसम्बन्धी उजुरी परेको भनिएकी सुषिला कार्कीलाई संविधान मिचेर अन्तरिम सरकारको प्रधानमन्त्री बनाइएको दाबी गर्दै अभियानले यसलाई नाटकीय र असंवैधानिक कदमको रूपमा व्याख्या गरेको छ। नेपाली जनताले कल्पना नगरेको र आवश्यक नभएको निर्वाचन किन सुनियोजित रूपमा लादिएको हो भन्ने प्रश्नको वैधानिक जवाफ सरकार गठन गर्ने र सरकारमा बस्ने पक्षबाट नआएको आरोप पनि लगाइएको छ।

वक्तव्यमा देशभित्र विदेशी प्रभाव र गतिविधिबारे सरकार किन आधिकारिक रूपमा बोल्दैन भन्ने प्रश्न उठाइएको छ। यस्ता विषयले देशवासीहरूमा चिन्ता बढाएको भन्दै अभियानले स्पष्ट धारणा सार्वजनिक गर्न सरकारसँग माग गरेको छ।

अभियानले सम्पूर्ण नेपाली नउठे पनि कम्तीमा काठमाडौँवासीहरू जागरुक हुनुपर्ने आह्वान गरेको छ। गुठी विधेयकविरुद्ध काठमाडौँका नेवार समुदाय जसरी एकजुट भएर उभिएका थिए, त्यसरी नै पुनः एकपटक संगठित हुन आग्रह गरिएको छ। काठमाडौँका रैथाने नेवार समुदाय मात्रै एकढिक्का भएर उभिए पनि स्वदेशी तथा विदेशी दलाल र कुतत्वबाट नेपाललाई जोगाउन सकिने दाबी वक्तव्यमा गरिएको छ।