रूपन्देहीमा महाशिवरात्रीको अवसर पारेर तिलोत्तमा नगरपालिका–४ मा स्थापित शृङ्गेश्वरधाममा भव्य तथा ऐतिहासिक पूजाआजा, भजनकीर्तन र धार्मिक कार्यक्रम भव्य रूपमा सम्पन्न भएको छ। गुल्मेली सम्पर्क समाज रूपन्देहीको गुरुयोजनाअन्तर्गत आयोजना गरिएको उक्त कार्यक्रममा हजारौँ श्रद्धालु भक्तजनको उल्लेखनीय उपस्थिति रहेको थियो।

महाशिवरात्री पर्वका अवसरमा आयोजित कार्यक्रममा विभिन्न भजन मण्डलीले भक्तिमय प्रस्तुति दिएका थिए भने स्वास्थ्य सुरक्षालाई ध्यानमा राख्दै मेडिटेक अस्पतालको चिकित्सकको समूहले स्वास्थ्य सेवा प्रदान गरेको थियो। कार्यक्रम सफल बनाउन विभिन्न समिति तथा उपसमितिहरू गठन गरी जिम्मेवारी बाँडफाँड गरिएको थियो।

कार्यक्रमको सफलतापछि आयोजकहरूले सहभागी सम्पूर्ण सल्लाहकार, आजीवन सदस्य, कार्यसमिति, श्रद्धालु भक्तजन, भजन मण्डली, चिकित्सक टोली तथा व्यवस्थापनमा खटिनुभएका सबै शुभेच्छुकप्रति हार्दिक धन्यवाद, आभार तथा कृतज्ञता व्यक्त गरेका छन्। आगामी दिनमा पनि यस्तै सक्रिय सहभागिता र सहयोगको अपेक्षा गरिएको छ।

शृङ्गेश्वरधाम व्यवस्थापन समितिका अध्यक्ष ऋषि भण्डारी र सचिव गणेश कँडेलले संयुक्त रूपमा धन्यवाद ज्ञापन गर्दै धार्मिक तथा सांस्कृतिक कार्यक्रमले समाजमा एकता र आध्यात्मिक चेतना अभिवृद्धि गरेको बताएका छन्।

यसैगरी, शृङ्गेश्वरधामका संरक्षक तथा गुल्मेली सम्पर्क समाज रूपन्देहीका अध्यक्ष डा. नारायणप्रसाद पन्थ र महासचिव राजेन्द्र कुँवरले कार्यक्रमलाई ऐतिहासिक सफलताको रूपमा मूल्यांकन गर्दै सम्पूर्ण सहयोगी संस्थाहरू र व्यक्तित्वहरूलाई विशेष धन्यवाद दिएका छन्।

महाशिवरात्री कार्यक्रम मूल व्यवस्थापन समितिका संयोजक नेत्रप्रसाद ज्ञवालीले कार्यक्रम व्यवस्थापनमा सहयोग पुर्‍याउने सम्पूर्ण समिति परिवारप्रति आभार व्यक्त गरेका छन्। साथै ज्येष्ठ नागरिक मिलनकेन्द्रका अध्यक्ष यदुनाथ पाण्डे र सचिव दयानिधि भण्डारीले ज्येष्ठ नागरिकहरूको सक्रिय सहभागिताले कार्यक्रमको गरिमा बढाएको बताएका छन्।

निशुल्क आवासीय छोरी शिक्षा कार्यक्रमकी अध्यक्ष ओमीकला पुनले धार्मिक कार्यक्रमसँगै सामाजिक उत्तरदायित्वका अभियानलाई समेत अघि बढाउने प्रतिबद्धता व्यक्त गरेकी छन्।

समग्रमा, गुल्मेली सम्पर्क समाज रूपन्देही तथा शृङ्गेश्वरधाम परिवारको संयुक्त आयोजनामा सम्पन्न महाशिवरात्री महोत्सवले धार्मिक आस्था, सामाजिक एकता र सांस्कृतिक संरक्षणलाई सुदृढ बनाएको आयोजकहरूको भनाइ छ।